استانا. 12 ناۋرىز. قاندارى قۇرامىنان مەلدوني اتتى تىيىم سالىنعان پرەپارات تابىلعان سپورتشىلار سانى 99 ادامعا جەتىپ جىعىلدى. بۇل تۋرالى ras.kz-كە سىلتەمە جاساعان egemen.kz ءتىلشىسى حابارلادى.
بۇكىلالەمدىك انتيدوپينگىلىك اگەنتتىكتىڭ (WADA) رەسمي وكىلى بەن نيكولستىڭ ايتۋىنشا, اڭگىمە 2016 جىلدىڭ 1 قاڭتارىنان قولدانۋعا تىيىم سالىنعان پرەپاراتتار تىزىمىنە كىرگەن مەلدونيدى پايدالانعاندارى انىقتالعان سپورتشىلار تۋرالى بولىپ وتىر. ناۋرىزدىڭ 8-ءى كۇنى 60 بولعان ولاردىڭ قاتارى 11 ناۋرىزدا 99-عا جەتكەن. ازىرگە بۇل تىزىمدەگى 12 سپورتشىنىڭ عانا اتى جۇرتقا بەلگىلى. بۇلاردىڭ اراسىندا 8 رەسەيلىك سپورتشى بار. ولاردان بولەك, ۋكرايننىڭ 2 ءبياتلونيسى, گرۋزيننىڭ 1 پالۋانى, شۆەدتىڭ 1 جەڭىل اتلەتى اتالادى.
ال مەلدونيدى جاساۋشى لاتىن مامانى يۆار كالنينش اتالمىش پرەپاراتتى دوپينگ دەپ ەسەپتەۋگە قارسىلىق تانىتتى. ول مۇنىڭ تەك جۇرەكتىڭ قىزمەتىن جاقسارتۋعا عانا قىزمەت ەتەتىنىن ايتادى. سوندىقتان مىنا ارەكەتتى ادام قۇقىعىنا قول سۇعۋ دەپ باعالايدى.
مەلدونيدىڭ دۇربەلەڭىنە بايلانىستى رەسەي سىرتقى ىستەر ءمينيسترى سەرگەي لاۆروۆ تا ءوزىنىڭ كەلىسپەۋشىلىگىن ءبىلدىردى. ول WADA-دان مەلدونيگە بايلانىستى تۇسىنىكتەمە بەرۋدى تالاپ ەتتى
تالعات رايىمبەك.
دەرەك, سۋرەت: ras.kz.