پەتروپاۆل. 11 مامىر. پولشا رەسپۋبليكاسى سەناتىنىڭ توراعاسى ستانيسلاۆ كارچەۆسكي باستاعان دەلەگاتسيا قىزىلجار وڭىرىندە بولىپ, بىرقاتار كەزدەسۋلەر وتكىزدى. بۇل تۋرالى وبلىس اكىمدىگىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
شەتەلدىك مەيماندار تايىنشا اۋدانىنا قاراستى وزەرنوە, كەللەروۆكا, ياسنايا پوليانا ەلدى مەكەندەرىنىڭ تۇرعىندارىمەن جۇزدەستى. وسىندا ايماق باسشىسى ەرىك سۇلتانوۆ پەن ستانيسلاۆ كارچەۆسكيدىڭ كەزدەسۋى ءوتتى. جيىنعا پولياك دياسپوراسى قاتىستى.
«وڭىردە 90-نان استام ەتنوس وكىلدەرى تۇرادى. تايىنشا اۋدانىندا پولياكتار كوپ شوعىرلانعان. ولار سوعىس جىلدارى تۋعان جەرىنەن امالسىز جەر اۋدارىلىپ, وسىندا تۇراقتاپ قالعان پولياكتاردىڭ ۇرپاقتارى سانالادى. اۋداندا ەتنومادەني بىرلەستىك جۇمىس ىستەيدى. 9 مەكتەپتە پولياك ءتىلى ۇيرەتىلەدى. سوڭعى جىلدارى ايماقتىڭ پولشا ەلىمەن ەكونوميكالىق بايلانىسى نىعايىپ كەلەدى», – دەدى وبلىس اكىمى.
ستانيسلاۆ كارچەۆسكي ءوز سوزىندە ەكى ەل اراسىنداعى دوستىق قارىم-قاتىناستىڭ ودان ءارى دامي تۇسەرىنە كامىل سەنىم ءبىلدىرىپ, قازاقستاندا قابىلدانعان رەفورمالاردىڭ زور قارقىنمەن اتقارىلىپ جاتقانىن اتاپ ءوتتى.
كەزدەسۋدە «تايىنشا استىق» جاۋاپكەرشىلىگى شەكتەۋلى سەرىكتەستىگىنىڭ ديرەكتورى اناتولي رافالسكي, كەللەروۆكا اۋىلىنىڭ تۇرعىنى گالينا سوسنوۆسكايا دوستىققا, ءوزارا تۇسىنىستىككە قۇرىلعان ەلدە تۇراتىندارىن ماقتان ەتەتىندەرىن جەتكىزدى.
مۇنان كەيىن دەلەگاتسيا ياسنايا پولياناداعى مۇراجايدا, وزەرنوەدەگى كوستەل مەن موناستىردا بولدى. كەللەروۆكاداعى بالاباقشاعا سىيلىقتار تابىستادى.
ءومىر ەسقالي.
دەرەك, فوتو: سولتۇستىك قازاقستان وبلىسى اكىمدىگىنىڭ ءباسپاسوز قىزمەتى.