C.بەگالين اتىنداعى مەملەكەتتىك بالالار كىتاپحاناسىندا حالىقارالىق بالالار كىتابى كۇنىنە وراي قازاقستاندىق اۆتور جان ءامانيدىڭ «دانيالدىڭ عاجايىپ الەمى», «الۋان ءتۇستى بالىقتار جانە داريا» اتتى ەكى كىتابىنىڭ تۇساۋكەسەرى ءوتتى.
– بۇگىن بۇكىل الەم جۇرتشىلىعى بالالار ادەبيەتى كۇنىن اتاپ وتۋدە, – دەدى مەرەكەلىك شارانى اشقان كىتاپحانا باسشىسى ە.ا.فومچەنكو. – كىتاپحانا ۇجىمى دا وسى بۇكىلالەمدىك مەرەكەنى جىل سايىن اتاپ ءوتىپ كەلەدى. بالالارمەن بىرگە الەمدىك جانە وتاندىق بالالار ادەبيەتىندە بولىپ جاتقان ەلەۋلى جاڭالىقتارمەن تانىسىپ, جازۋشى, باسپاگەرلەرمەن كەزدەسۋ وتكىزىپ وتىرامىز. بۇگىنگى قوناعىمىز ەرەكشە. ول – بالالار جازۋشىسى جان اماني. جاس قالامگەر كىشكەنە بالاقايلارعا ۇلكەن بازارلىعىمەن كەلىپ وتىر.
وسىلايشا جازۋشىنى كوپشىلىككە تانىستىرعان باس كىتاپحاناشى سونداي-اق, بەلگىلى سۋرەتشىلەر ا.حاكىمجانوۆا مەن ا.ساستىڭ بىرەگەي سۋرەتتەرىمەن تارتىمدى بەزەندىرىلگەن كىتاپتارعا بالالاردىڭ قىزىعۋشىلىعىن ارتتىرسا, ءوز كەزەگىندە كىشكەنە وقىرماندار جازۋشى اپايلارىنا: «جازۋشىلىققا قالاي كەلدىڭىز؟», «جازۋشى بولۋ قيىن ەمەس پە؟», «قاي جانردا ەرتەگى جازعان ۇنايدى؟», «ەرتەگىلەردى قانشا ۋاقىتتا جازاسىز؟», «نەگە ەكى-اق كىتاپ, بولاشاقتا تاعى كىتاپتار شىعاراسىز با؟» دەگەن سارىندا ساۋالدار قويىپ, سۇراقتىڭ استىنا الدى.
جان اماني بولسا كىتاپتى شىعارۋعا ۇزاق ۋاقىت دايىندالعانىن, بالالاردىڭ جان-دۇنيەسىن ءتۇسىنىپ, ەرتەگى جازۋىنا نەگىزگى ماماندىعىنىڭ پسيحولوگ بولعاندىعى دا كوپ كومەگىن تيگىزگەنىن ايتتى. ال بولاشاقتا ءبىراز كىتاپتار شىعارۋ جوسپاردا بار ەكەن.
– وزدەرىڭىز كورىپ وتىرعانداي, مىنا ەكى كىتاپ ءۇش ءتىلدە شىقسا, كەيىنگىلەرىنە قىتاي, ءتۇرىك, نەمىس, وزبەك جانە تاعى باسقا تىلدەر قوسىلماق.ماقساتىمىز – وسىلايشا زاماناۋي الەمدىك ادەبيەتكە ۇلەسىمىزدى قوسۋ. بۇگىنگى كەزدەسۋ ماعان ۇلكەن شىعارماشىلىق شابىت سىيلادى. نەگىزگى وقىرمانىم – بالالاردىڭ شىنايى قىزىعۋشىلىعىن كورىپ, ءپىكىر الىسىپ, ۇسىنىس-تالاپتارىن تىڭداۋدىڭ ءوزى ەرەكشە عانيبەت, – دەپ تولقي ءسويلەگەن جازۋشى بالالارعا ارناپ اكەلگەن كىتاپتارى مەن ءتاتتى سىيلىقتارىن تارتۋ ەتتى. كىتاپحانا قورىنا دا كىتاپتار تاپسىرىلدى.
ادەبيەتكە زور دايىندىقپەن, ۇلكەن جاۋاپكەرشىلىكپەن كەلگەن جاس اۆتور ءوز تۋىندىلارىن قاعاز بەتىنە ءتۇسىرىپ, كىشكەنتاي وقىرماندارىنا ۇسىنۋ جولىندا ون جىلداي ەڭبەكتەنىپتى. ءۇش تىلدە (قازاقشا, ورىسشا, اعىلشىنشا) اۋديو نۇسقاسىمەن بىرگە شىققان كىتاپتاردىڭ سوڭعى بەتىنە ۇڭىلسەك, ەرتەگى كىتاپتاردى جارىققا شىعاراردا: رەداكتورلار, اۋدارماشىلار, ديزاينەر, سۋرەتشى, دۋبلياج رەجيسسەرى, دىبىس رەجيسسەرى, سازگەر, كوركەمدىك رەداكتور, دىبىستاعان ارتىستەرمەن قوسقاندا جالپى سانى جيىرما شاقتى مامان جۇمىس جاساعانىن كورەمىز. بۇل, ارينە, كىتاپتىڭ ساپالى شىعۋىنا سەپتىگىن تيگىزگەنى ءسوزسىز.
گۇلزەينەپ سادىرقىزى,
«ەگەمەن قازاقستان».
الماتى