استانا. 22 ءساۋىر. KAZENERGY قاۋىمداستىعى توراعاسىنىڭ ورىنباسارى جامبولات سارسەنوۆ ۆەنگريانىڭ قازاقستان رەسپۋبليكاسىنداعى قۇرمەتتى كونسۋلى بولىپ تاعايىندالدى. بۇل تۋرالى egemen.kz ءتىلشىسى حابارلادى.
اقتوبە قالاسىندا ۆەنگريانىڭ قۇرمەتتى كونسۋلدىعىنىڭ اشىلۋ سالتاناتى كەزىندە ەكى ەلدىڭ ىسكەرلىك كەڭەسىنىڭ تەڭ توراعاسى دارەجەسىندەگى سىڭىرگەن ەڭبەگى ەسكەرىلىپ جامبولات سارسەنوۆكە ديپلوماتيالىق مىندەت جۇكتەلدى.
سالتاناتتى ءىس-شاراعا اقتوبە وبلىسىنىڭ اكىمى بەردىبەك ساپارباەۆ, ۆەنگريانىڭ قازاقستان رەسپۋبليكاسىنداعى ەلشىسى اندراش باراني, ۆەنگريا سىرتقى ەكونوميكالىق بايلانىستار جانە سىرتقى ىستەر مينيسترلىگى مەملەكەتتىك حاتشىسىنىڭ ورىنباسارى جولت چۋتورا قاتىستى.
كونسۋلدىقتىڭ جۇمىسى الماتى, قاراعاندى جانە اقتوبە وبلىستارىن قامتيدى.
اتالعان شارادان كەيىن اقتوبە وبلىسىنىڭ بيزنەس قوعامداستىعىمەن كەزدەسۋى ءوتتى. وندا ەكى ەل كاسىپكەرلەرىنىڭ الەۋەتتى مۇمكىندىكتەرى تۋرالى دا ءسوز قوزعالدى. كەزدەسۋدە بيزنەسمەندەر ۆەنگريالىق جانە قازاقستاندىق كومپانيالاردىڭ بىرلەسكەن مۇناي-گاز جانە باسقا دا جوبالارعا قاتىسۋعا ەلەۋلى مۇمكىندىكتەرى بار ەكەنىن اتاپ كورسەتتى.
داستان كەنجالين.
دەرەك: KAZENERGY قاۋىمداستىعى.
فوتو: egemen.kz