«سىرت كوز – سىنشى» دەيدى, بۇل رەتتە كەشە بولىپ وتكەن سايلاۋ بارىسىن حالىقارالىق ساراپشىلار كوزىمەن باعامداپ كورەلىك. ولار نە دەيدى ەكەن؟ وسى ورايدا, 20 ناۋرىزداعى پارلامەنت ءماجىلىسى دەپۋتاتتارىنىڭ كەزەكتەن تىس سايلاۋىن قاداعالاۋعا كورشىلەس رەسەيدەن كەلگەن ساراپشى لەونيد سلۋتسكيدى اڭگىمەگە تارتقان بولاتىنبىز.
– لەونيد ەدۋاردوۆيچ, قازاقستانداعى سايلاۋ بارىسىن كورشى مەملەكەتتەن كەلگەن مامان رەتىندە قالاي باعالايسىز؟
– سۇراعىڭىزعا ناقتى ءارى تياناقتى جاۋاپ بەرەر بولسام, ءبىرىنشى كەزەكتە قازاقستانداعى سايلاۋدى ءبىز سىرتتاعى سايلاۋلارمەن ەمەس, وسى ەلدىڭ وزىندە, بۇرىن بولىپ كەتكەن سايلاۋ كەزىمەن سالىستىراتىنىمىزعا نازار اۋدارعان ءجون. مىسالى, ءبىر جىل بۇرىنعى پرەزيدەنت سايلاۋىن اتاپ وتۋگە بولادى. قازاقستان ۋاقىت ساناپ سايلاۋ جۇيەسىن كونسترۋكتيۆتى تۇردە جەتىلدىرىپ كەلەدى. ال بۇگىنگى سايلاۋ بارىسىن كوتەرىڭكى كوڭىل-كۇي مەن ءپوزيتيۆتى بەتبۇرىسقا باعىتتالعان جاعدايدا ءوتتى دەۋگە نەگىز بار. داۋىس بەرۋ بارىسى, ياعني سايلاۋ ۇدەرىسى ادامدار ءۇشىن بارىنشا ىڭعايلى بولدى.
سايلاۋ ۋچاسكەلەرىنىڭ ىڭعايلى ورنالاسۋى ءتىپتى بولەك اڭگىمە. حالىقتىڭ داۋىس بەرۋگە دەگەن جوعارى دەڭگەيدەگى ىنتاسى, ولاردىڭ ۇمتىلىسى تاڭعالدىردى. جۇرتشىلىق جاپپاي تاڭعى ساعات 7-دەن باستاپ كىشكەنتەي بالالارىمەن, نەمەرەلەرىمەن كەلىپ جاتتى. بارلىعىنىڭ كوزىندە قۋانىش, بويىندا جاۋاپكەرشىلىك جۇگى اڭعارىلادى. مەرەكەلىك كوڭىل-كۇيدىڭ لەبى ەسەدى. حالىق قازاقستانداعى پارلامەنت سايلاۋىن پرەزيدەنت نۇرسۇلتان نازارباەۆتىڭ رەفورمالارىنىڭ ماڭىزدى ەلەمەنتى رەتىندە قابىلدايدى. قازاقستان xالقىنىڭ سايلاۋعا دەگەن قىزىعۋشىلىعى ءبىز ويلاعاننان دا جوعارى بولدى.
– ءوزىڭىز ايتىپ وتىرعانداي, حالىق جاپپاي داۋىس بەرۋگە ىنتا ءبىلدىردى. ياعني, بارلىعى جوعارى دەڭگەيدە ءوتتى. دەگەنمەن, سايلاۋ ۇدەرىسى كوپشىلىكتىڭ كەلۋىنەن تۇراتىندىقتان, قانداي دا ءبىر ولقىلىقتار, زاڭبۇزۋشىلىقتار مەن تۇسىنىسپەۋشىلىكتەر بايقالدى ما؟
– مەن ەشقانداي دا زاڭبۇزۋشىلىق ارەكەتتەرىن بايقاعان جوقپىن. بارلىعى سايلاۋ نورمالارىنا ساي بولدى. سايلاۋ بارىسىندا بىردە-ءبىر ولقىلىق ورىن المادى دەۋگە تولىق نەگىز بار. ءبىزدى قۇشاق جايا قارسى العان قازاقستاندىقتارعا ريزاشىلىعىمدى بىلدىرەمىن. بارلىعى جوعارى دارەجەدە ۇيىمداستىرىلعان. ءبىز تەك قانا وڭ ناتيجەلەردى كورىپ وتىرمىز. بىرنەشە سايلاۋ ۋچاسكەسىندە بولدىق, ازاماتتاردىڭ سايلاۋ بارىسىنداعى ارەكەتتەرى زاڭ بويىنشا جۇزەگە استى. جوعارىدا ايتقانىمداي, كەدەرگىلەر مەن كەمشىلىكتەر بايقالمادى. قازاقستان حالقىنا الداعى ۋاقىتتا تەك ءوسىپ-وركەندەي بەرىڭىزدەر دەگىم كەلەدى!
– راحمەت.
اڭگىمەلەسكەن
ەلميرا ماتىباەۆا,
«ەگەمەن قازاقستان».