كوكشەتاۋداعى «دوستىق» ۇيىندە وبلىستىق اكىمدىكتىڭ قولداۋىمەن قازاقستان حالقى اقمولا اسسامبلەياسى جانىنداعى انالار كەڭەسى قايىرىمدىلىق اۋكتسيونىن ۇيىمداستىردى. «قايىرىمدىلىق كەرۋەنى» رەسپۋبليكالىق اكتسياسى اياسىنداعى شارا ءۇمىت ەسىمدى سابيگە قارجىلاي كومەك كورسەتۋ ماقساتىندا وتكىزىلدى.
– ءبارىمىزدىڭ كۇندەلىكتى ءومىرىمىز قاربالاسقا تولى. سول قاربالاس تىرشىلىكتىڭ قارەكەتىن جاسايمىز دەپ ءجۇرىپ, كومەككە مۇقتاج جانداردى ۇمىتىپ كەتەتىنىمىز دە شىندىق. بىراق, ءبىر ساتكە اينالامىزداعى ادامدارعا كوز سالىپ, قولدان كەلگەنشە جاردەمدەسۋگە كوڭىل ءبولۋىمىز قاجەت. وزگەلەرگە جاقسىلىق جاساۋ ناعىز ازاماتتىقتىڭ بەلگىسى, – دەدى قايىرىمدىلىق اۋكتسيونىن اشقان وبلىس اكىمىنىڭ ورىنباسارى نۇرلان نۇركەنوۆ.
وسىدان كەيىن بەس لوت ويناتىلدى. ساتىلىمعا «ءاۋلەت» مەكتەپتەن تىس جۇمىس ورتالىعى جانە ونەرپاز دارىندى بالالارمەن جۇمىس جۇرگىزۋ جونىندەگى وبلىستىق وقۋ-ادىستەمەلىك ورتالىعى وقۋشىلارىنىڭ قولىمەن جاسالعان ءارتۇرلى شىعارماشىلىق جانرداعى بۇيىمدار قويىلدى. قولونەر مەن قايىرىمدىلىقتى ۇشتاستىرعان مەكتەپ وقۋشىلارىنىڭ يگى ءىستىڭ ۇيىتقىسى بولا بىلۋىنە جۇرتشىلىق ريزاشىلىعىن ءبىلدىردى.
اۋكتسيون بارىسىندا زالدا جينالعان قاۋىم ءاربىر لوتتى قالت جىبەرمەي, بەلسەندىلىك تانىتتى. الدىمەن اعاشتان ويىلعان «التىن بالىق» ساۋداعا قويىلدى. ونى كوكشەتاۋداعى «اپ-يمپەكس» سەرىكتەستىگىنىڭ ديرەكتورى جۇماباي ءامىرجانوۆ باستاپقى قۇنىنان ون ەسە ارتىق باعاعا ساتىپ الدى. وسىدان كەيىن-اق بەلسەندىلىك ارتا ءتۇستى. جۇرتشىلىق اقمولا وبلىسى اكىمى اپپاراتى جانىنداعى «قوعامدىق كەلىسىم» مەكەمەسىنىڭ ديرەكتورى مۇناربەك باتىرحانوۆتىڭ, «اقمولا وبلىسىنىڭ ورىس قاۋىمداستىعى» قوعامدىق ءبىرلەستىگىنىڭ جەتەكشىسى الەكساندر ارتەمەنكونىڭ, تاعى باسقالاردىڭ جومارتتىعىنا قول سوقتى.
شارا قورىتىندىسىندا, ارنايى قۇرىلعان ەسەپ كوميسسياسى جينالعان قاراجاتتى ساناپ, ونى قازاقستان حالقى اقمولا اسسامبلەياسى جانىنداعى انالار كەڭەسىنىڭ ءتورايىمى زەرە قيىقوۆا سىرقات ءسابيدىڭ اناسى گۇلنار زەينۋلليناعا تاپسىردى.
سىرقات ءسابيدىڭ اناسى بالا تاعدىرىنا جاناشىرلىق تانىتقان «انالار كەڭەسىنە», قايىرىمدى جاندارعا, قيىن ساتتە دەمەۋ بولعان جالپى جۇرتشىلىققا ريزاشىلىعىن ءبىلدىردى. جينالعان قاۋىم كىشكەنتاي ۇمىتكە جاسالاتىن الداعى كۇردەلى وتالاردىڭ ءساتتى وتۋىنە, كوپ ۇزاماي قۇلان-تازا ساۋىعىپ كەتۋىنە تىلەكتەستىگىن ايتتى.
باقبەرگەن امالبەك,
«ەگەمەن قازاقستان».
اقمولا وبلىسى.