وعان سۇرانىس جوعارى
بىلتىر اتىراۋداعى «پكف كونتينەنت كو لتد» سەرىكتەستىگى تالشىقتى-وپتيكالىق كابەل شىعاراتىن ءوندىرىستى ىسكە قوسقان ەدى. مۇنايلى وڭىردە العاش قولعا الىنعان جوبانى «بيزنەستىڭ جول كارتاسى-2020» باعدارلاماسى اياسىندا ىسكە اسىرۋعا بەت بۇرعان «پكف كونتينەنت كو لتد» جشس باس ديرەكتورى سەمەن حۆاننىڭ ايتۋىنشا, باستى ماقسات – تەلەكوممۋنيكاتسيا, كولىك, قۇرىلىس جانە مۇناي-گاز سالاسىنا قاجەتتى تالشىقتى-وپتيكالىق كابەل شىعارۋ ءوندىرىسىن يگەرۋ.
جاڭا جوبا قۇنى – 715 ميلليون تەڭگە. زاۋىتقا جالپى قۇنى 1 ميلليوننان اسا اقش دوللارىن قۇرايتىن قىتايدان ساتىپ الىنعان جاڭا تەحنولوگيا ورناتىلىپتى. «ءبىز ونداعان ميلليون دوللارعا باعالانعان ەۋروپالىق تەحنولوگيانى ساتىپ الۋ تاۋەكەلىنە بارعان جوقپىز. ويتكەنى, بۇل سالادا جۇمىسىمىزدى ەندى باستاپ وتىرمىز. دەگەنمەن, ءبىزدىڭ زاۋىتتاعى قىتايلىق تەحنولوگيامەن 5 جىل بويى ۇزدىكسىز ءونىم شىعارىلاتىنىنا تولىق سەنىمدىمىز. مۇندا ەڭ باستىسى, شيكىزاتتىڭ ساپالىعى, ءونىم دە سوعان سايكەس بولادى. ءدال وسىلاي دەۋىمىزگە ەۋروپا ەلدەرىنىڭ, اقش جانە جاپونيانىڭ شيكىزاتتارىن قولداناتىنىمىز دالەل بولا الادى», دەگەن باس ديرەكتور س.حۆاننىڭ پىكىرىنشە, قازىر مۇندا جەرگىلىكتى ماماندار جۇمىسقا قابىلدانۋدا.
زاۋىتتىڭ قۋاتى – جىلىنا ءبىر اۋىسىممەن 4 500 شاقىرىمدىق, ال ءۇش اۋىسىممەن 11 000 شاقىرىمعا سوزىلاتىن وپتيكالىق كابەل شىعارۋ. سونىمەن بىرگە, مۇندا 2017 جىلى مىس قوسىلعان كابەل شىعاراتىن قوسىمشا ەكى تسەحتى ىسكە قوسۋ جوسپارى بار. جاڭا كاسىپورىن تىنىس-تىرشىلىگى تۋرالى اڭگىمەلەگەن سەرىكتەستىكتىڭ باس ديرەكتورى سەمەن حۆاننىڭ ايتۋىنشا, ءبىزدىڭ ەلىمىزدە مۇنداي ونىمگە سۇرانىس وتە جوعارى. جاڭا ءونىمنىڭ نەگىزگى تۇتىنۋشىسى «قازاقتەلەكوم» اق بولارى داۋسىز. وسى كومپانيامەن 3 ميلليارد تەڭگەدەن استام قارجىعا ەكى جىلدىق كەلىسىم جاسالىپتى.
– ءبىز بۇدان وزگە تەلەكوممۋنيكاتسيا جانە قۇرىلىس يندۋسترياسىنداعى كومپانيالارعا دا ءونىمىمىزدى ۇسىنۋدى ويلاستىرىپ وتىرمىز. ويتكەنى, ءبىزدىڭ ونىمىمىزگە سۇرانىس بار. ولاي دەيتىنىم, كابەلدىڭ دە قولدانۋعا بولاتىن شەكتەۋلى مەرزىمى بار, ونى بەلگىلى ءبىر ۋاقىتتان كەيىن اۋىستىرۋ قاجەت. وعان قوسا قازىرگى ۋاقىتتا ينتەرنەت, بايلانىس, جىلدامدىق سەكىلدى جاڭاشا تالاپقا ساي مىس قوسىلعان كابەلدەردى تالشىقتى-وپتيكالىق تۇرىنە الماستىرۋ كەزەڭى كەلدى, – دەدى سەرىكتەستىكتىڭ باس ديرەكتورى س.حۆان.
ونىڭ ءمالىم ەتكەنىندەي, جاڭا ونىممەن ەلىمىزدەگى سۇرانىستىڭ 25-30 پايىزىن قامتاماسىز ەتۋ جوسپارلانىپتى. مۇنىڭ دا وزىندىك سەبەبى بار. «بىرىنشىدەن, اتىراۋداعى زاۋىتتا شىعارىلعان كابەل تۇرلەرىنىڭ وزىندىك قۇنى رەسەيدەگى وندىرۋشىلەردىكىنەن ەرەكشەلەنبەيدى. ەكىنشىدەن, زاۋىتتىڭ ءوز ەلەكتر ەنەرگياسى بار. ۇشىنشىدەن, ەلىمىزدەگى سالىق جۇيەسى رەسەيدەگىدەن الدەقايدا كوڭىلگە قونىمدى. دەمەك, ءبىز ولارمەن باسەكەلەس بولا الامىز. ءتىپتى, بىزدە قىتايداعى كابەل وندىرۋشىلەرمەن دە باسەكەلەس بولاتىنداي مول مۇمكىندىگىمىز بار» دەپ ەسەپتەيتىن كاسىپورىن باسشىسى تۇراقتى جۇمىسقا تەك جەرگىلىكتى 50 ادام تارتىلعانىن ايتادى. سول سەبەپتەن, اتىراۋ پوليتەحنيكالىق كوللەدجىمەن دۋالدى وقىتۋ ءادىسىن قولدانۋ ءۇشىن مەموراندۋمعا قول قويىلدى.
جولداسبەك شوپەعۇل,
«ەگەمەن قازاقستان»