ورتالىق الاڭداعى راديودان شىققان لەۆيتاننىڭ ءۇنى اۋىل شىرقىن ءبىر-اق كۇندە بۇزدى. سوعىس باستالعانىن ەستىگەن جۇرت شاڭ كوشەدە ءارى-بەرى سابىلىستى دا قالدى. ءار ۇيدەگى تەپسە تەمىر ۇزەتىن جىگىتتەر سوعىسقا اتتانا باستادى. بىرەۋ ءۇشىن اتپالداي ازامات بولعانىمەن, ولار اناسىنىڭ, اكەسىنىڭ باۋىر ەتى بالاسى ەدى.
وتان الدىنداعى بورىشىن وتەۋگە كۇرشىم اۋدانىنداعى, جولنۇسقاۋ اۋىلىنىڭ تۋماسى قۇسمان جونساعاتوۆ تا اتتاندى. اۋدان ورتالىعىنا قاراي كەيبىرەۋى ات اربامەن, ەندى ءبىرى جاياۋ-جالپى كەتىپ جاتتى. جىلدار وتە جاسى جەتكەندەردىڭ مايدان دالاسىنا اتتانىپ جاتۋى قالىپتى جاعدايعا اينالدى. ەلدىڭ دە ەتى ۇيرەندى. بىراق جارىسا ۇشقان قورعاسىن وق پەن سناريادتاردىڭ اراسىنان امان شىعۋ ءبىر اللانىڭ عانا قولىندا ەدى.
قۇسمان جونساعاتوۆ كۇرشىمنەن شاقىرىلىپ مايداننىڭ بەل ورتاسىنا تۇسەدى. گۆارديالىق ارتيللەريالىق پولكتە زەڭبىرەكشىلەر كومانديرى بولادى. كەسكىلەسكەن ۇرىستاردىڭ بىرىندە ستارشينا جونساعاتوۆ رەگيتتەن ايماعىندا ەكى پۋلەمەتتىڭ كوزىن جويادى. پۋلەمەتتەن قارشا بوراعان وق تولاستار ەمەس. كەڭەس اسكەرىنىڭ باس كوتەرۋگە مۇمكىندىكتەرى قالماي بارا جاتادى. سوندا امالى تاۋسىلعان قۇسمان جەر باۋىرلاپ بارىپ, جاۋعا كۇتپەگەن جەردەن وق اتادى. اتقان وعى پۋلەمەت تىزگىنىندەگى نەمىستى سۇلاتىپ تۇسىرەدى. ەندى ەكىنشى پۋلەمەتتەگى جاۋ اسكەرى قۇسمانعا باعىتتاپ وق جاۋدىرادى. ايلاسى اسقان ستارشينا ول پۋلەمەتتىڭ دە ءۇنىن وشىرەدى.
وسىدان كەيىن ەرلىگىن بايقاعان باسشىلىق قۇسمان جونساعاتوۆتى «قىزىل جۇلدىز» وردەنىمەن ماراپاتتايدى. كەيىننەن جاياۋ اسكەر لاتۆياداعى ايۆيەكستە وزەنىنەن وتكەن كەزدە اتقىشتار كومانديرى جونساعاتوۆ دۇشپاننىڭ مينومەتى مەن باقىلاۋ پۋنكتىن جويىپ جىبەرەدى. بۇل باتىلدىعى «ەرلىگى ءۇشىن» مەدالىنە لايىق دەپ تابىلادى.
شىعىس پرۋسسيا مايدانىندا, كەنيگسبەرگ قالاسىن جاۋدان ازات ەتۋگە قاتىسادى. 1945 جىلى III دارەجەلى «داڭق» وردەنىمەن ماراپاتتالعان. گۆارديا ستارشيناسى قۇسمان جونساعاتوۆ 1946 جىلى زاپاسقا شىعارىلعان. ارتىنداعى ۇرپاقتارى ول كىسىنىڭ ەرلىكتەرى جايلى رەسەيدىڭ «پودۆيگ نارودا» سايتىنان وقىپ بىلەدى.
سوۆەت ساليەۆ,
زايسان قالالىق اقساقالدار ۇيىمىنىڭ توراعاسى
شىعىس قازاقستان وبلىسى