كەشە قازاقستان رەسپۋبليكاسىنىڭ باس پروكۋرورى بەرىك اسىلوۆتىڭ توراعالىعىمەن زاڭدىلىقتى, قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسىنىڭ وتىرىسى ءوتتى. جيىننىڭ باستى تاقىرىبى – كيبەرقىلمىسقا قارسى ءىس-قيمىل شارالارىنىڭ تيىمدىلىگى مەن بۇل باعىتتاعى پرواكتيۆتى جۇمىس ناتيجەلەرى بولدى, دەپ حابارلايدى Egemen.kz.
القالى جيىنعا پرەزيدەنت اكىمشىلىگىنىڭ وكىلدەرى, پارلامەنت دەپۋتاتتارى, قۇقىق قورعاۋ جانە ارنايى ورگانداردىڭ باسشىلارى, سونداي-اق قارجى ۇيىمدارى مەن بايلانىس وپەراتورلارىنىڭ وكىلدەرى قاتىستى.
وتىرىس بارىسىنداعى كيبەرقىلمىس دەڭگەيىنىڭ ايتارلىقتاي ازايعانى اتاپ ءوتىلدى. ستاتيستيكالىق مالىمەتتەرگە سۇيەنسەك, بيىلعى جىلدىڭ العاشقى ءۇش ايىندا مۇنداي قۇقىقبۇزۋشىلىقتار سانى 15,1 پايىزعا (6 216-دان 5 275-كە دەيىن) قىسقارعان.
بۇل وڭ ديناميكا مەملەكەت باسشىسى قاسىم-جومارت توقاەۆتىڭ قىلمىسپەن كۇرەستە رەاكتيۆتى ارەكەتتەن پرواكتيۆتى, ياعني قىلمىستىڭ الدىن الۋعا باعىتتالعان جۇيەلى جۇمىسقا كوشۋ جونىندەگى تاپسىرماسىنىڭ جەمىسى.
SMS-بلاستەر مەن ديپفەيك: باس پروكۋراتۋرا 18 جاڭا كيبەرقاۋىپتى انىقتادى
كيبەرقىلمىسكەرلەردىڭ جولىن كەسۋ ماقساتىندا نەسيە بەرۋ سالاسىندا بىرقاتار «توسقاۋىلدار» قويىلدى:
«سالقىنداۋ كەزەڭى»: ازاماتتارعا اسىعىس نەسيە راسىمدەۋگە جول بەرمەيتىن ۋاقىت ارالىعى ەنگىزىلدى. العاشقى قارىزدى الۋ كەزىندە ازاماتتىڭ بانكتە مىندەتتى تۇردە جەكە بولۋ تالابى بەكىتىلدى. بيومەتريالىق سايكەستەندىرۋ مەن وزگە دە تسيفرلىق كەدەرگىلەر ىسكە قوسىلدى.الاياقتىق قوڭىراۋلاردىڭ الدىن الۋ ءۇشىن بايلانىس سالاسىندا دا تۇبەگەيلى وزگەرىستەر جاسالدى. اتاپ ايتقاندا, SIM-بوكستاردى پايدالانۋعا تىيىم سالىنسا, ابونەنتتەردى بيومەتريالىق تىركەۋ مەن انتيفرود-جۇيەلەردى قولدانۋ وپەراتورلار ءۇشىن مىندەتكە اينالدى.
سونىمەن قاتار الاياقتارعا ءوز شوتتارىن بەرىپ, اقشا جىلىستاتۋعا كومەكتەسەتىن «دروپپەرلەر» ءۇشىن قىلمىستىق جاۋاپكەرشىلىك ەنگىزىلدى. قىلمىستىق كودەكستىڭ جاڭادان ەنگىزىلگەن 232-1-بابى بويىنشا بۇگىندە 446 ءىس تىركەلىپ ۇلگەرگەن.
ساق بولىڭىز: الاياقتار مەديتسينا قىزمەتكەرى رەتىندە حابارلاسا باستادى
ۇلتتىق بانك جانىنان قۇرىلعان انتيفرود-ورتالىقتىڭ جۇمىسى دا ناتيجەلى. ورتالىق ارقىلى الاياقتاردىڭ قولىنا ءتۇسۋى ءتيىس بولعان 2,8 ملرد تەڭگە ۋاقتىلى بۇعاتتالىپ, يەلەرىنە ساقتاپ قالدى.
بۇدان بولەك, قۇقىق قورعاۋ ورگاندارى تسيفرلىق اكتيۆتەر مەن كريپتوۆاليۋتالاردى ۇرلاۋ سحەمالارىن اشكەرەلەۋگە, سونداي-اق ۆيرتۋالدى ارنالار ارقىلى جاسالاتىن جاپپاي الاياقتىق شابۋىلدارعا قارسى كۇرەستى كۇشەيتتى.
جيىن سوڭىندا زاڭ مەن ءتارتىپتى نىعايتۋ باعىتىنداعى ۆەدومستۆوارالىق ىنتىماقتاستىقتى ودان ءارى ارتتىرۋ بويىنشا ناقتى مىندەتتەر بەلگىلەندى.