تاۋەلسىزدىكتىڭ 25 جىلدىعىن تۋ ەتىپ, شالعايداعى ەلدى مەكەندەردى ءبىر ايدان استام ءجۇرىپ وتكەن «ماڭگىلىك ەل» پويىزى ناۋرىزدىڭ 18-ءى كۇنى الماتىنىڭ 2-ءشى تەمىرجول بەكەتىنە كەلىپ توقتاعانىن بۇعان دەيىن حابارلاعان بولاتىنبىز. جالپىۇلتتىق «ماڭگىلىك ەل» الەۋمەتتىك باستاماسى جارشىلارىنىڭ قاتارىنداعى ەڭ ۇزدىك دارىگەرلەردەن جاساقتالعان توپ پويىزدان تۇسە سالىسىمەن الماتىنىڭ العاباس شاعىن اۋدانىندا ورنالاسقان №29 ەمحاناعا جول تارتتى. الماتى قالالىق دەنساۋلىق ساقتاۋ باسقارماسىنىڭ باسشىسى ءۋاليحان احمەتوۆ ەلىمىزدىڭ مەديتسينا سالاسىنىڭ ەڭ ۇزدىك دارىگەرلەرىن قارسى الىپ, ولاردىڭ جۇمىسىنا ساتتىلىك تىلەدى.
ارىپتەستەرىمىزدى «ماڭگىلىك ەل» پويىزىمەن ۇلكەن قايىرىمدىلىق شاراسىن اتقارىپ كەلگەن قىزمەتىمەن قۇتتىقتايمىز, دەدى شاھاردىڭ باس دارىگەرى. دەنساۋلىق ساقتاۋ باسقارماسى قالاعا الماتى وبلىسىنان جاڭادان قوسىلعان اۋدانداردا مەكەندەيتىن تۇرعىنداردىڭ دەنساۋلىعىن ءاردايىم نازاردا ۇستايدى. ءبىز بۇل جولى كاسىبي ماماندار ءۇشىن العاباس شاعىن اۋدانىنداعى بىلتىر پايدالانۋعا بەرىلگەن №29 ەمحانانى ارنايى تاڭدادىق. بۇگىن ءبىزدىڭ تۇرعىندارعا الەۋمەتتىك پويىزدىڭ ماماندارى مەن قالانىڭ وزگە مەديتسينالىق ۇيىمدارى جانە رەسپۋبليكالىق عىلىمي-زەرتتەۋ ينستيتۋتتارى, ۇلتتىق ورتالىقتاردىڭ تاجىريبەلى ماماندارى مەديتسينالىق كومەك كورسەتەدى. دارىگەرلەرىمىز 9-10 شاقتى ەمحانانىڭ ناۋقاستارىنا الدىن الا زەرتتەۋ جۇرگىزىپ, ولار بىلىكتى كاسىبي مامانداردان كەڭەس الۋعا كەلدى. وسىلايشا, «ماڭگىلىك ەل» الەۋمەتتىك پويىزىنىڭ دارىگەرلەرىنەن 70-تەن استام الماتىلىق مەديتسينالىق كەڭەس الدى. اسىرەسە, كارديولوگ, وفتالمولوگ, ەندوكرينولوگ جانە نەفرولوگ قىزمەتىنە جۇگىنگەندەر كوپ بولدى.
– بۇل يگى شارا دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باستاماسىمەن ەلىمىزگە ەنگىزىلگەن جوعارى تەحنولوگيالىق مامانداندىرىلعان مەديتسينالىق كومەكتەردى تەك ۇلكەن قالالاردا عانا ەمەس, شوعىرلانعان شالعاي ەلدى مەكەندەردەگى قازاقستاندىقتارعا قولجەتىمدىلىگىن ارتتىرۋ ماقساتىندا جۇرگىزىلدى, – دەدى دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ستاتسيونارلىق كومەكتى ۇيىمداستىرۋ باسقارماسىنىڭ باسشىسى ن.قىدىرباەۆ.
– شارا بارىسىندا ماماندار كومەك سۇراپ كەلگەن ناۋقاستاردىڭ بارلىعىن كورىپ, ولاردىڭ اراسىنان جەدەل مەديتسينالىق كومەكتى قاجەت ەتەتىن 400-دەن استام ناۋقاسقا استانا جانە الماتىداعى عىلىمي ورتالىقتارىندا ەمدەلۋگە جولداما بەردى. بۇل ىستە ءارى قاراي بەكىتىلگەن دارىگەرلەر ناۋقاستارعا جولداما بەرۋدى جالعاستىرادى. ءسويتىپ, ولار جوعارى مامانداندىرىلعان عىلىمي ورتالىقتاردا ەمدەلۋگە مۇمكىندىك الماق. 2011-2015 جىلدارى «سالاماتتى قازاقستان» مەملەكەتتىك باعدارلاماسى اياسىندا ەلىمىزدىڭ دەنساۋلىق ساقتاۋ نىساندارىنا كوپتەگەن تەحنولوگيالار كەلدى. بۇدان 10-11 جىل بۇرىن جۇرەك ترانسپلانتاتسياسى سيرەك بولسا, وسىنداي باعدارلامالار مەن مەملەكەتتىك ساياساتتىڭ ارقاسىندا ءبىز ۇلكەن جەتىستىكتەرگە قول جەتكىزىپ وتىرمىز. بۇگىندە بارلىق وبلىس ورتالىقتارىندا جۇرەك, باۋىر, بۇيرەككە وپەراتسيا جاسالادى. بۇل «سالاماتتى قازاقستان» باعدارلاماسىنىڭ قيسىندى جالعاسى بولىپ تابىلادى. الدىڭعى باعدارلامادا جوعارى تەحنولوگيالار ەنگىزىلسە, كەلەسى باعدارلاما ساقتاندىرۋ مەديتسيناسى, العاشقى مەديتسينالىق كومەكتى دامىتۋ, اۋرۋدىڭ الدىن الۋعا باۋلۋ, اركىمنىڭ ءوز دەنساۋلىعىنا جاۋاپكەرشىلىكپەن قاراۋعا ۇيرەتەدى.
گۇلزەينەپ سادىرقىزى,
«ەگەمەن قازاقستان».
الماتى.