كەشە پارلامەنت سەناتىنىڭ توراعاسى قاسىم-جومارت توقاەۆتىڭ توراعالىق ەتۋىمەن وسى پالاتانىڭ وتىرىسى بولدى, دەپ حابارلادى سەناتتىڭ ءباسپاسوز قىزمەتى.
پالاتا قازاقستان رەسپۋبليكاسىنىڭ ۇكىمەتى مەن حالىقارالىق قايتا قۇرۋ جانە دامۋ بانكى اراسىنداعى قازاقستان رەسپۋبليكاسىندا وفيستەر قۇرۋ جانە ولاردىڭ جۇمىس ىستەۋى تۋرالى كەلىسىمدى راتيفيكاتسيالادى. 2016 جىلعى 21 قاڭتاردا داۆوستا جاسالعان كەلىسىم استانا جانە الماتى قالالارىندا حالىقارالىق قايتا قۇرۋ جانە دامۋ بانكىنىڭ (دۇنيەجۇزىلىك بانك) وفيستەرىن قۇرۋ مەن ولاردىڭ جۇمىس ىستەۋ ءتارتىبىن بەلگىلەيدى.
راتيفيكاتسيالانعان قۇجات 1994 جىلعى 23 مامىرداعى الماتى قالاسىندا تۇراقتى وكىلدىك قۇرۋ تۋرالى شارتتى الماستىرادى. 2001 جىلدان باستاپ, دۇنيەجۇزىلىك بانكتىڭ وكىلدىگى استانادا جۇمىس ىستەيتىنى, ال الماتى كەڭسەسى وسى قارجى ينستيتۋتىنىڭ ورتالىق ازياداعى ايماقتىق وكىلدىگى مارتەبەسىن العانى بەلگىلى.
جاڭا كەلىسىم دۇنيەجۇزىلىك بانكتىڭ قازاقستان رەسپۋبليكاسىنداعى وفيستەرى مەن قىزمەتكەرلەرىنىڭ مارتەبەسىن, ارتىقشىلىقتارى مەن يممۋنيتەتتەرىن ايقىندايدى. ماسەلەن, دۇنيەجۇزىلىك بانك, ونىڭ اكتيۆتەرى, مەنشىگى مەن تابىسى, سونداي-اق, قىزمەتى مەن ترانزاكتسيالارى سالىقتار مەن كەدەندىك باجدار سالۋعا جاتپايدى. سونداي-اق, كەلىسىم كوممۋنيكاتسيالارعا, يمپورت پەن ەكسپورتقا قاتىستى, سونداي-اق, سوت پروتسەسىنەن دە ارتىقشىلىقتار مەن يممۋنيتەتتەردى كوزدەيدى.
سەنات باسقا جۇمىسقا اۋىسۋىنا بايلانىستى دەپۋتات ءلاززات تۇرلاشوۆتىڭ وكىلەتتىگىن توقتاتۋ تۋرالى قاۋلى قابىلدادى. ق.توقاەۆ ل.تۇرلاشوۆقا زاڭ شىعارۋ قىزمەتىنە تابىستى قاتىسقانى ءۇشىن پارلامەنتشىلەر اتىنان العىس ايتىپ, الماتى وبلىسى اكىمىنىڭ ءبىرىنشى ورىنباسارى لاۋازىمىندا جەمىستى قىزمەت ەتۋىنە تىلەكتەستىگىن ءبىلدىردى.
وتىرىس بارىسىندا سەناتورلاردىڭ دەپۋتاتتىق ساۋالدارى جاريا ەتىلدى. دەپۋتات سارسەنباي ەڭسەگەنوۆ بالىق شارۋاشىلىعى ينستيتۋتىنىڭ وزەكتى ماسەلەلەرى بويىنشا اۋىل شارۋاشىلىعى ءمينيسترى اسىلجان مامىتبەكوۆكە ساۋال جولدادى.
سەناتور بەكتاس بەكنازاروۆ جولدا ءجۇرۋ ەرەجەسىن بۇزعانى ءۇشىن جازانى قاتايتۋ تۋرالى ساۋالىن پرەمەر-مينيستر كارىم ءماسىموۆ پەن باس پروكۋرور اسحات داۋىلباەۆقا ارنادى.
دەپۋتات قۋانىش ايتاحانوۆ پرەمەر-مينيسترگە ەكى ساۋال جاريا ەتتى. ولار وڭتۇستىك قازاقستان وبلىسىنداعى ءشاۋىلدىر القابىنىڭ ىشكى ارنالىق-قۇرعاتۋ جۇيەسىن جاڭعىرتۋعا جانە وتىرار اۋدانىنداعى سۋاراتىن جەردىڭ مەليوراتيۆتىك جاعدايىن جاقسارتۋ جوباسىن حالىقارالىق قارجى ينستيتۋتتارىنىڭ قارجىسى ەسەبىنەن قارجىلاندىرۋعا قاتىستى بولدى.