ەۋرووداق تاعدىرى تالقىعا ءتۇستى
وتىرىستىڭ تىزگىنىن ۇستاعان مودەراتور, اقش-تىڭ «Riz Khan Productions» كومپانياسىنىڭ باسشىسى ريز حان قاتىسۋشىلار نازارىن تاياۋ شىعىس پەن افريكا ەلدەرىنەن بوسقىنداردىڭ اعىلۋىنا بايلانىستى جاعدايدىڭ شيەلەنىسكەنىنە, ۇلىبريتانيانىڭ ەۋرووداقتان شىعۋ مۇمكىندىگىنە جانە ەو-نىڭ ىدىراۋ قاۋپى تۋعانىنا اۋداردى. «راسىمەن, بۇگىندە ەۋرووداق جولايرىقتا تۇر. مۇشە ەلدەر ساياسي ينتەگراتسيادان باستاپ قارجى ىنتىماقتاستىعى, الەۋمەتتىك بىرىگۋگە دەيىنگى بارلىق ماسەلەلەر بويىنشا كەلىسىمگە كەلە الماۋدا. ەلدەر اراسىنداعى تەڭسىز شارتتار مەن قاراما-قايشىلىقتاردى ەسكەرسەك, ەۋروپالىق نارىققا قاۋىپ ءتونىپ تۇرعانىن اڭعارامىز. وسىعان بايلانىستى بريۋسسەل اتالعان ماسەلەلەردى شەشۋدە جالپىەۋروپالىق ساياسات قۇرۋعا تىرىسۋدا. الايدا, ناتيجە كوڭىل قۋانتپايدى. ۇلىبريتانيا پرەمەر-ءمينيسترى دەۆيد كەمەروننىڭ ايتۋىنشا, ۋاقىت وتكەن سايىن ەۋروپا ءوزىنىڭ باسەكەگە قابىلەتتىلىگىن جوعالتىپ بارادى. دەمەك, ەۋروينتەگراتسيانىڭ قازىرگى احۋالى, شىن مانىندە, الاڭدايتىنداي دەڭگەيدە», – دەدى ر.حان. ءوز كەزەگىندە ۇلىبريتانيانىڭ بۇرىنعى سىرتقى ىستەر ءمينيسترى دجەك سترو ەۋرووداقتىڭ شىن مانىندە اۋقىمدى ءارى ماقساتى ايقىن جوبا ەكەنىن ايتتى. ەكس-مينيستر ەو-نىڭ ونىڭ نەگىزىن قالاۋشىلار ويلاعاننان دا ارتىق جۇمىس ىستەگەنىنە توقتالىپ: «وداقتىڭ قۇرىلۋى ءساتتى جوبا بولدى. ول ەۋروپانىڭ وركەندەۋىنە, بەيبىتشىلىكتىڭ ساقتالۋىنا ايتارلىقتاي سەپتىگىن تيگىزدى. كەڭەس وداعى ىدىراعاننان كەيىن شىعىس ەۋروپا ەلدەرىندە دەموكراتيانىڭ ءساتتى قالىپتاسۋىنا ەۋرووداقتىڭ ىقپالى زور بولدى. سوعان قاراماستان, ۇلىبريتانيانىڭ ەۋروايماقتان شىعۋ ماسەلەسى ءجيى كوتەرىلىپ ءجۇر. بۇل رەتتە, ءبىزدىڭ ەلدە قوعامنىڭ قىزىعۋشىلىعى ەكى ءتۇرلى ەكەنىن ايتقىم كەلەدى. ماسەلەن, سان جاعىنان باسىمدىققا يە سايلاۋشىلار مەن بيزنەس-ەليتا وكىلدەرىنىڭ ۇستانىمدارى قاراما-قايشى. دەسەك تە, ەۋرووداققا قوردالانعان ماسەلەلەردىڭ وشاعى دەپ باعا بەرۋ دۇرىس ەمەس», – دەدى. بۇل پىكىرمەن كەلىسەتىنىن بىلدىرگەن ەۋرازيالىق ەكونوميكالىق كوميسسيانىڭ ەكونوميكا جانە قارجى ساياساتى بويىنشا القا مۇشەسى تيمۋر سۇلەيمەنوۆ ەۋرووداقتىڭ ءالى دە بولسا جەمىستى جۇمىس ىستەۋى ءۇشىن ايتارلىقتاي الەۋەتكە يە ەكەنىن ەرەكشە اتاپ ءوتتى. ونىڭ ايتۋىنشا, ەۋرازيالىق ەكونوميكالىق وداق ەو-مەن ساۋدا قاتىناسىنىڭ ۇزاق مەرزىمگە جالعاساتىنىنا ۇمىتپەن قارايدى. «ەۋرووداقتىڭ ينۆەستيتسيا اعىنىنا, سونداي-اق, ءوزارا جانە سىرتقى ساۋدا-ساتتىعىنا قاراپ, ونىڭ ومىرشەڭ ەكەنىن ايتۋعا بولادى. وداق بولاشاقتا دا زور الەۋەتكە يە بولىپ قالا بەرەدى. سوندىقتان, ول العا قويعان ماقساتىنا جەتۋ ءۇشىن ءوز جۇمىسىن جالعاستىرا بەرەدى دەپ ويلايمىن. ۇلىبريتانيانىڭ ەو-دان شىعۋ ماسەلەسىنە كەلسەك, مەنىڭشە, بۇل ەكى تاراپ ءۇشىن دە ءتيىمسىز شەشىم», – دەگەن ت.سۇلەيمەنوۆ ەاەو ەو-نى ءوزىنىڭ ءداستۇرلى سەرىكتەسى سانايتىنىن جەتكىزدى. ال قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ ءبىزدىڭ مەملەكەت بۇل ماسەلەگە وزگە قىرىنان قارايتىنىن ايتتى. «ەۋروپا قازاقستان ءۇشىن قاي كەزدە دە ءىرى ساياسي سەرىكتەستەردىڭ ءبىرى بولىپ قالا بەرەدى. ازىرگە الەمدە ەۋرووداقتان ارتىق ينتەگراتسيانىڭ مودەلى جاسالعان جوق. ونىڭ ۇستىنە, ەۋروپا تەك تەحنولوگيا مەن ينۆەستيتسيانىڭ وشاعى عانا ەمەس, سونداي-اق, جاڭا قۇندىلىقتار مەن يننوۆاتسيالىق جانە ساياسي رەفورمالاردىڭ ورداسى. سول سەبەپتى, ەۋروپانىڭ قازىرگى كەلەڭسىزدىكتەردى جەڭىپ شىعاتىنىنا سەنەمىز. وسى رەتتە, ەاەو-نىڭ قۇرىلۋىنا ەۋرووداقتىڭ تاجىريبەسى دە ايتارلىقتاي سەبەپ بولعانىن اتاپ وتكەن ءجون», – دەدى ە.ىدىرىسوۆ. كارى قۇرلىقتاعى احۋالدىڭ ءالى دە بولسا وڭالماي تۇرعانىن گەرمانيادان كەلگەن سىرتقى ساياسات جانە ەكونوميكا جونىندەگى ساراپشى الەكساندر رار دا تىلگە تيەك ەتتى. ول ەو قۇرىلعالى بەرى ەۋروپاداعى جاعدايدىڭ مۇنشالىقتى قيىن بولماعانىن ايتىپ: «وكىنىشكە قاراي, 2008 جىلعى قارجى داعدارىسىنان كەيىن ەۋروپا تۇراقتى قالىپقا ءالى كەلە الماۋدا. گرەكيامەن بايلانىستى ماسەلەلەردىڭ ءوزى ەو-نىڭ ىرگەسىنە سىزات ءتۇسىرىپ تۇر. اتالعان مەملەكەتتە كەز كەلگەن ۋاقىتتا دەفولت بولۋى مۇمكىن. ال بۇل گرەكيانىڭ ەو-دان شىعۋىنا اكەلىپ سوعادى. سوندىقتان ەۋروپاداعى قارجى تۇراقتىلىعى تۋرالى ايتۋعا ءالى ەرتە», – دەدى. سونىمەن قاتار, ا.رار ەو شاڭىراعىن شايقالتىپ تۇرعان ەكىنشى ماسەلە تەررورلىق شابۋىلدار ەكەنىنە نازار اۋداردى. «ءبىز مۇنداي ماسەلەنى قالاي شەشۋ كەرەكتىگىن بىلمەيمىز. تەرروريزم جۇرەگىمىزگە قورقىنىش ۇيالاتىپ قانا قويماي, قوعامنىڭ ءبىر بولىگىن ءوز جاقتارىنا قاراتىپ الۋدا. ول از دەسەڭىز, ەۋرووداقتىڭ 60 جىلدىق تاريحىندا بولماعان بوسقىندار ماسەلەسى دە جاعدايدى تىم ۋشىقتىرىپ جىبەردى. ءتىپتى, ماعان وسىنىڭ سالدارىنان نەمىس قوعامى بىرنەشە بولىككە اجىراي باستاعانداي كورىنەدى. سەبەبى, ءبىر بولىگى بوسقىنداردى قابىلداۋ كەرەك دەسە, كەلەسى توپ مۇسىلماندانۋ ۇدەرىسى ءجۇرىپ جاتقانىن, سونىڭ سالدارىنان ەۋروپا وركەنيەتى مەن مادەنيەتىنە قاۋىپ ءتونىپ تۇرعانىن ايتىپ, دابىل قاعۋدا. سوندىقتان, بۇگىندە ەۋروپا ءوز تاريحىنداعى ەڭ قيىن كۇندەردى باستان وتكەرۋدە دەۋگە تولىق نەگىز بار», – دەگەن ساراپشى بوسقىندار ماسەلەسىندە گەرمانيا كانتسلەرى انگەلا مەركەلدىڭ ساياساتىن قولداۋشىلار قاتارى از ەكەنىنە الاڭداۋشىلىق ءبىلدىردى. سونداي-اق, ەۋرووداقتىڭ قازاقستانداعى وكىلدىگىنىڭ باسشىسى ترايان حريستەا, تۇركيا پرەمەر-ءمينيسترى ورىنباسارىنىڭ كەڭەسشىسى ءالي وسمان وزتۇرىك جانە وداقتاس مەملەكەتتەر (رەسەي جانە بەلارۋس) مەملەكەتتىك حاتشىسىنىڭ كەڭەسشىسى ماريا ۆالوۆايا اتالعان تاقىرىپقا قاتىستى ءوز كوزقاراستارىن ءبىلدىرىپ, ەۋروپانىڭ بۇكىل الەم ءۇشىن الار ورنى ەرەكشە ەكەنىن ايتتى. پىكىرلەسۋ بارىسىندا ساراپشىلار ەۋرووداقتى ساقتاۋ جانە نىعايتۋ ءۇشىن جاڭا تۇجىرىمداما قاجەت ەكەنىنە اسا ءمان بەرىپ, ونىڭ ىدىراۋىنىڭ الدىن الۋدىڭ ءتيىمدى تۇستارىنا توقتالدى. ويتكەنى, ەۋرووداقتىڭ ىرگەسىنە تۇسكەن سىزات الەمنىڭ ەكونوميكاسىنا عانا ەمەس, جالپى قۇرىلىمىنا دا كەرى اسەر ەتپەك. سوندىقتان, «ەۋروپا تاپ بولعان قازىرگى «تار جول, تايعاق كەشۋدەن» بارلىق قۇرلىق بىرىگىپ ءوتۋى ءتيىس» دەگەن قورىتىندىعا كەلگەن ساراپشىلار تۇراقتى الەم قۇرۋ ءۇشىن جۇدىرىقتاي جۇمىلاتىن كەز كەلگەنىن ايرىقشا اتاپ ءوتتى.كينو دا قوعامنىڭ قوزعاۋشى كۇشى
ەلوردانىڭ تورىندە وتكەن ەۋرازيالىق مەديا فورۋمنىڭ ەكى كۇنى دە ەرەكشە ەستەلىكتەرمەن ەستە قالدى. ءار جيىننىڭ ءمانى مەن مازمۇنى تەرەڭ. ساياساتتان سويلەسە سارقىلماي, الەمدىك اڭگىمەدەن تارتىنباي, شەبەرلىك-ساباقتارىندا شەشىلە سويلەگەن شەتەلدىك قوناقتاردىڭ ءسوز قورجىنى قوماقتى ەكەنىن بايقادىق. سان ءتۇرلى تاقىرىپتى ساباقتاستىرا ءاڭگىمەلەپ, پىكىر الاڭىن قىزدىرا ءتۇستى. بىزگە دە كەرەگى وسى. كەشەگى كۇنى كوتەرگەن كەلەلى ماسەلەنىڭ ءبىرى – كينو سالاسى بولدى. بۇگىنگى كينونىڭ حال-احۋالىنان حابار بەرەتىن جيىندى يرلانديادان كەلگەن «Screen Daily.com» سايتىنىڭ رەداكتورى فيوننۋالا حەلليگان ءجۇرگىزدى. وزەكتى ويلارىن وزگەلەرمەن بولىسكەن ساراپشى مامانداردىڭ قاتارىندا فۋتۋرولوگ رەي حامموند, رەسەي كينەماتوگرافيستەر وداعى توراعاسىنىڭ ءبىرىنشى ورىنباسارى ولەگ يۆانوۆ, «Thunder Communications International» كومپانياسىنىڭ باس ديرەكتورى چارلز لەي جانە دە كينو سالاسىندا ورنىقتى ورىن الىپ ۇلگەرگەن كينوپروديۋسەر, «Eurasia Film Production» كومپانياسىنىڭ باس ديرەكتورى گۇلنار سارسەنوۆا, «The Festivals Channel» تەلەارناسىنىڭ ديرەكتورى توني ۋوتتس, كينوسىنشى اندرەي پلاحوۆ, رەسەي مادەنيەت مينيسترلىگى كينو جونىندەگى ساراپتاما كەڭەسىنىڭ ءمۇشەسى اندرەي تەرەشوك بار. ورامدى ويلارىن ورتاعا سالعان ماماندار جارىق كورىپ جاتقان كينولاردىڭ جاقسى تۇستارىن جاريالاپ, كەم-كەتىكتىڭ ورنىن تولتىرۋعا توقتالىپ, سىن-پىكىرلەر دە سىرت قالمادى.تامىرىن تارقاتا تۇسسەك, ءبىر ساعاتقا سوزىلعان باسقوسۋدىڭ باستى تاقىرىبى دا بەلگىلى. باعىتى دا ايقىن. كوگىلدىر ەكراننان كورسەتىلىپ ءجۇرگەن كوپتەگەن فيلمدەردىڭ ساپاسىن سارالاۋ. وتاندىق ورتاداعى بولسىن, شەتەلدىك شەڭبەردەگى بولسىن ءاربىر تۋىندىنىڭ كولەمىنە ەمەس, بەرەرىنە باسا نازار اۋدارۋىمىز كەرەك, دەدى كەلگەن ساراپشىلار. «جاسىراتىنى جوق, الەمدىك فاكتورعا اينالعان تەلەۆيزيا مەن كينو ارقىلى قوعامدىق پىكىر قالىپتاسادى. جاھاندانۋ عاسىرىندا ءبىز «رۋحاني اشتىعىمىزدىڭ» ورنىن ءماندى, ماعىنالى فيلمدەرمەن تولتىرۋعا ءتيىسپىز. بۇگىندە كوركەم شىعارما وقىمايتىنداردىڭ ىقىلاسى «كوك جاشىككە» اۋىپ كەتكەن. ولار كىتاپ وقۋعا ىنتا تانىتپاسا دا, كينو كورۋگە ۋاقىت تابادى. ونىڭ ءبارى زاماننىڭ زالالى دەسەك تە, ۋاقىت كوشىنە كونۋگە تۋرا كەلەدى. سوندىقتان, نەعۇرلىم كوبىرەك تاريحي تۋىندىلاردى تارتۋ ەتسەك, سولعۇرلىم كەلەشەك ۇرپاقتىڭ ساناسى كەرەكتى ماعلۇماتتارمەن تولىعاتىن بولادى. ءبىز شىعارعان كينومىزدى باسەكە ءبايگەسىنە سالۋ ءۇشىن ەمەس, ەڭ ءبىرىنشى وسكەلەڭ ۇرپاقتىڭ ءومىرى ءۇشىن تاربيە قۇرالىنا اينالدىرۋىمىز قاجەت. جاقسى دۇنيەلەردى جارنامالاپ, پايدالى فيلمدەردىڭ قاتارىن كوبەيتۋگە كوڭىل ءبولۋىمىز كەرەك», – دەدى العاش بولىپ ءسوز العان قىتاي مەملەكەتىنىڭ وكىلى «Thunder Communications International» كومپانياسىنىڭ باس ديرەكتورى چارلز لەي. ءيا, اقيقاتىنا جۇگىنسەك, قۇپتاۋعا تۇرارلىق پىكىر ەكەنى داۋسىز. تاربيە قۇرالىنا اينالدىرا الساق, ءتىپتى تاماشا. سەبەبى, بۇگىنگى ءبۇلدىرشىننىڭ سىرلاسى دا, مۇڭداسى دا كوگىلدىر ەكران ەكەنى كوپشىلىككە ءمالىم. ولاردىڭ ويى دا, ويىنى دا ءتورتبۇرىشتى قۇرىلعىنىڭ توڭىرەگىنەن اسپاي قالعانى جاسىرىن ەمەس. ەكراننان كورگەنىنە ەلىكتەپ جۇرگەن بالاسىنىڭ ەرتەڭىنە ەلەڭدەيتىن اتا-انالار دا از ەمەس. «بالامىز تەلەديدارعا تەلمىرىپ, ءتىلدەسۋدەن قالدىق», دەپ قاپالانىپ ءجۇرگەنى قانشاما. وعان بولا زاماندى دا, ادامدى دا ايىپتاۋدىڭ اعات قىلىق ەكەنى بەلگىلى. ماڭ-ماڭ باسقان تۇيەلى كەرۋەننىڭ كوشىندەي ءومىر ءوز جىراسىمەن جىلجىپ بارادى. ونى توقتاتۋعا, يا وزگەرتۋگە قۇدايدان باسقانىڭ قۇدىرەتى جەتە قويماس, ءسىرا. سوندىقتان دا, تەحنيكانىڭ قارىشتاپ دامىعان قادامىنا قارعىس ايتۋدىڭ قاجەتى جوق. كومپيۋتەردى كادەڭە جاراتىپ, ينتەرنەتتى يگىلىگىڭە پايدالانا بىلسەڭ, الىستى جاقىنداتىپ, ۋاقىتتان ۇتىلماي ۋىسىڭدا ۇستاۋعا ۇيرەنەسىڭ. عاسىردىڭ بەرگەن عالاماتتارىن مەڭگەرەتىن بولساق, عاجايىپ عالامشاردىڭ كىلتىن تاپقان بولامىز. تەڭىزدىڭ تەرەڭىندەگى مارجان تاستاي ماڭىزدى اقپاراتتاردى ءوز قولىمىزبەن وقۋعا مۇمكىندىك الار ەدىك. وسىنىڭ ءبارى ويلانعان ادام ءۇشىن ورىندالاتىن ارمان. قيمىلداماعاندار قيال كورىپ جۇرە بەرەرى ءسوزسىز. ءجا, ساراپشىلارعا ورالساق... بۇقارا كوزىن تىككەن بۇقارالىق اقپارات قۇرالدارىنىڭ كينو تۋىندىلاردى الدىڭعى قاتارعا قويۋعا دا, ءبىرجولا جويۋعا دا دارمەنى جەتەتىن ءداۋىر بولىپ تۇر. ءيا, ايتپاعىمىز جارناما سالاسى. نارىققا شىققان كەز كەلگەن زاتتىڭ جارناماسى جاقسى بولسا, سونشالىقتى سۇرانىسقا يە بولىپ, تۇتىنۋشىسى دا تولاستامايدى. بۇگىنگى ماماندار دا بۇل تاقىرىپتان اتتاپ وتپەدى. وندىرگەن كينوڭنىڭ كورەرمەنى كوپ بولعانىن قالايسىڭ با؟ ولاي بولسا, جارناما قىزمەتىن قىزدىرا ءتۇس. سوندا كورەسىڭ, ەلدىڭ ءبارى ەڭبەگىڭە تالاسىپ, جاپپاي, جانتالاسىپ الىپ جاتقانىن. «بۇرىنعى جاستار كىتاپحانادا تانىسۋشى ەدى, قازىرگى جاستار تۇنگى كلۋبتا تانىسادى», دەپ باستادى ءسوزىنىڭ القيسساسىن ۇلىبريتانيادان كەلگەن مەيمان رەي حامموند. «وسىلاي بولۋىنا كينونىڭ تىكەلەي اسەرى بار. سوندىقتان دا, ارىپتەستەرىم ايتقانداي, تانىمدىق تۋىندىلار تامىر جاياتىن بولسا, سانالى ۇرپاقتىڭ سانى ساتىلاپ وسەتىنىن كورەتىن بولامىز», – دەدى ول. ساراپشىلاردىڭ ساپار شەككەن تاعى تاقىرىپ ارالى, ول – كينوتەاتر. شىنىندا دا, كۇندەلىكتى كۇيبەڭ ءتىرشىلىككە بايلاۋلى جانداردىڭ بولسىن, بوس ۋاقىتى جەتەرلىك جەتكىنشەكتەر بولسىن, ولاردىڭ كينوتەاترعا قاپتاپ بارىپ جاتقانىن كوپ كورسەك تە, كينوتەاترلاردىڭ ءىشى تولىپ كەتكەنىن كورمەيمىز. وعان دالەل, تاعى دا تەحنيكانىڭ دامۋى. قازىر كەز كەلگەن ادامنىڭ ۇيىندە نوۋتبۋك, كولىندا پلانشەت جۇرەتىنى ايدان انىق. كەرەكتى كينوسىن كينوتەاترعا بارماي-اق, قالاعان جەرىنەن تاماشالاي الاتىن كۇنگە جەتتىك. ارينە, ءار ساراپشىنىڭ اڭگىمەسى ءارتۇرلى بولعانىمەن, ورتاق ويلارى دا كەزدەسىپ جاتتى. ءبىرى كينو جانرىنا ءمان بەرۋىمىز كەرەك دەسە, ەندى ءبىرى مىقتى ستسەناريستەر دايىنداۋىمىز كەرەك دەستى. قالاي بولسا دا, ۇرپاق تاربيەسىن باستى ۇستانىم ەتتى. ءجيى-ءجيى جينالىس جاساپ, وي ءبولىسىپ, تاجىريبە الماسۋ الاڭىن ۇيىمداستىرىپ وتىرۋدى دا ۇسىنعاندار بولدى. قورىتىندى ماجىلىستەگى قوناقتاردىڭ كۇن تارتىبىندەگى تاقىرىپقا جاساعان تالداۋى, قىسقاشا ايتقاندا, وسىنداي. اتالمىش ەۋرازيالىق مەديا فورۋمنىڭ نەگىزگى مىندەتى – ماسەلە شەشۋ ەمەس, ونى جان-جاقتى پىكىر ايتۋ ارقىلى سارالاۋ. ايتىلعان پىكىرلەرگە سۇيەنە وتىرىپ, تالداۋ نەگىزىندە تاڭداۋ جاساۋ ءار ادامنىڭ ءوز ەركىندە.قارجى جۋرناليستيكاسى – ماڭىزدى سالا
بۇل كۇنى ەۋرازيالىق مەديا فورۋم اياسىندا «قارجى جۋرناليستيكاسىنىڭ باعىتى» تاقىرىبىندا شەبەرلىك ساباعى ۇيىمداستىرىلدى. ونى تەلەجۇرگىزۋشى, ربك تەلەارناسى باس رەداكتورىنىڭ ورىنباسارى دانيل بابيچ (رەسەي) جۇرگىزدى. بۇل شارادا نەگىزىنەن قارجى سالاسىنداعى اقپارات تاراتۋ ماسەلەلەرى كەڭىنەن ءسوز بولدى. «ربك» ارناسىندا قىزمەت ىستەيتىن مامان تەلەارنا مەن عالامتوردىڭ ءوزارا بايلانىسى تۋرالى قۇندى دەرەكتەردى كەلتىرە وتىرىپ, ىسكەرلىك جانە بيزنەس باعىتىنداعى سالالىق تاجىريبەسىن ورتاعا سالدى. سونداي-اق, ول اقش جانە رەسەيدىڭ الدىڭعى قاتارلى تەلەارنالارىن سالىستىرا وتىرىپ, ءتيىمدى جۇمىس ءتاسىلدەرىن ۇسىندى. ونىڭ ايتۋىنشا, اتالعان سالاعا قاتىستى جۋرناليستيكا قارجى نارىعىندا قىزمەت كورسەتەدى. بۇل باعىتتا قىزمەت ەتەتىن جۋرناليستەر قارجى نارىعىنداعى جاڭالىقتارمەن قامتاماسىز ەتىپ قانا قويماي, ءتۇرلى تالداۋلار, ساراپتامالار جاسايدى. «ىسكەرلىك جانە قارجى جۋرناليستيكاسىن اجىراتا ءبىلۋ قاجەت. قارجى جۋرناليستيكاسى – ءىسكەرلىك جۋرناليستيكاسىنىڭ ءبىر بولىگى. بۇل ەكەۋىنىڭ ايىرماشىلىعى – ىسكەرلىك جۋرناليستيكا بيزنەس-اۋديتوريا سۇراقتارىنا, ال قارجى جۋرناليستيكاسى ودان دا از توپتىڭ ساۋالدارىنا جاۋاپ بەرەدى. ادەتتە, بۇل توپ قارجى نارىقتارىمەن, قارجى قىزمەتتەرىمەن بايلانىسى بار ادامدار شوعىرى بولىپ كەلەدى», – دەدى د.بابيچ. ودان ءارى مامان نەگىزىنەن ترەيدەرلەردەن, ينۆەستيتسيالىق كومپانيالار مەن بانكتەردىڭ قىزمەتكەرلەرىنەن تۇراتىن ربك اۋديتورياسىنىڭ 2006-2015 جىلدار ارالىعىندا قالاي وزگەرگەنىن اتاپ كورسەتتى. دانيل بابيچ 2006 جانە 2015 جىلدار ارالىعىنداعى ترەيدەرلەردىڭ قىزمەتىنە باعا بەرە وتىرىپ, قازىرگى قارجى مامانى ءالدەقايدا ءموبيلدى ءارى كوپتەگەن گادجەتتەردى پايدالانادى دەگەن قورىتىندى جاسادى. سونىمەن قاتار, د.بابيچ قارجىلىق باسىلىمداردىڭ وقىرماندارى بوتەننىڭ ءومىرىن اڭدۋعا, وزگەنىڭ اقشاسىن ساناۋعا جانە باسقا دا ءتۇرلى جايتتاردى بىلۋگە قۇشتار كەلەتىنىن جەتكىزدى. شەبەرلىك-ساباق بارىسىندا سپيكەر الەمگە تانىمال قارجىلىق باسىلىمداردا قانداي ۇدەرىستەر ورىن الىپ جاتقانىن ارنايى كورنەكى قۇرالدار ارقىلى ءتۇسىندىرىپ بەردى. وسى ورايدا, ول بۇگىنگى جاڭا تەحنولوگيالار قارجى سالاسىنداعى بۇقارالىق اقپارات قۇرالدارىنىڭ قىزمەت كورسەتۋ ساپاسىن جەتىلدىرە تۇسكەنىن ءسوز ەتتى.القالى جيىن اياقتالدى
ارقانىڭ ارۋ قالاسى استانادا وتكەن القالى جيىن دا ءوز مارەسىنە جەتتى. الەمنىڭ ءار جەرىنەن كەلگەن ساياسات ساردارلارى مەن ساراپشى مامانداردىڭ سان ءتۇرلى پىكىرلەرى, كەلەلى كەزدەسۋلەرى, ماڭىزدى ءماجىلىستەرى بىرقاتار تاقىرىپتىڭ باسىن قايىردى. «بىردە-ءبىر مەملەكەت وقشاۋلانىپ, وزدىگىنەن ءومىر سۇرە المايدى. ساندىق تەحنولوگيالار مەن عالامتور جەلىلەرى ادامداردى جاقسى ءومىر ءسۇرۋ جولىن ىزدەۋگە يتەرمەلەيدى. بۇل ۇكىمەتتەردى تابىس تابۋدىڭ جولدارىن قاراستىرىپ, جاڭا جۇمىس ورىندارىن اشۋعا ماجبۇرلەيدى. قازىر ءبارىن ولشەۋگە بولادى دەپ ايتىپ جاتادى. بىراق نە بولىپ جاتىر؟ كىم كىنالى؟ نە ىستەۋ كەرەك؟ – دەگەن بىتپەيتىن سۇراقتاردىڭ جاۋابىن ىزدەيتىن ءبىزدىڭ سانا-سەزىمىمىز بەن ويلاۋ جۇيەمىزدى تسيفرلاۋ مۇمكىن ەمەس. بۇل رەتتە, وسىنداي پىكىر الاڭدارىنا قاشان دا سۇرانىس جوعارى», – دەدى جيىن سوڭىندا ءسوز العان قازاقستان رەسپۋبليكاسى پرەمەر-ءمينيسترىنىڭ ورىنباسارى, ەامف ۇيىمداستىرۋ كوميتەتىنىڭ ءتورايىمى داريعا نازارباەۆا. سونداي-اق, ۆيتسە-پرەمەر كەلەسى حIV ەۋرازيالىق مەديا فورۋم 2017 جىلدىڭ 22-23 ماۋسىمى كۇندەرى استانا قالاسىندا ەكسپو كورمەسىنىڭ اياسىندا وتەتىنىن جەتكىزدى. تالعات باتىرحان, جولدىباي بازار, ەلامان قوڭىر, راۋان قايدار, «ەگەمەن قازاقستان» سۋرەتتەردى تۇسىرگەن ەرلان وماروۆ