كەنشىلەر استاناسىندا ايتۋلى وقيعا بولدى. بۇل كۇنى ك.ستانيسلاۆسكي اتىنداعى ورىس دراما تەاترىندا مەملەكەت باسشىسىنىڭ جارلىعىمەن اسكەري بورىشىن اتقارۋ ۇستىندە كورسەتكەن ەرلىگى مەن جانقيارلىعى ءۇشىن «حالىق قاھارمانى» اتاعى بەرىلگەن ۇلتتىق ۇلان «ورتالىق» وڭىرلىك قولباسشىلىعىنىڭ شتاب باستىعى – 6505 اسكەري ءبولىمى كومانديرىنىڭ ءبىرىنشى ورىنباسارى قايرات ۇمبەتوۆكە لايىقتى قۇرمەت كورسەتىلدى.
قاھارمانعا قوشەمەت كورسەتىلگەن سالتاناتتى شاراعا قاراعاندى وبلىسىنىڭ اكىمى, ۇلتتىق ۇلان مەن «ورتالىق» وڭىرلىك قولباسشىلىعىنىڭ باسشىلىعى, اسكەري بولىمدەردىڭ كومانديرلەرى, كۇشتىك قۇرىلىمداردىڭ جەتەكشىلەرى, گەنەرالدار مەن ساردارلار جانە ساربازدار قاتىستى.
«قازىر مەنەن «مۇنداي جوعارى ناگرادا العاندا قانداي سەزىمدى باستان كەشتىڭ؟» دەپ ءجيى سۇرايدى. بىرىنشىدەن, ومىرگە جولداما بەرگەن, بۇگىنگى كۇندە ءوزىم قىزمەت ەتىپ جۇرگەن ۇلتتىق ۇلانعا دەگەن ماقتانىش سەزىمى كەۋدەنى كەرنەيدى. بۇل – ءبىزدىڭ بريگادانىڭ, وڭىرلىك قولباسشىلىقتىڭ, جالپى العاندا, قازاقستان رەسپۋبليكاسى ۇلتتىق ۇلانى اسكەرلەرىنىڭ جەكە قۇرامىنىڭ ناگراداسى!» – دەپ اعىنان جارىلدى قايرات جارىلقاسىن ۇلى سالتاناتتى شارادا.
قاتارداعى جاۋىنگەردى اجالدان قۇتقارىپ قالعان حالىق قاھارمانىن العاشقى بولىپ وبلىس اكىمى نۇرمۇحامبەت ابدىبەكوۆ قۇتتىقتادى. «ءبىزدىڭ وتانىمىزدىڭ ەڭ جوعارى بۇل ناگراداسى ناعىز باتىرلارعا عانا تابىس ەتىلەدى. ونىڭ ۇستىنە, بۇل ەرلىك بەيبىت كۇندە كورسەتىلىپ وتىرعاندىعىمەن دە قۇندى. مۇنىڭ ءوزى ءبىزدىڭ جاۋىنگەرلەردىڭ وتانىمىزدى لايىقتى قورعاۋ ءۇشىن ءوز ومىرلەرىن اياماي, بارلىق مۇمكىندىكتى جاساۋعا ءازىر ەكەندىكتەرىن كورسەتتى», – دەدى ول. ءوڭىر باسشىسى بارشا قاراعاندىلىقتار اتىنان بەيبىت زاماننىڭ باتىرىنا ەكى بولمەلى پاتەردىڭ كىلتىن تابىس ەتتى.
بۇدان كەيىن ساحنا تورىنە ۇلى وتان سوعىسىنىڭ جانە قارۋلى كۇشتەردىڭ ارداگەرى, وتستاۆكاداعى پولكوۆنيك نيكولاي پاستۋحوۆ كوتەرىلىپ, جاس ءارىپتەسىن جوعارى ناگراداسىمەن قۇتتىقتادى.
قايرات ءابىلدينوۆ,
«ەگەمەن قازاقستان»
قاراعاندى