استانا. 13 ناۋرىز. پاكىستاننىڭ كومىر شاحتاسىندا تۋننەل وپىرىلىپ, 7 ادام قازا تاپتى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى.
توتەنشە وقيعا پاكىستاننىڭ وراكزاي ايماعىندا ورىن الدى. شاحتانىڭ وپىرىلۋى سالدارىنان 10 جۇمىسشى جاراقات الىپ, جەر استىندا 45 كەنشى قۇتقارىلماي قالدى. جەرگىلىكتى اقپارات قۇرالدارىنىڭ حابارلاۋىنشا, اپات كەزىندە شاحتادا 60-تان استام ادام بولعان.
ايتا كەتەيىك, وقيعا ورنىنا توتەنشە جاعداي قىزمەتىنىڭ ماماندارى كەلگەنىمەن, كەنشىلەردى جەر استىنان الىپ شىعۋعا ارنالعان قۇرال-جابدىقار جەتىسپەگەن. سونداي-اق, قۇتقارۋ وپەراتسياسىنا قاراڭعىلىق پەن جاۋىن-شاشىن كەدەرگى كەلتىرۋدە.
تالعات رايىمبەك.
دەرەك, سۋرەت: 24.kz.