پارلامەنت سەناتىنىڭ توراعاسى قاسىم-جومارت توقاەۆ وسى كۇندەرى قازاقستاندا رەسمي ساپارمەن جۇرگەن رەسەي فەدەراتسياسى فەدەرالدىق جينالىسى فەدەراتسيا كەڭەسىنىڭ ءتورايىمى ۆالەنتينا ماتۆيەنكومەن كەلىسسوز جۇرگىزدى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.
كەلىسسوز كەزىندە قازاقستان مەن رەسەي قارىم-قاتىناستارىنىڭ وزەكتى ماسەلەلەرى, ەۋرازيالىق ىقپالداستىقتى دامىتۋ جانە الەمدەگى قازىرگى احۋال جايى تالقىلاندى. جۇزدەسۋشىلەر قازاقستانداعى جانە رەسەيدەگى رەفورمالاردى زاڭنامالىق تۇرعىدا قولداۋ, ەكونوميكاداعى داعدارىستى جاعدايلاردى ەڭسەرۋ, سونىمەن قاتار, شەكارا ماڭىنداعى ىنتىماقتاستىقتى ورىستەتۋ ءماسەلەلەرى بويىنشا پىكىر الماستى.
ق.توقاەۆتىڭ پىكىرىنشە, قازاقستان مەن رەسەي سياقتى ەتەنە جاقىن ەلدەر ءۇشىن زاڭ شىعارۋشى ورگانداردىڭ توراعالارى دەڭگەيىندە ۇدايى پىكىر الماسىپ, كەڭەسىپ وتىرۋ اسا ماڭىزدى. بۇل, اسىرەسە, قازىرگى الەمدەگى كۇردەلى جاعدايدا وتە قاجەت. وسى ورايدا, ەكى ەل اراسىنداعى ستراتەگيالىق ارىپتەستىكتىڭ پارلامەنتتىك ولشەمى ايرىقشا ءرول اتقارادى, دەدى سەنات توراعاسى.
ق.توقاەۆ, سونىمەن قاتار, قازاقستان مەن رەسەي ءوزارا ءتيىمدى ىنتىماقتاستىق, ادامدار اراسىنداعى دوستىق بايلانىستار, سونداي-اق, ايماقتىق قاۋىپسىزدىك پەن ەكونوميكالىق ىقپالداستىقتى دامىتۋعا بار كۇش-جىگەرىن سالىپ وتىرعان ستراتەگيالىق ءارىپتەستەر ءارى وداقتاستار ەكەنىن اتاپ ءوتتى. سەنات توراعاسىنىڭ پىكىرىنشە, ەكى مەملەكەت باسشىلارى ن.ءا.نازارباەۆ پەن ۆ.ۆ.پۋتين قول قويعان جانە ەكى ەلدىڭ پارلامەنتتەرى راتيفيكاتسيالاعان ءححى عاسىرداعى تاتۋ كورشىلەستىك جانە وداقتاستىق تۋرالى شارت سونىڭ بەرىك نەگىزى بولىپ تابىلادى.
كەلىسسوزدەن كەيىن رەسەي فەدەراتسيا كەڭەسىنىڭ ءتورايىمى قازاقستان سەناتى دەپۋتاتتارىنىڭ الدىندا ءسوز سويلەدى. ۆ.ماتۆيەنكو ءسوزىنىڭ باسىندا قازاقستاندىق ارىپتەستەرىن قازاقستان پارلامەنتى ءماجىلىسى سايلاۋىنىڭ تابىستى وتۋىمەن قۇتتىقتادى. ول «سايلاۋ ناتيجەسى ىنتىماقتاس قازاقستاننىڭ تۇراقتىلىعى مەن وركەندەۋىنە, پرەزيدەنت نۇرسۇلتان ءابىش ۇلى نازارباەۆ باستاماشى بولعان ەكونوميكالىق رەفورمالاردىڭ جالعاسۋىنا جاردەمدەسەتىنىنە» سەنىم ءبىلدىردى.
رەسەي پارلامەنتى جوعارعى پالاتاسى ءتورايىمىنىڭ پىكىرىنشە, كەيىنگى جىلداردا ەۋرازيالىق ەكونوميكالىق وداق قىزمەتىنىڭ باستالۋى رەسەي مەن قازاقستان قاتىناستارىنداعى باستى وقيعا بولىپ وتىر, ونى قۇرۋ تۋرالى شارتقا استانادا قول قويىلعان بولاتىن. ۆ.ماتۆيەنكو: «سوڭعى ون جىلدىقتا تمد جانە ءتىپتى كۇللى ەۋرازيا كەڭىستىگىندە ەاەو ەڭ اۋقىمدى ىقپالداستىق جوباسى بولدى», دەپ اتاپ ءوتتى.
ونىڭ سوزىندە حالىقارالىق جانە ايماقتىق نەگىزگى ماسەلەلەر بويىنشا ەكى ەل ۇستانىمدارىنىڭ ۇقساستىعى نەمەسە جاقىندىعى حالىقارالىق ارەناداعى اۋقىمدى ىنتىماقتاستىق ءۇشىن شىنايى نەگىز جاسايتىنى كولدەنەڭ تارتىلدى.
ۆ. ماتۆيەنكو ايماقتىق جانە ايماقارالىق ىقپالداستىق جوبالارىن ۇشتاستىرۋ ۇدەرىستەرىن قولداۋ, سونداي-اق, تەڭ قۇقىقتىلىق قاعيداتتارى مەن ءوزارا مۇددەلەردى ەسكەرۋگە نەگىزدەلگەن قاجەتتى قۇقىقتىق بازانى قالىپتاستىرۋ ءۇشىن رەسەي مەن قازاقستاننىڭ, ەۋرازيانىڭ باسقا ەلدەرىنىڭ زاڭ شىعارۋ ورگاندارى كوپتەگەن ىستەردى اتقارا الاتىنىنا سەنىم ءبىلدىردى.
«زاڭ شىعارۋ جۇمىستارىمىزدا, پارلامەنتارالىق ىنتىماقتاستىقتى دامىتۋدا بىزگە ادامداردىڭ مۇددەلەرىن, رەسەي مەن قازاقستان ازاماتتارىنىڭ مۇددەلەرىن ءبىرىنشى ورىنعا قويۋ كەرەك, – دەدى فەدەراتسيا كەڭەسىنىڭ باسشىسى. – تەك سولاردىڭ باعاسى عانا ءبارىمىزدىڭ قىزمەتىمىزدىڭ ءتيىمدىلىگىنىڭ كورىنىسى بولىپ تابىلماق».
ۆ.ماتۆيەنكو رەسەي پارلامەنتشىلەرىنىڭ استانادا 31 مامىردا وتەتىن «دىندەر تەرروريزمگە قارسى» حالىقارالىق كونفەرەنتسياسىنا قاتىسۋ جوسپارى تۋرالى دا حابارلادى.
ۆالەنتينا ماتۆيەنكو قازاقستان رەسپۋبليكاسى پارلامەنتى سەناتىنىڭ دەپۋتاتى قايرات يششانوۆقا «سوۆەت فەدەراتسي. حح لەت» ەستەلىك مەدالىن تابىس ەتتى. ول كوپ جىلعى جانە جەمىستى ەڭبەگى ءۇشىن ماراپاتقا يە بولدى.