ءماجىلىس سپيكەرى باقتىقوجا ىزمۇحامبەتوۆتىڭ توراعالىعىمەن ءماجىلىس بيۋروسى ءوتىپ, الداعى جالپى وتىرىستىڭ كۇن ءتارتىبى ناقتىلاندى, دەپ حابارلادى وسى پالاتانىڭ ءباسپاسوز قىزمەتى.
وندا 2006 جىلعى 15 تامىزداعى رەسەي مەن قازاقستان اۋماعىندا ورنالاسقان قوس مەملەكەتتىڭ تەمىرجول ۋچاسكەلەرى بويىنشا تاسىمالداۋ تولەمدەرىن تولەۋ جانە جۇك تاسىمالدارىن رەسىمدەۋ ءتارتىبى تۋرالى ۇكىمەتارالىق كەلىسىمدەرگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى زاڭ جوباسى تالقىعا سالىنباق.
2012 جىلى پاۆلوداردا جاسالعان حاتتاما ارقىلى بۇرىنعى كەلىسىمگە جۇكتەردى تاسىمالداۋ كەزىندە كەلىسىلگەن تاريفتىك ساياساتتى جۇرگىزۋگە جانە تاريفتەردى ەسەپتەۋدى ەكىۇداي ءتۇسىنۋگە جول بەرمەيتىن وزگەرىستەر ەنگىزىلمەك.
سونىمەن قاتار, جالپى وتىرىستا ءماجىلىس ساۋد ارابياسى كورولدىگىمەن تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى ۇكىمەتارالىق كونۆەنتسيانى جانە وعان حاتتامانى, سونىمەن قاتار, رەسەيمەن «بايقوڭىر» عارىش ايلاعىنان ۇشىرۋ كەزىندە زىمىران ۇشىرعىشتاردان بولىنەتىن بولىكتەردىڭ قۇلاۋ اۋدانى رەتىندە قازاقستان اۋماعىنداعى جەر ۋچاسكەسىن بەرۋ جانە پايدالانۋ شارتتارى تۋرالى ۇكىمەتارالىق كەلىسىمدى راتيفيكاتسيالاۋعا قاتىستى زاڭ جوبالارى جۇمىسقا قابىلدانادى دەپ كۇتىلۋدە.
بيۋرو وتىرىسىندا التىنشى سايلانعان پارلامەنت ءماجىلىسى مەن شەتەل پارلامەنتتەرى اراسىنداعى ىنتىماقتاستىق جونىندەگى توپتاردىڭ قۇرامى جانە پالاتا دەلەگاتسيالارىنىڭ حالىقارالىق پارلامەنتتىك ۇيىمدار مەن پارلامەنتارالىق بىرلەستىكتەردەگى قۇرامى ماسەلەلەرى دە نازاردان تىس قالعان جوق.