«كومانديردى تاعايىنداۋ مۇمكىن ەمەس, كوماندير بولىپ تۋ كەرەك» دەگەن ءسوز بار. بۇل – اسىرا سويلەگەندىك ەمەس, بۇل – شىندىق. جاراتقان مۇنداي قاسيەتتى كەز كەلگەننىڭ ماڭدايىنا جازا سالماعان. مۇنى جوعارى كاسىبيلىك, تولايىم تاجىريبەمەن بايلانىستىرا سالۋ دا ازدىق ەتەتىندەي. قۇبىلىستىڭ استارىندا ادام بويىنداعى ادالدىق پەن اشىقتىق, ۇلىستى ءۇيىرىپ الار ۇستامدىلىق پەن كەڭ جۇرەكتىلىك جاتسا كەرەك. سوندىقتان دا كوشباسشىنىڭ بۇيرىعىنا كوزسىز باعىنۋدان گورى, وعان دەگەن سەنىم سەزىمى العا جەتەلەپ وتىرادى, جەڭىسكە جەتكىزەدى. اسكەردەگى اكەڭ دە, شەشەڭ دە سول. ءدال وسىنداي قاسيەتتى جانىنا قوندىرا بىلگەندەر – كوماندير.
جۇرەگى وتان دەپ جالىنداپ تۇراتىنداردىڭ ءبىرى – ۇلتتىق گۆارديانىڭ كوكشەتاۋداعى №5510 اسكەري ءبولىمىنىڭ كومانديرى, پودپولكوۆنيك جانبولات تولەگەنوۆ. ول 1978 جىلدىڭ 14 ناۋرىزىندا اقتوبە وبلىسىنىڭ بۇرىنعى لەنين اۋدانىنداعى قايراقتىساي اۋىلىندا, قاراپايىم وتباسىنىڭ شاڭىراعىندا تۋعان. ەڭبەكتىڭ مايىن جەپ, ەلگە سىيلى اتانعان اكە-شەشەسى جانبولات پەن ونىڭ باۋىرلارىنا وتاندى ءسۇيۋدىڭ قارىز-پارىزىن بارىنشا ءسىڭدىرىپ وسىرگەنى كورىنىپ تۇر. جانبولات وتەگەن ۇلى وزىمەن سويلەسكەنىمىزدە, بۇل سەزىمدەر ءومىرىنىڭ باستى ءمانى-ماعىناسى ەكەنىن ايتتى.
ج.تولەگەنوۆ 1995 جىلى ورتا مەكتەپتى ءبىتىرىپ, اۋىل ىشىندەگى جۇمىسقا ارالاستى. كەلەسى جىلى مىندەتتى اسكەري قىزمەتكە شاقىرىلعان. ازاماتتىق بورىشىن كوكشەتاۋداعى №5510 اسكەري بولىمدە وتەدى. مىنانى قاراڭىز, بۇگىنگى كۇنى ءوزى كوماندير بولىپ وتىرعان اسكەري ءبولىم. كەزدەيسوقتىق دەۋگە قيمايتىنداي جاعداي. ءدال وسى بولىمدە قاتارداعى جاۋىنگەردىڭ ومىرىندەگى بەتبۇرىستى كەزەڭ باستالعانى انىق. جاس ادامنىڭ بويىنداعى بۇرىننان بار قاسيەتتەردى تەربەتىپ, «سەن اسكەري ادامسىڭ» دەگەن سەزىمدى وياتىپ, سەنىمىنە سەرپىلىس قوسقان بۇل ءبولىم تەگىن بولماعانى.
مىندەتىن وتەپ, ءوزىنىڭ قاسيەتتى قايراقتىسايىنا كەلگەن ول اكەسىنىڭ باتاسىن الىپ, كوپ ۇزاماي پەتروپاۆلعا اتتاندى. مازداعان ماقسات, اسكەري ءبولىمنىڭ مىنەزدەمەسى دە سەپ بولعانداي, ول وسىنداعى قازاقستان رەسپۋبليكاسى ءىىم ىشكى اسكەرلەرىنىڭ اسكەري ۋچيليششەسىنە كۋرسانت بولىپ قابىلداندى. وقۋ ورنىن 2001 جىلى ۇزدىك بىتىرگەن ج.تولەگەنوۆ ەلىمىزدىڭ ءارتۇرلى ايماعىنداعى اسكەري بولىمدەردە ۆزۆود كومانديرىنەن اسكەري ءبولىم كومانديرىنە دەيىنگى قىزمەت ساتىلارىنان ءوتتى.
اسكەري ءومىردىڭ وڭاي ەمەستىگى بەلگىلى. جانبولاتتىڭ ءتوزىمدىلىگى, قاراۋىنداعى سولداتتار مەن وفيتسەرلەردىڭ جان-جۇرەگىن تۇيسىنە ءبىلۋى, قاتال دا بولسا ءادىل شەشىم قابىلداي الۋى, قويىلعان مىندەتتەردى ءمىنسىز اتقارۋعا جۇمىلدىرۋى ابىروي اۋىلىن جاقىنداتقانى انىق. مۇنداي جىگىتتەردىڭ ماقساتى دا بيىك بولادى. سونىڭ ءبىر ايعاعى – 2010 جىلى ۇلتتىق قورعانىس ۋنيۆەرسيتەتىن ءتامامداۋى دەر ەدىك.
پودپولكوۆنيك جانبولات وتەگەن ۇلىنىڭ باسشىلىعىنداعى №5510 اسكەري ءبولىم كوكشەتاۋلىقتاردىڭ كوز الدىندا ەلەۋلى وزگەرىسكە تۇسكەنىن ەكىنىڭ ءبىرى ايتادى. ونىڭ ىشكى اۋلاسى مەن كازارماسىنداعى جاعدايدىڭ قانداي ەكەندىگىن ءبولىمنىڭ اينالاسىنداعى مۇنتازداي تازالىقتان, جايقالىپ ءوسىپ كەلە جاتقان بالاۋسا اعاشتاردان, كوشەدە كەزدەسە قالعان وفيتسەرلەر مەن سولداتتاردىڭ ىزەتتىلىگىنەن دە بايقاۋعا بولادى. بۇرناعى جىلى اسكەري بولىمگە تۇرىك جاندارمەرياسىنىڭ جوعارى لاۋازىمدى قىزمەتكەرلەرى تاجىريبە الماسۋ ماقساتىمەن كەلگەنى, جاقسى لەبىزدەر بىلدىرگەنى ەسىمىزدە. مۇنى ەلىمىزگە كورسەتىلگەن قۇرمەت دەپ قابىلداعانىمىز ءجون.
باقبەرگەن امالبەك,
«ەگەمەن قازاقستان»
اقمولا وبلىسى