قوستاناي. 9 مامىر. قوستانايدا اقىن اقىبەك شاياحمەتتىڭ ءبىر جىلدا قاتارىنان بىرنەشە كىتابى وقىرمانعا جول تارتتى. وسى كولەمدى جۇمىسىن اقىن شىعارماشىلىعىنىڭ 50 جىلدىعىنا ارنادى. بۇل تۋرالى egemen.kz ءتىلشىسى حابارلادى.
اقىن بيىلعى جىلى شىعارماشىلىق قىزمەتىنىڭ ەلۋ جىلدىعىن تويلاۋعا دايىندالۋدا. ونىڭ تىرناقالدى جىرلارى وسىدان ەلۋ جىل بۇرىن «قازاقستان پيونەرى» (قازىرگى «ۇلان») گازەتىندە جارىق كورگەن ەدى.
اقىلبەك شاياحمەت: «ال جاس اقىنداردىڭ جىرلارى توپتاستىرىلعان «كوكتەم تىنىسى» جيناعىندا:«ارام سوزدەر بەينە ءبىر كومىرتەگى, ادال سوزدەر – وتتەگى, سەمىرتەدى. جاقسى-جامان قاسيەت ارالاسقان سۋ سەكىلدى ەكەن عوي ءومىر, تەگى. وتكىر ءتىلدىڭ كەتپەيدى بەكەر ەمى, جىلى لەبىز كوڭىلدى كوتەرەدى. كەيبىرەۋلەر قاتتى ايتقان جالعىز سوزگە, عۇمىر بويى وكپەلەپ وتەر ەدى. بىرەۋلەرگە سوزدەر بار جاراسپايتىن, وت باسىنان سوزدەر بار ءارى اسپايتىن. ەل ىشىندە دۋالى اۋىزدار بار, سىرقاتىندى بويىڭنان الاستايتىن. ءۇمىت كۇتىپ وتىر-اۋ دالام مەنەن, اقىن بولىپ, الاۋلاپ, جانام دەپ ەم. تۋعان جەرىم, ەڭ اسىل, قاسيەتتى ساقتاپ ءجۇرمىن ءبىر ءسوزدى ساعان دەگەن» دەگەن جىرىم باسىلعان ەدى. سول ءسوزدىڭ قورىتىندىسى ىسپەتتەس «ءسوز» جيناعى بيىل الماتىداعى «ءداستۇر» باسپاسىنان جارىق كوردى», – دەدى.
«ءسوز» دەپ اتالاتىن جاڭا ولەڭدەر جيناعىنا ءار جىلدارى جازىلعان ولەڭدەر ەنگىزىلدى. ولاردىڭ تاقىرىبى سان الۋان. اۆتور تاۋەلسىزدىك جەمىستەرى تۋرالى تەبىرەنە جىرلاسا, ەل ىشىندەگى كەلەڭسىز كورىنىستەردى تىلگە تيەك ەتىپ, يماندىلىققا ۇندەيدى. ادامدار اراسىنداعى ادامگەرشىلىك پەن ارسىزدىق, پاراساتتىلىق پەن ناداندىق, جاقسىلىق پەن جاماندىق, دوستىق پەن قاسكويلىك, كىشىپەيىلدىلىك پەن وركوكىرەكتىك, ەڭبەكقورلىق پەن جالقاۋلىق, مارتتىك پەن نامارتتىق جانە باسقا جاقسى-جامان ادامي قاسيەتتەر پەن قاسىرەتتەر جايلى دارىندى اقىن تەبىرەنە قالام تەربەپ, وقىرماندارىن جاقسىدان ۇيرەنۋگە, جاماننان جيرەنۋگە شاقىرادى.
ال «گولوس ستەپي» جيناعى احمەت بايتۇرسىنوۆ اتىنداعى قمۋ پروفەسسورى يۋري بوندارەنكونىڭ العىسوزىمەن استانادا «فوليانت» باسپاسىنان جارىق كوردى. جيناقتا جازۋشىنىڭ حالقىمىزدىڭ دارا تۇلعالارى ىبىراي, شوقان, احمەت, ءىلياس وماروۆ تۋرالى درامالىق شىعارمالارىمەن قاتار ورىس تىلىنە اۋدارىلعان پروزالىق تۋىندىلارى مەن ولەڭ-جىرلارى بار.
اقىلبەك شاياحمەتتىڭ «كاسكالار مەن ماسكالار» دەپ اتالعان قوستانايداعى «قارلىعاش» باسپاسىنان جارىق كورگەن جاڭا كىتابىندا ونىڭ كەيىنگى جىلدارى جازعان پروزالىق شىعارمالارى مەن ماقالالارى, كوسەمسوزدەرى توپتاستىرىلعان. «اقىلبەك اقىن ايتقان ەكەن» دەگەن بولىمدە جازۋشىنىڭ ءار جەردە تابان استىندا ايتقان جولدارى جيناقتالىپ وتىر.
قوستانايداعى «باسپا ءۇيى» شىعارعان «نار قازاق – نامىسى بار قازاق» اتتى كىتابى توتە جازۋمەن باسىلعان. وعان جازۋشىنىڭ سوڭعى جىلدارى ءباسپاسوز بەتىندە جانە عالامتورداعى ءارتۇرلى سايتتاردا جارىق كورگەن تۋىندىلارى جيناقتالدى. جيناق شەت ەلدەردە تۇراتىن باۋىرلارىمىزعا ارنالعان.
اقىننىڭ درامالىق تۋىندىلارى دا كورەرمەندەر تاراپىنان جاقسى باعا الدى. ونىڭ كەزىندە «التىن» قالام» سىيلىعىنا يە بولعان, ۇلى اعارتۋشى ىبىراي التىنسارينگە ارنالعان «ىبىرايدىڭ وسيەتى» دراماسى (رەجيسسەرى ا.ليوپا) قوستانايداعى ورىس دراما تەاترىندا قويىلسا, «وكىنىش» دەپ اتالاتىن تراگيكومەدياسى (رەجيسسەرى ەرجان قاۋلانوۆ) ءىلياس وماروۆ اتىنداعى قوستاناي وبىستىق قازاق دراما تەاترىندا انشلاگپەن وتۋدە.
ءنازيرا جارىمبەتوۆا.
دەرەك, فوتو: egemen.kz.