قاراجال قايتىپ كۇن كورەر؟
قاراجال قالا ءمارتەبەسىن 1963 جىلى الدى. سول كەزدە قالادا جالعىز عانا بانك بولىمشەسى جۇمىس ىستەدى. ەل ەگەمەندىك العان تۇستا ول بتا بانكتىڭ ءبولىمشەسى بولىپ قايتا قۇرىلدى. كەيىننەن بۇل بانك ءبولىمشەسى جابىلىپ, ونىڭ ورنىنا «كازكوممەرتسبانك» اق-تىڭ ءبولىمشەسى اشىلىپ, جاعدايىمىز ءتىپتى دە جاقسارا ءتۇسكەن بولاتىن. قالا تۇرعىندارى جالاقىسىن, زەينەتاقىسىن, بالالاردىڭ جاردەماقىسىن, ۇلى وتان سوعىسىنىڭ ارداگەرلەرى مەن تىل ەڭبەككەرلەرى زەينەتاقىلارىن, «وركەن-اتاسۋ» تاۋ-كەن كومبيناتىنىڭ جۇمىسشىلارى ەڭبەكاقىلارىن وسى بانك ءبولىمشەسىنەن الىپ ءجۇر. بانك قىزمەتكەرلەرى جۇمىستارىنا تيياناقتى, كىشىپەيىل, ادەپتى. قاراجال تۇرعىندارى اتىنان العىستان باسقا ايتارىمىز جوق.
ەندى وسى «كازكوممەرتسبانك» اق بولىمشەسىن جوعارعى جاقتاعىلار «جابامىز» دەپ حابار جىبەرىپتى. بۇل قاراجال قالاسى حالقىنىڭ باسىنا جاي تۇسكەندەي اسەر ەتتى. نەگە دەسەڭىز, «كازكوممەرتسبانك» اق بولىمشەسىنەن نەسيە الدىق, بيزنەس سالاسىنداعى قىزمەتكەرلەردىڭ ەسەپشوتتارى بار, باسقا بانك جۇيەسىنە اقشا اۋدارادى, دەپوزيتتەرىمىز بار. بۇل بانك بولىمشەسى جابىلسا قاي بانككە بارامىز؟
قاراجال قالاسىندا ەكى بانك بولىمشەسى بار, ءبىرى – وسى «كازكوممەرتسبانك» اق, ەكىنشىسى «حالىق بانكى» اق. جيىرما مىڭعا جۋىق حالقى بار قاراجال قالاسىنا ءبىر بانك البەتتە ازدىق ەتەدى. كليەنتتەرىنە قىزمەت كورسەتىپ ۇلگەرە المايدى دەپ ويلايمىز. «كازكوممەرتسبانك» اق بولىمشەسىنەن العان نەسيەلەرىمىزدى قاي بانككە اپارىپ تولەيمىز, دەپوزيتتەرىمىزدى قايدا ساقتايمىز؟ وبلىس بويىنشا قاراجال ەڭ شالعايدا ورنالاسقان قالا – جەزقازعان قالاسى 300 شاقىرىم, قاراعاندى قالاسى بولسا 420 شاقىرىم قاشىقتىقتا. قازىرگى نارىق قىسىپ تۇرعان زاماندا قاراجال قالاسىندا تۇراتىن حالىقتىڭ جاعدايىن كىم ويلايدى؟ قاراجال قالاسىندا ورنالاسقان «كازكوممەرتسبانك» اق بولىمشەسىنىڭ جابىلماۋىنا كىم سەپتىگىن تيگىزە الار ەكەن؟ مۇنداعى ەلدىڭ جانايقايىنا قۇلاق سالار كىم بار-اۋ؟
اۋدانباي اسانباەۆ
قاراعاندى وبلىسى