جۋىردا استاناداعى ەلباسى كىتاپحاناسىندا 5-10 سىنىپ وقۋشىلارى اراسىنداعى قازاقستان تاريحىنان ءXى رەسپۋبليكالىق «تاريح اتا» قاشىقتىق وليمپياداسىنىڭ سالتاناتتى جابىلۋ ءراسىمى ءوتتى.
اتاپ ايتار بولساق, اتالمىش سايىسقا قازاقستاننىڭ بارلىق وڭىرىنەن 1624 وقۋشى قاتىستى. وليمپيادا قاشىقتىق جانە قورىتىندى ەكى كەزەڭ بويىنشا وتكىزىلدى. ناتيجەسىندە 148 جەڭىمپاز انىقتالىپ, قورىتىندى كەزەڭگە شاقىرىلدى. 5-10 سىنىپ وقۋشىلارى قازاقستان تاريحى بويىنشا تەست تاپسىرمالارىن ورىنداسا, 8-10 سىنىپ اراسىندا ەڭ جوعارى ۇپاي جيناعان قاتىسۋشىلار قازاقستان تاريحى بويىنشا وزەكتى تاقىرىپتارعا ەسسە جازدى.
وسى جىلعى وليمپيادانىڭ ءبىر ەرەكشەلىگى, قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىمەن ءبىرلەسىپ وتكىزىلۋىندە بولىپ وتىر. شاراعا قاتىسۋشىلار قازاقستان رەسپۋبليكاسىنىڭ پرەزيدەنتى, ۇلت كوشباسشىسى ن.ءا.نازارباەۆ تۋرالى دەرەكتى ءفيلمدى تاماشالادى. كىتاپحانانى ارالاپ, «الەمدى وزگەرتەتىن يدەيالار» ينتەراكتيۆتى ءبىلىم بەرۋ كەشەنى ارقىلى ەلباسىنىڭ يدەيالارىمەن جانە باستامالارىمەن جاقىنىراق تانىستى. سونىمەن قاتار, ءبىلىم جانە عىلىم مينيسترلىگى مەملەكەتتىك تاريح ينستيتۋتىنىڭ ديرەكتورى, تاريح عىلىمدارىنىڭ دوكتورى, پروفەسسور ب.اياعانمەن كەزدەستى.
شارا سوڭىندا وليمپيادانىڭ جەڭىمپاز جۇلدەگەرلەرى ءبىلىم جانە عىلىم مينيسترلىگىنىڭ «دارىن» رەسپۋبليكالىق عىلىمي-پراكتيكالىق ورتالىعىنىڭ I, II, III دارەجەلى ديپلوم, گراموتالارىمەن ماراپاتتالدى. سونىمەن قوسا, جەڭىمپاز وقۋشىلارعا «ويلار مەن جىلدار» جانە «ءبىزدىڭ پرەزيدەنت» اتتى تاعىلىمى مول كىتاپتار سىيعا تارتىلدى.
راۋشان تاۋىرحانقىزى,
«ەگەمەن قازاقستان»