مىندەتتەرىن ويداعىداي اتقاردى
ەلدىڭ كەلەشەك مۇددەسى ءۇشىن ماڭىزدى شارا پارلامەنت ءماجىلىسى مەن ءماسليحاتتار سايلاۋىنا اتىراۋ وبلىسىندا 244 بايقاۋشى تىركەلىپ, ولار ادىستەمەلىك سەمينار-ترەنينگتەردەن ءوتتى. بايقاۋشى وتكىلەتتىگى بەرىلگەن ازاماتتار پارلامەنت جانە جەرگىلىكتى ءماسليحاتتار سايلاۋلارى ناۋقانىنا تىڭعىلىقتى دايىندالىپ, سايلاۋ زاڭنامالار مەن حالىقارالىق تالاپتاردىڭ ساقتالۋىن قاداعالاۋعا بەيىمدەلدى. وسىعان وراي اتىراۋدا «قازاقستان رەسپۋبليكاسىنداعى سايلاۋدى بايقاۋ جونىندەگى رەسپۋبليكالىق كوميسسيا» رەسپۋبليكالىق قوعامدىق بىرلەستىگىنىڭ مۇشەسى سۇلتان قاليەۆتىڭ قاتىسۋىمەن اتىراۋ قالاسىندا جانە اۋدانداردا «بايقاۋشىنىڭ سايلاۋ ۇدەرىسىندەگى ءرولى» تاقىرىبىندا ارنايى سەمينار وتكىزىلدى. بۇل سەميناردىڭ باستى ماقساتى – بايقاۋشى وكىلەتتىگى بەرىلگەن ازاماتتاردى الداعى جاۋاپتى ىسكە دايىنداۋ, قولدانىستاعى سايلاۋ زاڭدىلىقتارى مەن حالىقارالىق نورمالاردىڭ ساقتالۋىن قاداعالاۋعا بەيىمدەۋ بولاتىن. ويتكەنى, ەلىمىزدەگى سايلاۋ بارىسىن بايقاۋشى ەڭ الدىمەن «سايلاۋ تۋرالى» كونستيتۋتسيالىق زاڭدى جەتە ءبىلۋى شارت. ولاردىڭ باستى مىندەتى –سايلاۋ ۇدەرىسىنىڭ زاڭدىلىق تالاپتارعا ساي جانە ءادىل ءوتۋىن قاداعالاۋ. وسى ماقساتتا قالا-اۋدان اۋماقتارىنداعى بايقاۋشىلار ءوز وكىلەتتىلىگىنە سايكەس سايلاۋ ۇدەرىسىن باقىلاۋ جۇمىستارىن جۇرگىزدى. ءبىزدىڭ بايقاۋشىلار ءبارى سەمينار-ترەنينگتەن ءوتتى. سونىمەن قاتار, اتىراۋ وبلىستىق اۋماقتىق سايلاۋ كوميسسياسىندا جانە سايلاۋ ۋچاسكەلەرىندە بولىپ, سايلاۋالدى دايىندىق جۇمىستارىمەن تانىستى. سايلاۋ كوميسسياسىنىڭ جۇمىستارى تالاپقا ساي, وتكەن جىلدارعا قاراعاندا پارتيالار اراسىندا سايلاۋ مادەنيەتىنىڭ وسكەندىگى, پارتيالاردىڭ ءوزارا قارىم-قاتىناسى جوعارى دەڭگەيدە ەكەنى بايقالدى. كەشە ءبىزدىڭ بايقاۋشىلار سايلاۋ ۋچاسكەلەرىنىڭ اشىلۋىنا قاتىستى. سونىڭ ىشىندە №43 سايلاۋ ۋچاسكەسىنەن كاسپي تەڭىزىندەگى «قاشاعان» كەن ورنىنا سايلاۋ بيۋللەتەندەرىن تىكۇشاقپەن جونەلتۋ ۇدەرىسىنە كۋا بولدىق. جالپى, اتىراۋداعى سايلاۋ ۇدەرىسى زاڭ تالاپتارىنا ساي ءوتتى. شىنارگۇل قايىروۆا, سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ اتىراۋ وبلىسى بويىنشا وڭىرلىك ورتالىعىنىڭ ءتورايىمى. اتىراۋ.اشىقتىق – اردىڭ ءىسى
انتون حاتەنوۆسكي, سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ الماتى وبلىسى بويىنشا وڭىرلىك ورتالىعىنىڭ مۇشەسى. پارلامەنت ءماجىلىسى مەن ءماسليحاتتار دەپۋتاتتارىن سايلاۋ الماتى وبلىسىنىڭ بارلىق ەلدى مەكەندەرىندە زاڭناما تالابىنا ساي ءوتتى. تىنىشتىق. ەرتەلەتە تالدىقورعانداعى №869 سايلاۋ ۋچاسكەسىنە كەلگەنىمدە ەكى ساعاتتاي سيرەك كەلگەن ەل كۇن كوتەرىلە تاڭعى ساعات 8-10 ارالىعىندا اعىلىپ بەردى. حالىقتىڭ بەلسەندىلىگى وتە جوعارى بولدى. جاستار دا, قارت ادامدار دا تولاسسىز كەلىپ ءوز تاڭداۋلارىن جاسادى. ونىڭ ءبىر سەبەبى ەشكىمگە ەشقانداي شەكتەۋ قويىلماي, سايلاۋدىڭ اشىق تا جاريالى تۇردە وتكىزىلگەندىگى بولار دەپ ويلايمىن. جالپى, ءبىزدىڭ تاراپىمىزدان ەشقانداي ەسكەرتپە جاسالعان جوق. ادامدار قاي پارتياعا, كىمگە داۋىس بەرەتىندىكتەرى انىق اڭعارىلىپ تۇردى. ءسويتىپ, جەتىسۋلىقتار دا كونستيتۋتسيالىق قۇقىقتارىنا ساي ازاماتتىق بورىشتارىن مادەنيەتتى تۇردە وتەدى. تالدىقورعان.