پارلامەنت ءماجىلىسىنىڭ توراعاسى باقتىقوجا ءىزمۇحامبەتوۆ ەل پارلامەنتى سەناتىنىڭ شاقىرۋى بويىنشا قازاقستانعا رەسمي ساپارمەن كەلگەن رەسەي فەدەراتسياسى فەدەرالدىق جينالىسى فەدەراتسيا كەڭەسىنىڭ ءتورايىمى ۆالەنتينا ماتۆيەنكو باستاعان دەلەگاتسيامەن كەزدەستى, دەپ حابارلادى ءماجىلىستىڭ ءباسپاسوز قىزمەتى.
تاراپتار ەكى مەملەكەت پرەزيدەنتتەرىنىڭ ساليقالى ساياساتىنىڭ ارقاسىندا قارقىندى دامىپ كەلە جاتقان قازاقستان مەن رەسەي اراسىنداعى ستراتەگيالىق ارىپتەستىك جايىنا ايرىقشا نازار اۋداردى. كەزدەسۋ بارىسىندا ەۋرازيالىق ەكونوميكالىق وداق ماسەلەسى اڭگىمە وزەگىنە اينالدى.
ءماجىلىس توراعاسى قازاقستاننىڭ وسى جىلى ەاەو-عا توراعالىق ەتەتىنىن العا تارتىپ, قازاقستان پرەزيدەنتىنىڭ 2016 جىلدى «ەاەو-نىڭ ءۇشىنشى ەلدەرمەن جانە ماڭىزدى ينتەگراتسيالىق بىرلەستىكتەرمەن ەكونوميكالىق قاتىناستاردى تەرەڭدەتۋ جىلى» دەپ جاريالاۋ ۇسىنىسىن جەتكىزدى.
ءوز كەزەگىندە ۆ.ماتۆيەنكو ەلباسى نۇرسۇلتان نازارباەۆتىڭ باستاماشىلىعىمەن قۇرىلعان ەۋرازيالىق ەكونوميكالىق وداق باعىتىندا رەسەيدىڭ قازاقستانمەن تولىقتاي نيەتتەس ەكەندىگىن, ەكونوميكالىق بايلانىستى تەرەڭدەتۋ جىلى رەتىندەگى ۇسىنىس ىنتىماقتاستىقتى كۇشەيتكىسى كەلەتىن ەلدەرگە دەر كەزىندە جاسالعان بەلگى ەكەندىگىن ايتتى. جانە دە مارتەبەلى مەيمان ءبىزدىڭ ەلىمىزدىڭ توراعالىعى اتالعان وداق جۇمىسىنا تىڭ سەرپىن بەرەتىندىگىنە سەنىمدى.
سونىمەن قاتار, حالىقارالىق پارلامەنتارالىق بايلانىس جايى دا تاراپتار نازارىنان تىس قالمادى. وسى رەتتە تمد پارلامەنتارالىق اسسامبلەياسىنىڭ ەلدەر اراسىنداعى مودەلدىك زاڭداردى ۇيلەستىرۋدەگى ماڭىزىن ءسوز ەتكەن ۆ.ماتۆيەنكو وسى جولدا قازاقستان پارلامەنتى دەپۋتاتتارىنىڭ دا ۇلەسى زور ەكەندىگىن, بۇل جۇمىستى ودان ءارى بەلسەندى جالعاستىرۋ كەرەكتىگىن ايتتى.
ال پارلامەنتارالىق ىقپالداستىق جايىنا كەلسەك, ماجىلىستە رەسەي فەدەراتسياسىمەن ىنتىماقتاستىق جونىندەگى توپ, سونداي-اق, رەسەي فەدەراتسياسى فەدەرالدىق جينالىسى مەملەكەتتىك دۋماسىمەن پالاتاارالىق پارلامەنتتىك كوميسسيا جۇمىس ىستەيدى.