استانا. 10 مامىر. بۇگىن فۋتبولدان قازاقستان پرەمەر-ليگاسىنىڭ 10-تۋرىنىڭ سوڭعى ءۇش ويىنى وينالدى. بۇل تۋرالى egemen.kz ءتىلشىسى حابارلادى.
«استانا» (استانا) – «اقجايىق» (ورال) 2:0
گولدار: تاڭات نوسەرباەۆ 45, پاتريك تۆۋماسي 48.
«استانا» ءوز الاڭىندا ورالدىڭ «اقجايىعىن» قابىلداپ, 2:0 ەسەبىمەن جەڭىسكە جەتتى. ناتيجەسىندە قايتادان تۋرنير كەستەسىندە ءبىرىنشى ورىنعا جايعاستى. العاشقى تايمنىڭ سوڭىندا, ياعني, 45-مينۋتتا ەلوردالىقتاردىڭ كاپيتانى تاڭات نوسەرباەۆ بۇرىشتان اسىرىلعان دوپتى قاقپاعا ءدال باعىتتاپ, ەسەپ اشقان بولاتىن. ال ەكىنشى تايمنىڭ باسىندا, ناقتى ايتقاندا, 48-مينۋتتا پاتريك تۆۋماسي ەكى بىردەي قورعاۋشىنىڭ ورتاسىنان سىتىلىپ شىعىپ, ادەمى گولدىڭ اۆتورى اتاندى. وسىلايشا, ستانيمير ستويلوۆتىڭ شاكىرتتەرى بيىلعى ماۋسىمداعى 9-جەڭىستەرىنە قول جەتكىزدى.
«توبىل» (قوستاناي) – «قايرات» (الماتى) 1:2
گولدار: توماش شيمكوۆيچ 8 (پەنالتي) – جەرار گوۋ 13, 56.
قوستانايدا وتكەن جەرگىلىكتى «توبىل» مەن الماتىنىڭ «قايراتى» اراسىنداعى كەزدەسۋ دە تارتىسقا تولى بولدى. ويىننىڭ بار بولعانى 8-مينۋتىندا الاڭ يەلەرى ساپىنان توماش شيمكوۆيچ پەنالتيدەن ەسەپ اشىپ, كومانداسىن العا شىعاردى. الايدا, «قايراتتىڭ» وتكەن ماۋسىمداعى ۇزدىك مەرگەنى جەرار گوۋ 13 جانە 56-مينۋتتاردا ەكى بىردەي ناتيجەلى سوققى جاساپ, ءدۋبلدىڭ اۆتورى اتاندى. وسىلايشا, الماتىلىقتار ماۋسىمداعى 4-جەڭىستەرىن تويلادى.
«جەتىسۋ» (تالدىقورعان) – «وقجەتپەس» (كوكشەتاۋ) 1:4
گولدار: ماركو سيمونوۆسكي 78 – مارات حايرۋللين 2, 90+4, سەرج سرەپين 32, جاسۇلان مولداقاراەۆ 59.
«جەتىسۋ» – «وقجەتپەس» ماتچى دا تۋردىڭ تارتىستى ويىندارىنىڭ ءبىرى بولعانى ءسوزسىز. ازىرگە ماۋسىمنىڭ باستى جاڭالىعى بولىپ تۇرعان كوكشەتاۋلىقتار قارسىلاستارىن 4:1 ەسەبىمەن جەڭىپ, قايتادان تۋرنير كەستەسىندەگى ۇزدىك ۇشتىكتىڭ قاتارىنا قوسىلدى. كەزدەسۋدە كوكشەتاۋلىقتاردان مارات حايرۋللين ەكى مارتە جانە سەرج سرەپين مەن جاسۇلان مولداقاراەۆ ءبىر-بىردەن مەرگەندىكتەرىمەن كوزگە ءتۇستى. ال تالدىقورعاندىقتار ساپىنان ماركو سيمونوۆسكيدىڭ مەرەيى ۇستەم بولدى.
ايتا كەتەيىك, كەشە پرەمەر-ليگانىڭ 10-تۋرى اياسىندا ءۇش كەزدەسۋ ءوتتى. ول ويىنداردىڭ ناتيجەلەرى تۋرالى مىنا جەردەن وقي الاسىزدار.
10-تۋر ويىندارىنىڭ قورىتىندىسى بويىنشا تۋرنير كەستەسى
ۇزدىك مەرگەندەر:
رومان مۇرتازاەۆ («ەرتىس») – 7 گول;
گوگيتا گوگۋا («ەرتىس») – 4 گول;
ازات نۇرعاليەۆ («ورداباسى») – 4 گول,
جەرار گوۋ («قايرات») – 4 گول.
11-تۋر ويىندارى 14-15 مامىر كۇندەرى وينالادى. اتالعان تۋرداعى قارسىلاستار رەتى تومەندەگىدەي:
14 مامىر
«تاراز» – «ورداباسى»
«شاحتەر» – «اقتوبە»
15 مامىر
«اقجايىق» – «جەتىسۋ»
«اتىراۋ» – «استانا»
«قايرات» – «ەرتىس»
«وقجەتپەس» – «توبىل».
ەلامان قوڭىر.
دەرەك: egemen.kz.
فوتو: vk.com.