تەڭدەسى جوق قاھارماندىقتىڭ, ەرلىكتىڭ جانە بەيبىت تۇرمىس پەن وتاننىڭ بوستاندىعىن قورعاپ, حالقىمىزدىڭ رۋح كۇشىنىڭ سيمۆولىنا اينالعان ادامزات تاريحىنداعى ەڭ قانتوگىس سوعىستا 55 سولتۇستىكقازاقستاندىق كەڭەس وداعىنىڭ باتىرى, 11-ءى «داڭق» وردەنىنىڭ تولىق كاۆالەرى اتاندى. اتى اڭىزعا اينالعان 314-ءشى اتقىشتار ديۆيزياسى قىزىلجار وڭىرىندە قۇرىلىپ, 20-دان استام قالا مەن 1 مىڭعا جۋىق ەلدى مەكەندى جاۋدان ازات ەتتى.
ۇلى جەڭىس كۇنى سۇراپىل قان مايداندا وت كەشكەن كەشەگى جاۋىنگەرلەردىڭ – بۇگىنگى مايدانگەرلەردىڭ ەرلىك جولدارى وسكەلەڭ ۇرپاق ءۇشىن ۇلگى-ونەگە مەكتەبى, وتانعا دەگەن ادالدىقتىڭ ۇلگىسى رەتىندە ارداقتالىپ, لايىقتى ءتۇردە اتاپ ءوتىلدى. تەاتر الاڭىندا وتكەن ميتينگتە ايماق باسشىسى ەرىك سۇلتانوۆ ءسوز سويلەپ, سولتۇستىكقازاقستاندىقتاردىڭ ورتاق جەڭىسكە زور ۇلەس قوسقانىن, ءبۇگىنگى كۇنى بىرلىك پەن كەلىسىم باستى قۇندىلىعىمىز بولىپ تابىلاتىنىن كولدەنەڭ تارتتى. قالا جۇرتشىلىعىنىڭ قاتىسۋىمەن «جەڭىس» ستەللاسىنا, «ماڭگىلىك الاۋعا» گۇل شوقتارى قويىلىپ, ەل, جەر ءۇشىن جاندارىن پيدا ەتكەن بوزداقتاردىڭ رۋحى ەسكە الىندى.
ورتالىق الاڭدا «ەشكىم دە, ەشتەڭە دە ۇمىتىلمايدى» تاقىرىبىندا ۇيىمداستىرىلعان پاتريوتتىق كومپوزيتسيا مايدان دالاسىنا اتتانعان جاۋىنگەرلەردىڭ ەرلىكپەن ءورىلگەن ءومىرلەرىن كوز الدىمىزعا ەلەستەتىپ, پاتريوتتىق سەزىمدەرگە قوزعاۋ سالدى. سودان بەرى ارادا قانشاما جىل وتسە دە, جەڭىس داڭقى حالىق جادىنان ءوشپەيتىنىن, جۇرەكتەردە ماڭگىلىك ساقتالاتىنىن تاعى ءبىر ايعاقتاپ بەردى.
قالانىڭ باستى كوشەلەرىمەن موتوشەرۋ, اۆتوشەرۋ كولوننالارى ساپ تۇزەپ ءوتىپ, مەرەكە شىرايىن اشا تۇسسە, «ماڭگى ولمەس پولك» پارادىنا قاتىسۋشىلار قاتارى وتە قالىڭ بولدى. كونتسەرتتىك باعدارلاماعا ەتنومادەني بىرلەستىكتەر دە بەلسەنە قاتىسىپ, ءتۇرلى تىلدەردە جەڭىس ءاندەرىن اۋەلەتە شىرقادى.
جەڭىس مەرەكەسى تۇنگى وتشاشۋعا جالعاستى.
ءومىر ەسقالي,
«ەگەمەن قازاقستان»
پەتروپاۆل