مايدانگەرلەرگە قۇرمەت

اقتوبەلىكتەر ۇلى جەڭىستىڭ 71 جىلدىعىن كەڭ كولەمدە اتاپ ءوتتى. مەرەكەلىك سالتا­نات­­تىڭ باستى شاراسى «ءماڭ­گى­لىك الاۋ» الاڭىندا ۇيىمداستىرىلدى. مۇندا سوعىس جانە ەڭبەك اردا­گەرلەرى, اقتوبەلىكتەر, قالاداعى ءاس­كەري بولىمدەردىڭ جانە كۇش قۇرى­لىمدارىنىڭ جەكە قۇرامدارى مەن تالعات بيگەلدينوۆ اتىنداعى اۋە كۇش­­تەرى اسكەري ينستيتۋتىنىڭ كۋر­سانت­تارى, جاستار جينالدى. وبلىس اكىمى بەردىبەك ساپارباەۆ ۇلى وتان سوعىسى جانە ەڭبەك اردا­گەر­­لەرىمەن جەكە-جەكە امان­داسىپ شىق­­تى, ۇلى جەڭىستىڭ 71 جىل­دىعى­مەن قۇتتىقتادى. – سوعىس قانشاما بوزداقتىڭ ءومى­رىن قيدى. وتان قورعاۋعا 122 430 جەرلەسىمىز قاتىسقان ەكەن. وسى قان-قاساپ مايدان دالاسىنان ورال­ماعانداردىڭ 38 مىڭى – اقتو­بە­لىك­تەر. ۇلى وتان سوعىسىندا 35 اقتو­بە­لىك كە­ڭەس وداعىنىڭ باتى­رى, 9 جەر­لەسىمىز «داڭق» ور­دەنى­نىڭ تو­لىق كاۆالەرى اتاندى. سىزدەردىڭ ەر­­لىك­تەرى­ڭىز بەن تىل­داعى ەڭ­بەك­تەرىڭىز كەيىن­گى ۇر­پاققا ونەگە. ءبىز سىزدەردىڭ الدارى­ڭىز­د­ا ءماڭ­گىلىك باسىمىزدى يەمىز, – دەدى بەردىبەك ماشبەك ۇلى. وبلىستىق ارداگەرلەر كەڭەسىنىڭ ءتور­اعاسى كەڭەس ءبىر­مانوۆ سوعىس اردا­گەرلەرىنىڭ ەل­باسى مەن ءوڭىر باس­شىسىنىڭ قام­قورلىعىنا الىنىپ, ۇدايى قول­داۋ كورسەتىلىپ وتىرعانىن جەت­كىزدى. شاراعا قاتىسۋ­شىلار قازا بولعان مايدانگەرلەردى ءبىر مينۋت ۇنسىزدىكپەن ەسكە الدى, ءۇش دۇركىن ساليۋت بەرىلدى. مەرەكەلىك سالتانات اقتوبەلىك ونەر شەبەرلەرىنىڭ مەرەكەلىك كون­تسەرتتىك باعدارلاماسىنا ۇلاستى. ساتىبالدى ءساۋىرباي, «ەگەمەن قازاقستان» اقتوبە