قوعام جۇمىلا ەڭبەك ەتىپ, بىرلىك پەن ىنتىماقتىڭ ارقاسىندا وزگەرەتىندىگى الىمساقتان ايان. بۇگىنگى كۇنى ەلىمىزدە كوپتەگەن جاستار ۇيىمدارى بەلسەندى جۇمىس اتقارىپ كەلەدى.
ماسەلەن, «نۇر وتان» پارتياسىنىڭ جانىنان قۇرىلعان «جاس وتان» جاستار قاناتى قوعامدىق-ساياسي جۇمىستاردىڭ كوشباسشىسى بولىپ, جاستاردىڭ بەلسەندىلىگىن ارتتىرۋعا اتسالىسىپ كەلە جاتسا, «جاسىل ەل» ەڭبەك جاساقتارى تازالىق, كوگالداندىرۋ جۇمىستارىنا جاردەم ەتە وتىرىپ, تابيعاتتى قورعاۋعا ۇلكەن ۇلەس قوسۋدا. ال قازاقستان ستۋدەنتتەر اليانسى, قازاقستان جاستار كونگرەسى ستۋدەنت جاستاردىڭ الەۋمەتتىك-ەكونوميكالىق, قۇقىقتىق جانە تۇرمىستىق ماسەلەلەرىن شەشۋدە جاستاردى قولداۋ جونىندەگى جوبالار ازىرلەپ, ولاردىڭ جۇزەگە اسۋىنا باستاماشى بولىپ وتىر.
ەندەشە, ەلىمىزدىڭ ەرتەڭىنە بەي-جاي قارامايتىن بەلسەندى جاستارى تاۋەلسىزدىكتىڭ 25 جىلدىق مەرەيتويى مەن الماتى قالاسىنىڭ 1000 جىلدىعىنا وراي «بولاشاعى جارقىن ماڭگىلىك ەلدىڭ جاستارى» دەگەن اتپەن رەسپۋبليكالىق پاتريوت جاستار فورۋمىندا باس قوستى. الماتى قالاسى جاستار ساياساتى باسقارماسى مەن قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ۇيىمداستىرۋىمەن وتكەن جاستار فورۋمىنا رەسپۋبليكانىڭ ءار وڭىرىنەن 100-دەن استام جاستار ۇيىمدارىنىڭ وكىلدەرى مەن جاستار ءىسى جونىندەگى كوميتەت توراعالارى, #G38 ۇيىمى, الماتى قالاسى ستۋدەنتتەر اليانسى, «جاسىل ەل» جاستار ەڭبەك جاساقتارى, قازاقستان حالقى اسسامبلەياسىنىڭ «جاراسىم» جاستار كاناتى, «الماتى ەرىكتىلەر ليگاسى», «سۇڭقار» ستۋدەنتتەر كاسىپوداعى قاتىستى.
– جاس كەلسە – ىسكە» دەيدى حالىق. مىڭجىلدىق تاريحى بار ارۋ الماتىنىڭ تورىندە ستۋدەنتتەردىڭ ءوزىن ءوزى باسقارۋ جۇمىستارىن جەتىلدىرۋگە ارنالعان ۇسىنىستارىن تالقىلاۋ ءۇشىن باس قوسىپ وتىرعاندارىڭىزعا قۋانىشتىمىن! ەلباسى ءوز جولداۋىندا «مەن جاستار – ءبىزدىڭ بولاشاعىمىزدىڭ تىرەگى دەگەندى اركەز ايتىپ كەلەمىن. مەملەكەت جاڭا بۋىننىڭ الدىندا بارلىق ەسىكتەر مەن جولداردى اشتى! «نۇرلى جول», مىنە, ءبىزدىڭ كرەاتيۆتى ىرعاقتى جاستارىمىزدىڭ كۇش-جىگەر جۇمساپ, قۇلاش سەرمەيتىن تۇسى وسى. سىزدەردىڭ جالىنداعان كۇش-قۋاتتارىڭىز بەن العىر ويلارىڭىز تىڭ جاڭالىقتى ەنگىزۋگە مۇمكىندىك بەرەدى. ەلباسى ايتقانداي, «تەرەڭ ءبىلىم – تاۋەلسىزدىگىمىزدىڭ تىرەگى, اقىل-وي – ازاتتىعىمىزدىڭ الداسپانى». ءبىلىمدەرىڭىز ساپالى, قابىلەتتەرىڭىز قارىمدى, پايىم-پاراساتتارىڭىز تەرەڭ بولسىن! ماڭگىلىك ەلدىڭ كوشىن باستايتىن دا, تۇزەيتىن دە, دامىعان ەلدەردىڭ دەڭگەيىنە جەتكىزەتىن دە – سىزدەرسىزدەر! – دەدى قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى دينار نوكەتاەۆا فورۋمنىڭ اشىلۋىندا.
الماتى قالاسى جاستار ساياساتى باسقارماسىنىڭ باسشىسى نۇرلان سىدىقوۆ ستۋدەنتتىك ءوزىن ءوزى باسقارۋ جۇيەسىن دامىتۋ باعىتىندا ۇيىمداستىرىلىپ وتىرعان باسقوسۋ ەڭ الدىمەن ءتاجىريبە الماسۋ ءۇشىن, اتقارىلعان جۇمىستاردى قورىتىندىلاپ, جوسپاردى ايقىنداپ الۋ ءۇشىن قاجەتتىگىن اتادى.
فورۋمنىڭ پلەنارلىق ءماجىلىسى تۇستەن كەيىن ستۋدەنتتىك ءوزىن ءوزى باسقارۋ ورگاندارى مەن ستۋدەنتتىك جاستار ۇيىمدارىنىڭ قىزمەتىنىڭ ءتيىمدىلىگىن اتتىرۋعا ارنالعان جيىنعا ۇلاستى. توپتىق ديسكۋسسيا تۇرىندە وتكەن جيىن سوڭىندا ۇسىنىستار مەن پىكىرلەر نەگىزىندە جاستار ۇيىمدارىنىڭ جۇمىسىن دامىتۋعا ارنالعان تۇجىرىمداما بەكىتىلدى.
ايناش ەسالي,
«ەگەمەن قازاقستان»
الماتى