بەلگىلى دەموگراف عالىم ماقاش ءتاتىموۆ قايتىس بولدى

استانا. 16 ءساۋىر. بۇگىن قازاقستاننىڭ ءبىرىنشى دەموگرافى, بەلگىلى عالىم ماقاش ءتاتىموۆ ۇزاققا سوزىلعان ناۋقاستان كەيىن قايتىس بولدى. بۇل تۋرالى Tengrinews.kz اقپارىنا سۇيەنگەن egemen.kz ءتىلشىسى حابارلادى. «16 ءساۋىر كۇنى تاڭەرتەڭ الماتىدا ۇزاققا سوزىلعان ناۋقاستان كەيىن قازاقستاندىق بەلگىلى عالىم, ەتنوگراف, رەسپۋبليكانىڭ ءبىرىنشى دەموگرافى, ساياساتتانۋ عىلىمدارىنىڭ دوكتورى, اكادەميك ماقاش ءتاتىموۆ قايتىس بولدى. ول ءوزىنىڭ 76 جاسقا تولۋىنا ەكى اپتا قالعاندا ومىردەن ءوتتى», - دەلىنگەن حابارلامادا. قايعىلى وقيعانىڭ ورىن العانىن مارقۇمنىڭ ۇلى مۇحيت ءتاتىموۆ راسقا شىعارعان. ماقاش بايعالي ۇلى ءتاتىموۆ 1940 جىلى 30 ساۋىردە الماتى وبلىسى, تالعار قالاسىندا تۋعان. ول ۆ.ي. لەنين اتىنداعى ماسكەۋ پەداگوگيكالىق ۋنيۆەرسيتەتىن (1966), ماسكەۋ ەكونوميكالىق ستاتيستيكا ينستيتۋتىنىڭ اسپيرانتۋراسىن (1969) بىتىرگەن. 1970–1993 جىلدارى قازاق كسر عىلىم اكادەمياسى فيلوسوفيا جانە قۇقىق ينستيتۋتىنىڭ ۇلتارالىق قاتىناستاردى زەرتتەۋ ورتالىعىندا كىشى, اعا جانە جەتەكشى عىلىمي قىزمەتكەر بولىپ ىستەدى. 1931–1933 جىلدارى «گولوششەكيندىك گەنوتسيدتىڭ», 1937–1938 جىلدارى ستاليندىك قۋعىن-سۇرگىننىڭ, ەكىنشى دۇنيەجۇزىلىك سوعىس مايداندارىندا قازا تاپقان قازاقتار شىعىنىن, توتاليتاريزم ءۇشىن «سەنىمسىز» حالىقتاردىڭ قازاقستانعا قونىس اۋدارىلۋىنىڭ ساياسي سەبەپتەرىن اشىپ كورسەتۋ جونىندەگى ءتۇرلى كوميسسيالاردىڭ جۇمىسىنا, سونداي-اق 1986 جىلى وقيعاعا قاتىسقان جاستاردى ساياسي-قۇقىقتىق اقتاۋ ۇدەرىسىنە قاتىستى. حالىقارالىق ستاتيستيكا دەرەكتەرىنە سۇيەنە وتىرىپ, تۇڭعىش رەت دۇنيە جۇزىندەگى تۇركى تىلدەس حالىقتاردىڭ جالپى سانىن جاريالادى. 1990 جىلى «ازات» ازاماتتىق قوزعالىسىن قۇرۋعا قاتىسىپ, ونىڭ تەڭ توراعاسىنىڭ ءبىرى بولىپ سايلاندى. 1993–1996 جىلدارى قازاقستان رەسپۋبليكاسىنىڭ پرەزيدەنتى اپپاراتىندا اقپارات جانە تالداۋ ءبولىمىنىڭ اعا ساراپشىسى قىزمەتىن اتقاردى. ءتاتىموۆ كوشى-قون ساياساتىن تالداپ جاساۋشىلاردىڭ, شەت جۇرتتاعى قازاقتاردىڭ ەلگە ورالۋىن العاش ۇيىمداستىرۋشىلاردىڭ ءبىرى, قازاقستان رەسپۋبليكاسىنىڭ پرەزيدەنتى جانىنداعى وتباسى, ايەلدەر جانە دەموگرافيا ساياسات جونىندەگى ساباعاتتىق كەڭەستىڭ (1992–1997), ادام قۇقىقتارى جونىندەگى كوميسسيانىڭ (1992 جىلدان) مۇشەسى بولدى. 1997 جىلدان ورتالىق ازيا ۋنيۆەرسيتەتىنىڭ رەكتورى. «قۇرمەت» وردەنىمەن, كوپتەگەن مەدالدارمەن ماراپاتتالعان. مارقۇمنىڭ جانازاسى دۇيسەنبى, 18 ءساۋىر كۇنى ساعات 11:00-دە ورتالىق ازيا ۋنيۆەرسيتەتىندە وتەدى. قوناق اسىسى «الماتى-حولل» (ابىلايحان – جامبىل كوشەلەرىنىڭ قيىلىسى) رەستورانىندا ساعات 14:00-دە بەرىلەدى. تالعات رايىمبەك. دەرەك, فوتو: egemen.kz.