بىرقاتار ءتارتىپ بۇزۋشىلىقتى انىقتادى
بۇرناعى كۇنى رەسپۋبليكالىق ەسەپ كوميتەتىندە «اقپاراتتى قازاقستان-2020» مەملەكەتتىك باعدارلاماسىنىڭ ىسكە اسىرىلۋ بارىسىنا وراي جۇرگىزىلگەن مەملەكەتتىك ءاۋديتتىڭ قورىتىندىلارى قارالدى. جيىنعا ينۆەستيتسيالار جانە دامۋ مينيسترلىگىنىڭ بايلانىس, اقپاراتتاندىرۋ جانە اقپارات كوميتەتىنەن, سونداي-اق, ءبىرقاتار ۆەدومستۆولىق مەكەمەلەردەن باسشىلار قاتىستى.
– مەملەكەتتىك باعدارلامانىڭ جۇزەگە اسىرىلۋ كەزەڭدەرىندە بايلانىس جانە اقپارات كوميتەتىنە بولىنگەن 145 ميلليون تەڭگەگە قاتىستى قارجى زاڭىن بۇزۋشىلىق ورىن الدى. قازىر مۇنىڭ 142 ميلليون تەڭگەسى قازىناعا قايتارىلدى. سونىمەن قاتار, مەملەكەت قارجىسىنان بولىنگەن 41 ميلليارد تەڭگەنىڭ 14,6 ميللياردى ءتيىمسىز پايدالانىلعان, – دەدى ەسەپ كوميتەتىنىڭ مۇشەسى ا. گورياينوۆ جيىندا.
كوميتەت مۇشەسى ءوز ءسوزىندە اۋديتتىك تەكسەرۋ اياسىنداعى قورىتىندىمەن عانا شەكتەلمەدى. ول, سونداي-اق, وتاندىق باق وكىلدەرى شەتەلدىك جۋرناليستەر سەكىلدى وقيعانى حالىققا دەر كەزىندە جەتكىزۋ جاعىنان كەم ءتۇسىپ جاتاتىنىنا جانە ەلىمىز تەلەارنالارىنىڭ رەيتينگىلەرى ءتۇسىپ كەتكەنىنە توقتالدى.
الايدا, «حابار» اق باسقارما ءتوراعاسى ايدوس ۇكىباەۆ بۇل پىكىرمەن كەلىسپەيتىنىن ءبىلدىردى.
– مۇمكىن ءبىز رەسەيلىك باق-تان تانىمدىق كونتەنت جاعىنان قالىپ كەلەرمىز, الايدا, اقپاراتتىق-يدەولوگيالىق جاعىنان ەشبىر ەسە جىبەرمەيمىز. مۇنى ساياسي ناۋقاندار ءناتيجەسىنەن بايقاۋعا بولادى, – دەدى ول. مۇنان كەيىن ينۆەستيتسيالار جانە دامۋ ۆيتسە-ءمينيسترى ساكەن سارسەنوۆ ءسوز الىپ, ەلىمىزدەگى اقپارات قۇرالدارىنىڭ اتقارىپ كەلە جاتقان جۇمىستارى جايىندا جان-جاقتى باياندادى. ال وتىرىستى قورىتىندىلاۋ بارىسىندا ەسەپ كوميتەت توراعاسى قوزى-كورپەش جاڭبىرشين وتاندىق باق جەتەكشىلەرىنە ىشكى اۋديت جانە زاڭ قىزمەتىنىڭ جۇمىستارىن جانداندىرۋدى ۇسىندى.
تالعات رايىمبەك,
«ەگەمەن قازاقستان»