ءاليا نازارباەۆانىڭ «بالا داۋىسى» ۇلتتىق بالالار ءان بايقاۋى وتەدى
17 ساۋىردەن باستاپ ءاليا نازارباەۆانىڭ «جاندانۋ الەمى» قورىنىڭ www.zhandanu.com رەسمي عالامتور پورتالىندا, قازاقستان رەسپۋبليكاسى تاۋەلسىزدىگىنىڭ 25 جىلدىعىنا ورايلاستىرىلعان «بالا داۋىسى» ۇلتتىق بالالار ءان بايقاۋىنا قاتىسامىن دەۋشىلەردى ونلاين تىركەلۋ اشىلدى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ قورى بيىلعى رەسمي ارىپتەسى بولىپ تابىلاتىن بايقاۋدىڭ باستى ماقساتى – ءبىزدىڭ ەلىمىزدە تۇراتىن حالىقتاردىڭ تىلدەرىندە جاڭا بالالار اندەرىن شىعارىپ, ولاردى كەڭىنەن تاراتۋ ارقىلى بالالاردىڭ مۋزىكالىق شىعارماشىلىعىن دامىتۋ, سونىمەن قاتار, ءبىلىم بەرۋ ۇيىمدارىنىڭ پەداگوگتارىنا ادىستەمەلىك كومەك كورسەتۋ.
23 مامىر مەن 10 تامىز ارالىعىنداعى كەزەڭ ىشىندە قوردىڭ بەلگىلى مۋزىكالىق پروديۋسەرلەردەن, كومپوزيتورلار مەن تانىمال ورىنداۋشىلاردان تۇراتىن شىعارماشىلىق ۇجىمى 7 جاس پەن 13 جاس ارالىعىنداعى بالالاردىڭ اراسىندا كاستينگ وتكىزۋ ءۇشىن رەسپۋبليكانىڭ بارلىق دەرلىك وبلىس ورتالىقتارىنا بارادى. تىڭداۋعا كەلگەن ءاربىر بالا ەستەلىك سىيلىقتار الىپ, ديپلومدارمەن ماراپاتتالادى, ال ەڭ جارقىن دا تولعانىستى ءساتتەر «بالا داۋىسىنىڭ» رەسمي ارىپتەسى-كتك ارناسىنداعى تەلەۆيزيالىق باعدارلامالاردا كورسەتىلەدى.
قوردىڭ وسى جاڭا جوباسىنىڭ باستى ەرەكشەلىگى – ونىڭ الەۋمەتتىك باعىت-باعدارى: كاستينگ وتكىزىلەتىن كۇندەرى بارلىق مۋزىكا مەن ءان پاندەرىنىڭ مۇعالىمدەرىنە ارنالعان تەگىن وقىتۋ سەمينارلارى مەن ۆوكالدىق شەبەرلىك, بالالاردى بايقاۋلارعا دايىنداۋ ادىستەمەسى جونىندەگى شەبەرلىك سىنىپتارى وتكىزىلەدى, ال اتا-انالارى بالالاردىڭ شىعارماشىلىق قابىلەتتەرىن اشۋ مەن دامىتۋعا قاتىستى بالالار پسيحولوگتارىنان كونسۋلتاتسيالار الادى.
ىرىكتەۋ تۋرلارىنىڭ قورىتىندىسى بويىنشا ءاربىر وبلىستان 16 ەڭ ۇزدىك بالالار داۋىسى انىقتالىپ, ولار جازعى مۋزىكا مەكتەبىنە شاقىرتۋ الادى. 2 اپتا بويىنا بالالار سولفەدجيو, حورەوگرافيا, ارتىستىك شەبەرلىك سياقتى باعىتتار بويىنشا وقىتىلادى. وبلىستىق كاستينگتىڭ ءاربىر جەڭىمپازىمەن ارنايى جازىلعان اۆتورلىق بالالار ءانىن جاتتاۋ جازعى مۋزىكا مەكتەبى جۇمىسىنىڭ باستى قورىتىندىسى بولماق. وسىلايشا, ءان بايقاۋىنىڭ فينالىندا ەل حالقى سۇيىكتى وتانىمىز, شەكسىز مەيىرىمگە تولى بالالىق شاقتىڭ بالداۋرەن الەمى تۋرالى جاڭا ءاندەردىڭ تۇساۋكەسەرىنە كۋاگەر بولادى.
بايقاۋدىڭ فينالىندا بالالار تانىمال ورىنداۋشىلارمەن دۋەتتە قازاقستاندىق ەسترادانىڭ رەترو-شلياگەرلەرىن ورىندايدى. «بالا داۋىسى» بايقاۋىنىڭ جەڭىمپازىن تاڭداۋ قۇقىعى كاسىبي قازىلار القاسى مەن سمس ارقىلى داۋىس بەرۋگە قاتىساتىن تەلەكورەرمەندەرگە بەرىلەدى. بارلىق فينالعا شىققان 16 ورىنداۋشى ارنايى سىيلىقتارمەن ماراپاتتالادى, ال ەڭ ۇزدىك بالا داۋىسى ەلىمىزدىڭ ەڭ تانىمال مۋزىكالىق مەكتەپتەرىنىڭ بىرىندە وقۋ گرانتى مەن تانىمال وتاندىق تەلەارنالاردا مۋزىكالىق كليپتىڭ روتاتسياسى قۇقىعىنا يە بولادى.
«بالا داۋىسى» ۇلتتىق بالالار ءان بايقاۋىنىڭ قورىتىندىسى بويىنشا ءاليا نازارباەۆانىڭ «جاندانۋ الەمى» قورى قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ قورىمەن بىرگە ەلىمىزدىڭ بالا باقشالارى مەن مەكتەپتەرىنە جاڭا بالالار ءانى جيناقتارىن تەگىن سىيعا تارتادى.
ءبىر ايتارلىق جايت, 2015 جىلى ءاليا نازارباەۆانىڭ «جاندانۋ الەمى» قورى «بالا تيۋركۆيجيون» حالىقارالىق بالالار ءان بايقاۋىنىڭ ۇلتتىق ىرىكتەۋ تۋرىنىڭ ۇيىمداستىرۋشىسى بولدى. 2016 جىلى ونىڭ شەكاراسىن كەڭەيتىپ, وعان الەۋمەتتىك باعىت-باعدار بەرە وتىرىپ, ءوز ۇلتتىق بايقاۋىن ۇيىمداستىرۋ تۋرالى شەشىم قابىلدادى, بۇل رەتتە ونىڭ كونتسەپتۋالدىق نەگىزى بۇرىنعىسىنشا قالدى – جاڭا بالالار اندەرىن شىعارۋ. 2017 جىلى الىس جانە جاقىن شەتەلدەردەن بالالاردى شاقىرا وتىرىپ, «بالا داۋىسى» بايقاۋىن حالىقارالىق دەڭگەيگە شىعارۋ جوسپارلانىپ وتىر.
«ەگەمەن-اقپارات»