قوستاناي. 10 مامىر. سوناۋ ەۋروپاداعى سلوۆاكيادادان «ەگەمەننىڭ» تىلشىلەر قوسىنىنا حابار كەلدى. براتيسلاۆا قالاسىنداعى يا.كومەنسكي اتىنداعى ۋنيۆەرسيتەتتە بىلىكتىلىگىن كوتەرۋ كۋرسىندا وقىپ جاتقان ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى شەت تىلدەر كافەدراسىنىڭ دوتسەنتى, فيلولوگيا عىلىمدارىنىڭ كانديداتى مەڭزادا سامەمبەت جەڭىس كۇنى باۋىرلاستار زيراتىنا بارىپ, قازاق جاۋىنگەرلەرىنىڭ باسىنا گۇل شوقتارىن قويىپتى. ۇستاز بۇل جونىندە «ەگەمەننىڭ» وقىرماندارىنا جەتكىزۋىمىزدى ءوتىنىپتى. بۇل تۋرالى egemen.kz ءتىلشىسى حابارلادى.
مەڭزادا سامەمبەت رەداكتسياعا براتيسلاۆا قالاسىنداعى باۋىرلاستار زيراتىندا تۇسىرگەن سۋرەتتەرىن قوسا جىبەرىپتى. ول ارالاپ ءجۇرىپ, الدىمەن كىشى لەيتەنانت ك.ا. اكيمبەكوۆ دەگەن جاۋىنگەرگە قويىلعان ەسكەرتكىش تاستى تابادى. ونان كەيىن تاعى دا لەيتەنانت نۇرالىم سىبانكۋلوۆ جانە ءابىش ۇلى سەيتجان دەگەن ەكى جاۋىنگەرگە قويىلعان بەلگىنى تاۋىپ, ولاردىڭ باسىنا گۇل شوقتارىن قويىپتى. بەلگى تاستا ۇشەۋىنىڭ دە 1945 جىلى قازا بولعانى جازىلعان. ءابىش ۇلى سەيتجان ۇرپاقتارىنىڭ اتاسىنىڭ باسىنا بارىپ, بەلگى قويعانى كورىنىپ تۇر.
مەڭزادا سامەمبەت: «مەن مەرەكەدەن بۇرىن ءوزىم بارعاندا ك.ا.اكيمبەكوۆ دەگەن لەيتەنانتتىڭ باسىنا قويعان كورىپ, گۇل قويىپ كەتكەنمىن. ودان كەيىن 9 مامىر كۇنى باۋىرلاستار زيراتى كەشەنىندە قالا باسشىلىعى وتكىزگەن مەرەكەلىك سالتاناتقا قاتىستىم. سول جەردە جەرلەنگەن تاعى دا ەكى جاۋىنگەردى تاۋىپ الدىم. باۋىرلاستار زيراتى كەشەنىن ارالاپ ءجۇرىپ, ميلوسلاۆا دەگەن جەرگىلىكتى سلوۆاك ايەلمەن تانىستىم. ول كىسى اكيمبەكوۆتىڭ زيراتىنا كەلىپ, گۇل قويىپ, كۇتىپ كەتەدى ەكەن. بۇل زيراتقا جىل سايىن رەسەيدەن, قازاقستاننان, تاعى باسقا ەلدەردەن وسىندا جاتقان جاۋىنگەرلەردىڭ تۋىستارى كەلىپ, تاعزىم ەتىپ, تاسىن جاڭارتىپ قويىپ كەتەدى. ميلوسلاۆانىڭ ايتۋىنشا, اكيمبەكوۆتى (اكىمبەكوۆ بولار) ىزدەپ كەلگەن ەشكىم بولماپتى. ءوزى دە شەتكەرىرەك, بۇرىشتا جاتىر. لەيتەنانتتىڭ وتە قىرشىن جاسىندا, 25 جاستا قازا تاپقانىن ونىڭ كورشىلەرى ايتىپتى. ولار اكىمبەكوۆتىڭ بەيىتىن كۇتىپ, گۇل قويىپ ءجۇرىپتى, قونىس اۋدارعاندا بۇل قايىرىمدى ءىسىن ميلوسلاۆاعا تاپسىرىپ كەتىپتى», – دەدى.
مەڭزادانىڭ ايتۋىنشا, ورىس تىلىندە ءتاپ-ءتاۋىر سويلەيتىن ميلوسلاۆا «اكىمبەكوۆتىڭ تۋعان-تۋىستارىنا قازاقستانعا بارعاندا سالەم ايتارسىز» دەگەن ءوتىنىشىن دە ايتىپتى. قازاق جاۋىنگەرىنىڭ بەيىتىن كۇتىپ جۇرگەن سلوۆاك ايەلىنىڭ يماندى ءىسى اركىمنىڭ جۇرەگىن تولقىتقانداي ەدى. بەيتشىلىك ءۇشىن قان توككەن جاۋىنگەرلەر رۋحى, ەرلىك داڭقى وشپەيدى.
ءنازيرا جارىمبەتوۆا.
دەرەك, فوتو: egemen.kz.