كەشە ءماجىلىس سپيكەرى باقتىقوجا ىزمۇحامبەتوۆتىڭ توراعالىعىمەن ءماجىلىس بيۋروسى ءوتىپ, الداعى جالپى وتىرىستىڭ كۇن ءتارتىبى ناقتىلاندى, دەپ حابارلادى وسى پالاتانىڭ ءباسپاسوز قىزمەتى.
دەپۋتاتتار نازارىنا قازاقستان مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (ماكروەكونوميكالىق باسقارۋ جانە ەكونوميكانىڭ باسەكەگە قابىلەتتىلىگىن ارتتىرۋ سالاسىنداعى دامۋ ساياساتىن قارجىلاندىرۋ بويىنشا ءبىرىنشى كرەديت) راتيفيكاتسيالاۋ تۋرالى زاڭ جوباسى ۇسىنىلماق. بۇل زاڭ جوباسى قازاقستان ۇكىمەتىنىڭ ماكروەكونوميكالىق تۇراقتىلىقتى قامتاماسىز ەتۋ جانە ەلدىڭ ورنىقتى ەكونوميكالىق ءوسۋى ءۇشىن قاجەتتى جاعدايلار جاساۋ شارالارىن جۇزەگە اسىرۋ ماقساتىن كوزدەيدى.
سونىمەن قاتار, جالپى وتىرىستا 2014 جىلعى 23 جەلتوقسانداعى ەاەو شەڭبەرىندە دارىلىك زاتتاردىڭ جانە مەديتسينالىق بۇيىمدار (مەديتسينالىق ماقساتتاعى بۇيىمدار مەن مەديتسينالىق تەحنيكا) اينالىسىنىڭ بىرىڭعاي قاعيداتتارى مەن قاعيدالارى تۋرالى كەلىسىمگە ارمەنيا رەسپۋبليكاسىنىڭ قوسىلۋى تۋرالى حاتتامالاردى راتيفيكاتسيالاۋعا قاتىستى زاڭنامالىق قۇجاتتار جۇمىسقا قابىلدانادى دەپ كۇتىلۋدە.
وسى كۇنى قورعانىس جانە اسكەري قىزمەت, سونداي-اق, باسەكەلەستىك ماسەلەلەرى بويىنشا تۇزەتۋلەرگە بايلانىستى زاڭ جوبالارى جونىندە بەيىندى كوميتەتتەرگە قورىتىندى ازىرلەۋ مەرزىمى تاعايىندالاتىن بولادى.