توراعاسىمەن ارىپتەستەر بۇكپەسىز اڭگىمە ءوربىتتى
كەشە «ەگەمەن قازاقستان» رەسپۋبليكالىق گازەتىنىڭ رەداكتسياسىندا استانادا ءوتىپ جاتقان ءحىىى ەۋرازيالىق مەديا فورۋمعا قاتىسۋعا كەلگەن ەگيپەت ەلىندەگى «ءال-احرام» مەديا-حولدينگىنىڭ باسقارما توراعاسى احمەد ەسسايەد ان-ناگگارمەن كەزدەسۋ ءوتتى.
جيىن بارىسىندا احمەد ان-ناگگار ءوزى باسقارىپ وتىرعان مەدياحولدينگتىڭ قۇرىلۋ تاريحى مەن قىزمەت بارىسىن بايانداپ بەردى. وتكەن عاسىردىڭ ورتاسىنا دەيىن حولدينگ جەكەمەنشىك قولدا بولسا, كەيىن مەملەكەت قاراماعىنا وتكەن. توراعانىڭ ايتۋىنشا, قازىر قۇرىلىم ءوزىن ءوزى قامتاماسىز ەتىپ وتىر. ءتىپتى, دەمەۋشىلەرى دە جوق ەكەنىن تىلگە تيەك ەتتى. بىراق جارنامادان تۇسەتىن قارجىنىڭ مولدىعىن دا جاسىرمادى.
«ءال-احرام» – اراب الەمىندەگى ەڭ ءىرى مەدياحولدينگتەردىڭ ءبىرى. كومپانيانىڭ ىرگەتاسىن ليۆاننان كەلگەن ەكى ازامات قالاعان. ونىڭ قۇرىلعانىنا 140 جىلدان استام ۋاقىت بولدى. باسىلىم تارالىمى بۇگىندە 900 مىڭدى قۇرايدى. بۇدان بولەك, حولدينگكە قاراستى ستراتەگيالىق جانە ساياسي زەرتتەۋ ورتالىعى بار. بۇل ورتالىقتا تۇركى تىلدەس حالىقتاردى زەرتتەۋگە ارنالعان ارنايى ءبولىم جۇمىس ىستەيدى. سونداي-اق, فارماتسەۆتيكالىق, كەڭسە تاۋارلارى, كومپيۋتەرلىك ديسك ونىمدەرىن شىعاراتىن زاۋىتتارى دا بار ەكەن. سونداي-اق, حولدينگتىڭ شەتەلدىك تۋريستەرگە قىزمەت كورسەتەتىن فيرمالارى دا بار. بارلىعى 16 مىڭعا جۋىق ادامدى جۇمىسپەن قامتىعان.
مەيمان ەگيپەت اراب رەسپۋبليكاسىندا قازاقستان رەسپۋبليكاسى جايلى تىكەلەي اقپارات الاتىن دەرەككوز بولماعاندىقتان, مالىمەتتەردى شەتەلدىك اقپارات اگەنتتىكتەرىنەن الاتىنىن ايتتى. وسىعان بايلانىستى ءوزىنىڭ ارنايى ساپارى كەزىندەگى باستى ماقساتتارىنىڭ ءبىرى – قازاقستانمەن تىعىز بايلانىس ورناتىپ, وسى ولقىلىقتىڭ ورنىن تولتىرۋ ەكەندىگىن مالىمدەدى.
«بىزدە قازاقستان جايلى كوپتەگەن جاقسى پىكىرلەر قالىپتاسقان. ەڭ الدىمەن, بۇل ەلدى ازيانىڭ ءدال ورتاسىندا ورنالاسقان دامىعان مەملەكەتتەردىڭ ءبىرى ءارى ەۋرازيالىق ەكونوميكالىق وداقتىڭ باستى مۇشەسى رەتىندە بىلەمىز. سونداي-اق, ارىپتەستەرىمىزبەن قازاقستاندى «ورتالىق ازيانىڭ جۇرەگىن ۇستاپ تۇرعان بۇركىت ەلى» دەپ ازىلدەسەمىز», – دەدى احمەد ان-ناگگار.
«قازاقستان پرەزيدەنتىنىڭ «الەم. ءححى عاسىر» مانيفەسىنىڭ ءبىزدىڭ ەلىمىز ءۇشىن دە ماڭىزى اسا جوعارى. بۇل جونىندە ءبىزدىڭ ەل باسىلىمدارى بىرنەشە رەت ارنايى اقپارات جاريالاپ, ءوز ارامىزدا تالقىلادىق. سەبەبى, وسىدان 20 جىلداي بۇرىن ءبىزدىڭ ەلدە دە «تاياۋ شىعىس – يادروسىز ايماق» باستاماسى كوتەرىلگەن بولاتىن. بىراق بۇل جەردە ايىرماشىلىعى, نۇرسۇلتان نازارباەۆ بەلگىلى ءبىر ايماققا قاتىستى ەمەس, بۇكىل الەم حالقىنا ارناپ باستاما كوتەردى», – دەدى مەديا حولدينگ توراعاسى.
كەزدەسۋدە «ەگەمەن قازاقستان» رەسپۋبليكالىق گازەتى» اق باسقارما توراعاسى ەركىن قىدىر مىسىر ەلىندەگى سوڭعى كەزدەرى ورىن الىپ جاتقان كەلەڭسىزدىكتەرگە بايلانىستى ساياحاتشىلاردىڭ ەكىۇداي كوڭىل كۇيگە بەرىلىپ وتىرعانىن ايتا كەلىپ, وسى ولقىلىقتى تۇزەۋ ءۇشىن گازەتتىڭ ارنايى ءبىر بەتىن ارناۋعا مۇمكىندىك بار ەكەندىگىن مالىمدەدى. ءوز كەزەگىندە احمەد ان-ناگگار بۇل ۇسىنىسقا العىسىن ءبىلدىردى جانە ءوزى باسقاراتىن باسىلىمدا قازاقستان تۋرالى شىنايى اقپارات ازىرلەۋگە «ەگەمەن قازاقستانداعى» ارىپتەستەرىن بەلسەنە قاتىسۋعا شاقىردى. كەزدەسۋگە ەگيپەت اراب رەسپۋبليكاسىنىڭ قازاقستانداعى ەلشىسى حايسام سالاح كامەل يبراحيم دە قاتىستى.
ايان ءابدۋالي,
«ەگەمەن قازاقستان»