جەتىسۋ وڭىرىنە گاسترولدىك ساپارعا شىعادى
الداعى كۇندەرى الماتىداعى م.اۋەزوۆ اتىنداعى قازاق مەملەكەتتىك اكادەميالىق دراما تەاترى ءوزىنىڭ 90 جىلدىعى اياسىندا گاسترولدىك ساپارمەن تالدىقورعان جانە تەكەلى قالالارىنا اتتانادى. الماتى وبلىسىنىڭ ورتالىعىنا اتباسىن تىرەگەن بۇل ساپاردا تەاتر ۇجىمى يسرايل ساپاربايدىڭ «سىعان سەرەناداسى» مۋزىكالىق دراماسىن ساحنالاماقشى.
ءاربىر قازاقتىڭ اۋزىنان تۇسپەيتىن جۇرەك شىمىرلاتار, سەزىم سەرپىلتەر قۇدىرەتتى اندەردى دۇنيەگە اكەلگەن ءشامشى قالداياقوۆتىڭ ءومىرى مەن ماحابباتى جايلى سىر شەرتەتىن سپەكتاكلدە ونەر كورسەتەتىن اكتەرلەر مەن قويىلىم توبىن تەاتردىڭ كوركەمدىك جەتەكشىسى, كسرو حالىق ءارتىسى ءاسانالى ءاشىموۆ پەن تەاتر ديرەكتورى, قازاقستان رەسپۋبليكاسىنىڭ ەڭبەك سىڭىرگەن قايراتكەرى ەرلان ءبىلال باستاپ بارادى. ءشامشى ءرولىن بەكجان تۇرىس وينايدى. ال ەرىكسىز بيگە جەتەلەپ, ماحابباتپەن تەبىرەنتەر «سىعان سەرەناداسىنىڭ» دۇنيەگە كەلۋىنە ارقاۋ بولعان سىعان قىزى يزولدا بەينەسىندە شىنار جانىسبەكوۆا ونەر كورسەتەدى.
سول سياقتى جەتىسۋ وڭىرىندەگى كورەرمەندەر 21-22 ساۋىردە بارون رولىندەگى ءۇسىپحان سەيتىمبەت, بارونەسسا رولىندەگى قازاقستان رەسپۋبليكاسىنىڭ ەڭبەك سىڭىرگەن ءارتىسى عازيزا ابدىنابيەۆا, «سەرپەر» جاستار وداعى سىيلىعىنىڭ لاۋرەاتى الماس شاياحمەتوۆ, قازاقستان رەسپۋبليكاسىنىڭ ەڭبەك سىڭىرگەن ءارتىسى شامشاگۇل مەڭدياروۆا, «سەرپەر» جاستار وداعى سىيلىعىنىڭ لاۋرەاتى ءلاززات قالدىبەكوۆا, قر «سەرپەر» جاستار وداعى سىيلىعىنىڭ لاۋرەاتى جاسۇلان بايسالبەكوۆ, ناز جەكەنوۆا, باۋىرجان ماڭجىگىتوۆ, زاميرا ساپار, قايرات ءنابيوللا, ابزالبەك اسحات ۇلى, اراي ءومىروۆا, جانەل ماقاجان, نۇرعيسا قۋانىشباي ۇلى, اسەم ابەنوۆا سەكىلدى ونەرپازدارمەن قاۋىشا الادى.
ايناش ەسالي,
«ەگەمەن قازاقستان»
الماتى