الماتى. 10 مامىر. الماتى قالاسىنداعى «يۋبيلەينىي» سۋپەرماركەتى جايلاسقان جەتى قاباتتى تۇرعىن ءۇيدى شارپىعان ورتتەن زارداپ شەگۋشىلەرمەن قالا اكىمى باۋىرجان بايبەك كەزدەستى. بۇل تۋرالى قالا اكىمدىگى ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
قالا اكىمى ۋاقىتشا قۇرىلعان «پالاتكالى قالاشىقتا» قونىستانعان تۇرعىنداردىڭ حال-جاعدايلارىمەن تانىسىپ, ءورت زاردابىنىڭ ءۇش كۇن ىشىندە تولىقتاي جويىلاتىنىنا ۋادە بەردى.وتتىڭ ۇشقىنى تيگەن بارلىعى 46 پاتەر يەلەرىنىڭ تالاپتارى تولىقتاي قامتاماسىز ەتىلەتىنىنە سەندىردى.
قازىر ءۇش مەردىگەر مەكەمە تۇرعىن ۇيلەردى باستاپقى قالپىنا كەلتىرۋ ماسەلەسىمەن اينالىسىپ جاتىر. قالانىڭ المالى اۋدانى اكىمدىگىنىڭ جانىنان قۇرىلعان ارناۋلى كوميسسيا ورتتەن كەلگەن شىعىننىڭ سوماسىن انىقتاپ تا قويدى.
ايتا كەتەيىك, بۇگىن تاڭەرتەڭ الماتىداعى ابىلاي حان مەن گوگول كوشەسىنىڭ قيىلىسىنداعى جەتى قاباتتى تۇرعىن ءۇيدىڭ ءبىرىنشى قاباتىنا جاپسارلاسىپ سالىنعان «كوروۆا بار» ءدامحاناسىندا ءورت شىعىپ, جەدەل ارادا توسىن اپاتتان 7 ادام قۇتقارىلىپ, 120 ادام قاۋىپسىز جەرگە جەتكىزىلگەن بولاتىن. ولاردىڭ ىشىندە ءۇش بالا بار. گازعا ۋلانعان ءبىر ادام اۋرۋحاناعا جاتقىزىلدى. وزگە زارداپ شەككەندەر جوق.
ءتىلسىز جاۋدى جويۋعا قالالىق توتەنشە جاعدايلار دەپارتامەنتىنىڭ ءورت ءسوندىرۋ قىزمەتىنەن 115 ادام, 21 ارنايى تەحنيكا, پوليتسيا قىزمەتكەرلەرى, جەدەل جاردەم دارىگەرلەرى, كوممۋنالدىق قىزمەت ماماندارى جۇمىلدىرىلدى. اۋماعى 1100 شارشى مەتردى شارپىعان قىزىل جالىن ءبىر ساعاتتىڭ اينالاسىندا تولىقتاي اۋىزدىقتالدى.
قازىر تەرگەۋ ورىندارى ءورتتىڭ شىعۋ سەبەپ-سالدارىن انىقتاۋ ۇستىندە.
تالعات ءسۇيىنباي.
دەرەك: الماتى قالاسى اكىمدىگىنىڭ ءباسپاسوز قىزمەتى.
فوتو: يۋري بەككەر.