ءادىل وتكەنىنە سەنىمدىمىن

قاراعاندى وبلىسىندا سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ قاراعاندى وبلىسى بويىنشا وڭىرلىك ورتالىعى بيىلعى جىلدىڭ اقپان ايى­نان بەرى جۇمىس ىستەي باستادى. ەلىمىزدەگى اسا ماڭىزدى ناۋقاننىڭ اتا زاڭنىڭ اياسىندا اشىق تا ءادىل وتۋىنە مۇددەلى بۇل فيليالعا «قاراعاندى وبلىسىنىڭ ازاماتتىق اليانسى» قاۋىمداستىعىنىڭ پرەزيدەنتى, قازاقستان حالقى اسسامبلەياسى وبلىستىق فيليالىنىڭ مۇشەسى ناتاليا ۆشيۆتسەۆا باسشىلىق جاسايدى. – ءبىزدىڭ مىندەتىمىز قاراعاندى وبلىسىندا سايلاۋدى بايقاۋ جونىندەگى رەسپۋبليكالىق كوميسسيانىڭ جۇمىسىن كەشەندى تۇردە قامتاماسىز ەتۋ بولدى. ءبىز سايلاۋ ۇدەرىسىنىڭ بارلىق كەزەڭىنە مونيتورينگ جاساپ, سايلاۋدىڭ ءادىل, اشىق تۇردە وتۋىنە جانە دە زاڭدىلىقتىڭ ساقتالۋىنا ىقپال ەتۋگە كۇش سالدىق. سونىمەن قاتار, ءبىز ۇمىتكەرلەردىڭ كونستيتۋتسيالىق قۇقىقتارىنىڭ بۇزىلماۋىن, ولاردىڭ تەڭ جاعدايدا بولىپ, ءادىل تۇردە كۇرەسۋلەرىن بايقاستادىق, – دەپ باستادى بىزبەن اڭگىمەسىن ناتاليا ۆشيۆتسەۆا. – ناتاليا نيكولاەۆنا, قاراعاندى وبلىسىندا قانشا سايلاۋ ۋچاسكەسى جۇمىس ىستەدى جانە ءسىز باسقاراتىن فيليالدىڭ بايقاۋشىلارى وسى جاۋاپتى ناۋقانعا قانداي دايىندىقپەن كەلدى؟ – قاراعاندى وبلىسىندا 788 سايلاۋ ۋچاسكەسى جۇمىس ىستەدى. ونىڭ ىشىندە 38-ءى كىرىپ-شىعۋى شەكتەۋلى مەكەمەلەردە ورنالاسقان. وسى سايلاۋ ۋچاسكەلەرىنىڭ بارلىعىندا ءبىزدىڭ بايقاۋشىلار وزدەرىنە جۇكتەلگەن مىندەتتەردى تياناقتى جانە تولىققاندى تۇردە اتقارىپ شىقتى. جالپى, ءبىزدىڭ بايقاۋشىلارىمىز تاۋەلسىز, ءبىز سايلاۋ ۇدەرىسى كەزىندە قانداي دا ءبىر باسى بوتەن شارۋالارعا ارالاسقان جوقپىز. بار كۇشىمىزدى زاڭدىلىقتىڭ ساقتالۋىن بايقاستاۋعا جۇمسادىق. سوڭعى ون جىل ىشىندە ۇيىم دايارلاپ شىعارعان بايقاۋشىلار پرەزيدەنتتىك, سونداي-اق پارلامەنت سايلاۋلارىنا قاتىسىپ, مول تاجىريبە جيناعان بولاتىن. سول سەبەپتى سايلاۋ ناۋقانى كەزىندە بايقاۋشىلار تاراپىنان كەمشىلىكتەر مەن ىركىلىس بايقالمادى. – سايلاۋدى بايقاۋ جونىندەگى رەسپۋب­ليكالىق قوعامدىق كوميسسيانىڭ ءوڭىر­لىك فيليالى بايقاۋشىلارى تارا­پىنان ناۋقان بارىسىندا زاڭنىڭ بۇزىل­عان­دىعى جونىندە قانداي دا ءبىر ەسكەرتۋلەر بولدى ما؟ – ءبىزدىڭ جۇمىستاعى باستى باعىتتىڭ ءبىرى بايقاۋشىلاردى تياناقتى تۇردە دايارلاۋ بولدى. بۇل باعىتتا ءبىز ارنايى سەمينارلار مەن ترەنينگتەر ۇيىمداستىردىق. سونان كەيىن بايقاۋشىلاردىڭ «سايلاۋ تۋرالى» قازاقستان رەسپۋبليكاسىنىڭ زاڭىن جەتىك بىلۋىنە ەرەكشە ءمان بەردىك. سايلاۋ الدىندا ءبىز سايلاۋ كوميسسيالارىنىڭ, ساياسي پارتيالاردىڭ سايلاۋالدى شتابتارىنىڭ وكىلدەرىمەن كەزدەسىپ, ەلەكتوراتتىق ۇدەرىس سۋبەكتىلەرىنىڭ بارلىعىمەن سىن­دارلى تۇردە ارىپتەستىك نەگىزدەگى ءوز­ارا قارىم-قاتىناس ورناتتىق. مۇنىڭ ءوزى سايلاۋ بارىسىندا كەمشىلىكتەردىڭ, ءتۇر­لى ماسەلەلەردىڭ ورىن الماۋىنا زور ىقپالىن تيگىزدى. قولداعى بار مالىمەتتەرگە سۇيەنە وتىرىپ, ءبىزدىڭ قاراعاندى وبلىسىندا قازاقستان رەسپۋبليكاسى پارلامەنتى ءماجىلىسى مەن بارلىق دەڭگەيدەگى ءماسليحاتتار دەپۋتات­تارىنىڭ كەزەكتەن تىس سايلاۋى اشىق, ءادىل جانە بارلىق دەموكراتيالىق تالاپتارعا ساي ءوتتى دەپ تولىق سەنىممەن ايتا الامىن. – اڭگىمەڭىزگە راحمەت. اڭگىمەلەسكەن قايرات ءابىلدينوۆ, «ەگەمەن قازاقستان».  قاراعاندى.