تۇركيانىڭ يزمير قالاسىندا ءبىلىم وشاعىنا قارۋلى شابۋىل جاساماق بولعان سەگىز ادامنان تۇراتىن توپ قولعا ءتۇستى. كۇدىكتىلەردىڭ باسىم بولىگى مەكتەپ جاسىنداعى جاسوسپىرىمدەر ەكەنى بەلگىلى بولدى, دەپ حابارلايدى Egemen.kz.
قۇقىق قورعاۋ ورگاندارىنىڭ مالىمەتىنشە, توربالى اۋدانىنداعى ليتسەي وقۋشىلارى WhatsApp مەسسەندجەرىندە ارنايى توپ قۇرىپ, وندا ورتا مەكتەپكە شابۋىل جاساۋ جوسپارىن تالقىلاعان. جاسوسپىرىمدەر بۇل ارەكەتتى بۇعان دەيىن شانلىۋرفا مەن كاحرامانماراشتا بولعان قايعىلى وقيعالارعا ۇقساس ستسەناري بويىنشا جۇزەگە اسىرماق بولعان كورىنەدى.
تۇركيادا وقۋشى مەكتەپتە اتىس شىعاردى: 16 ادام زارداپ شەكتى
تەرگەۋ امالدارىنىڭ ناتيجەسىندە سەگىز كۇدىكتى ۇستالدى. ولاردىڭ التاۋى – 17 جاستا, بىرەۋى – 18 جاستا, ال تاعى ءبىر مۇشەنىڭ جاسى ازىرگە ناقتىلانباعان. كۇدىكتىلەردىڭ ۇيلەرى مەن تسيفرلىق قۇرىلعىلارىن ءتىنتۋ بارىسىندا قىلمىس جوسپارىن ايعاقتايتىن بۇلتارتپاس دالەلدەر تاركىلەنگەن.
سوت شەشىمىمەن ۇستالعانداردىڭ ەكەۋى ۇيقاماققا الىنىپ, ەكەۋى سوت باقىلاۋىنا بەرىلگەن. تاعى ءۇش ءجاسوسپىرىم ۇيىنە جىبەرىلىپ, سەگىزىنشى كۇدىكتىگە قاتىستى بۇلتارتپاۋ شاراسى قانداي ەكەنى بەلگىسىز.