مەملەكەت باسشىسى نۇرسۇلتان نازارباەۆ «شەۆرون» كومپانياسى ديرەكتورلار كەڭەسىنىڭ توراعاسى جانە باس اتقارۋشى ديرەكتورى دجون ۋوتسونمەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا قازاقستان مەن «شەۆرون» كومپانياسىنىڭ مۇناي جانە گاز سالاسىنداعى ىنتىماقتاستىعى, بىرلەسكەن جوبالاردى جۇزەگە اسىرۋ, سونداي-اق, كورپوراتسيانىڭ كەنىشتى يگەرۋگە قاتىسۋ اياسىن كەڭەيتۋ ماسەلەلەرى تالقىلاندى.
ەلباسى قازاقستان ءۇشىن «شەۆروننىڭ» ماڭىزدى سەرىكتەس ەكەنىن اتاپ ءوتتى.
– ءبىز ەتەنە جاقىن دوستارمىز. ىنتىماقتاستىعىمىز ءوزارا ءتيىمدى. ءسىزدىڭ كومپانيانى ءبىز باسقا مەردىگەرلەرگە ۇلگى ەتەمىز. قازىر كۇردەلى كەزەڭدى باستان وتكەرىپ جاتىرمىز. بۇرىن شيكىزات باعاسى تىم جوعارى بولعاندىقتان شالقىپ ءومىر سۇردىك. بۇگىندە باعا الدەقايدا كوڭىلگە قونىمدى. سوندىقتان, بىزگە جاڭا باعامەن جانە ۇلكەن ءوندىرىس كولەمىمەن ءومىر ءسۇرىپ ۇيرەنۋ كەرەك, – دەدى نۇرسۇلتان نازارباەۆ.
قازاقستان پرەزيدەنتى «شەۆرون» كومپانياسىنىڭ ەلىمىزدە قىزمەت جاساعالى بەرى بيۋدجەتكە 113 ميلليارد دوللار تولەگەنىنە, سونداي-اق الەۋمەتتىك ينفراقۇرىلىمدى جاقسارتۋعا باعىتتالعان بىرقاتار اۋقىمدى جوبالاردى جۇزەگە اسى-
رىپ جاتقانىنا نازار اۋداردى.
– «تەڭىزشەۆرويل» قىزمەتكەرلەرىنىڭ 85%-ى – قازاقستاندىقتار, بارلىق بۋىن باسشىلارىنىڭ 73%-ى – ەلىمىزدىڭ ازاماتتارى. بۇل – باسقا ينۆەستورلار ءۇشىن جاقسى ونەگە, – دەدى مەملەكەت باسشىسى.
دج.ۋوتسون ءوز سوزىندە ەلدەگى قولايلى ينۆەستيتسيالىق احۋالعا قولداۋ كورسەتكەنى جانە سالانى دامىتۋعا كوڭىل ءبولىپ وتىرعانى ءۇشىن نۇرسۇلتان نازارباەۆقا العىس ايتتى.
– مەن قورشاعان ورتانى قورعاۋ جانە وندىرىستەگى قاۋىپسىزدىك ماسەلەلەرىنە ءسىزدىڭ زور كوڭىل بولەتىنىڭىزدى بىلەمىن. ءبىزدىڭ كاسىپورىن وسى كورسەتكىشتەر بويىنشا الەمدەگى ۇزدىكتەردىڭ ءبىرى. بيىل ءبىز تەڭىز كەنىشىندە كۇردەلى جوندەۋ جۇرگىزەمىز, ودان كەيىن كۇكىرت قالدىعى قورشاعان ورتاعا تارالمايتىن بولادى, – دەدى «شەۆرون» كومپانياسىنىڭ باسشىسى.
دج.ۋوتسون قازاقستاندىق ءونىم ۇلەسىن ۇلعايتۋ كومپانيا قىزمەتىنىڭ باسىمدىعى بار باعىتى بولىپ قالا بەرەتىنىن, قازىرگى كەزدە ونىڭ كولەمى 20 ميلليارد دوللار بولىپ وتىرعانىن ايتتى.