استانا. 17 ءساۋىر. ەكۆادوردا قۋاتتى جەر سىلكىنىسىنىڭ سالدارىنان 77 ادام قازا تاپتى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى.
ماگنيتۋداسى 7,8 باللدى قۇراعان ءزىلزالانىڭ ەپيتسەنترى پەدەرنالەس قالاسىنىڭ سولتۇستىك-باتىسىنان 14 شاقىرىم قاشىقتىقتا, وشاعى 10 كيلومەتر تەرەڭدىكتە ورنالاسقان. ەكۆادوردىڭ ۆيتسە-پرەزيدەنتى حورحە گلاس ەسپينەلدىڭ ايتۋىنشا, تابيعات اپاتىنان 588 تۇرعىن ءتۇرلى دەڭگەيدە جاراقات الدى. ال قازا تاپقانداردىڭ سانى الداعى ۋاقىتتا ءالى دە ارتۋى مۇمكىن دەگەن بولجام بار.
El Comercio باسىلىمى گۋاياكيل قالاسىندا جەر سىلكىنىسىنىڭ سالدارىنان ۇلكەن كوپىر بىرنەشە كولىكتىڭ ۇستىنە قۇلاعانىن حابارلادى. ال كۋاگەرلەر بىرنەشە ساۋدا ورتالىعىنا شىعىن كەلگەنىن ايتتى. جەر استى ءدۇمپۋىنىڭ سالدارىنان قالا تۇرعىندارى باسپانالارىن تاستاپ كەتۋگە ءماجبۇر بولدى.
وڭتۇستىك امەريكا ەلىندەگى اپاتتان بىرنەشە عيماراتتار, تۇرعىن ۇيلەر قيراپ قالعان. بايلانىس جەلىلەرى ءۇزىلىپ, قالا تۇرعىندارى جىلۋسىز, بايلانىسسىز قالدى. ال Reuters اگەنتتىگى تاراتقان اقپاراتتا مەملەكەت استاناسى كيتو قالاسىندا ەلەكتروەنەرگيا جەلىسى قالپىنا كەلتىرىلدى.
ايان ءابدۋالي.
دەرەك, فوتو: تاسس.