«ماڭگىلىك ەلدىڭ» شالقارداعى شۋاقتى ساتتەرى

شالقارلىقتار قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان مەرەيتويلىق شارالار اۋقىمىندا قالىپتاستىرىلعان «ماڭگىلىك ەل» الەۋمەتتىك پويىزىن قوناقجايلىقپەن قارسى الدى. بۇل اۋداندا 12 اۋىلدىق وكرۋگتى قامتيتىن 46 500-دەن استام حالىق تۇرادى. شالقارعا پويىز ءوڭىردىڭ ايتەكە بي اۋدانىنا, اقتوبە قالاسىنا ايالداعاننان كەيىن كەلدى. ماقساتى – الەۋمەتتىك باعىتتا كومەكتەر كورسەتۋ, جەرگىلىكتى تۇرعىندارعا «100 ناقتى قادام» ۇلت جوسپارى جايىندا ءتۇسىندىرۋ جانە اۋىل تۇرعىندارىمەن كەزدەسىپ, سۇراقتارىنا جاۋاپ بەرۋ. قوناقتاردى قارسى العان اۋدان اكىمى ەربول داناعۇلوۆ قاسيەتتى شالقار جەرىنە تابان تىرەگەن ەل بىرلىگىن تۋ ەتىپ جۇرگەن ازاماتتاردىڭ قادامدارىنا ساتتىلىك, ەڭبەكتەرىنە تابىس تىلەدى. شاشۋ شاشىلىپ, اۋدان كوركەمونەرپازدارى بي بيلەپ, ولەڭ-جىرلارىن ارنادى. شالقار قالالىق ارداگەرلەر ۇيىمىنىڭ توراعاسى امانكەلدى قالىباەۆ اق باتاسىن بەردى. «ماڭگىلىك ەل» الەۋمەتتىك پويىزىنىڭ جەتەكشىسى ءامىرجان الپەيىسوۆ كورسەتىلىپ جاتقان شالقارلىقتاردىڭ قۇرمەتى ەلباسى ن.ءا.نازارباەۆتىڭ ەل بىرلىگىن قالىپتاستىرۋداعى يگى ىسىنە دەگەن قۇرمەت دەپ باعالادى. جانە قازاقى سالت-ءداستۇرىنىڭ قايماعى بۇزىلماعان شالقار ەلىنە قادام باسقاندارىنا قۋانىشتى ەكەندەرىن ءبىلدىردى. «ءبىز مۇندا ءوز وتانىن سۇيەتىن جاندارمەن كەزدەسىپ وتىرمىز. سىزدەردىڭ جۇزدەرىڭىزدەن ەرتەڭگى كۇنگە دەگەن سەنىمدى, ەلدىڭ وركەندەي ءتۇسۋى ءۇشىن جۇمىس ىستەۋگە دەگەن قۇلشىنىستى كورىپ تۇرمىز. 2016 جىل – ايرىقشا جىل, ءبىز ونى الەۋمەتتىك پروبلەمالاردى شەشۋمەن باستاپ وتىرمىز», – دەدى ءا.الپەيىسوۆ. پويىزدىڭ قۇرامىندا قا­زاق­ستان حالقى اسسامبلەياسىنىڭ مۇشەلەرى, عالىمدار, ساراپشىلار, دارىگەرلەر كەلگەن. ولاردىڭ ارقاي­سىنىڭ حالىققا الەۋمەتتىك كومەك كورسەتۋ, بەس ينستيتۋتتىق رەفورمانى ءتۇسىندىرۋ, كونسۋلتاتيۆتىك جاردەم بەرۋ جونىندە ءوز جوسپارلارى بار. «ماڭگىلىك ەل» الەۋمەتتىك پويىزىنىڭ مۇشەلەرى شالقارعا تابان تىرەسىمەن ءوز سالالارى بويىنشا توپقا ءبولىنىپ, جوس­پارلى جۇمىستارىنا كىرىستى. اتالمىش پويىز كەلە جاتىر دەگەننەن قۇلاعدار بولعان جەرگىلىكتى تۇرعىندار ونىڭ ماقسات- مىندەتىن جەرگىلىكتى گازەتتەردەن وقىپ, الدىن الا ءبىلىپ وتىرعان ەدى. سوندىقتان بولار, پويىز قۇرامىنداعى ءاربىر سالا ماماندارىمەن جۇزدەسۋشىلەر قاتارى كوپ بولدى. دارىگەرلەر اۋداندىق ەمحانادا تۇرعىنداردى قابىلداپ, تەگىن كەڭەس بەردى. كەلگەن مەديتسينا وكىلدەرىنە ءبىر كۇندە 602 ادام قارالىپ, كەڭەس العان. ولاردىڭ قاتارىندا باستى بايلىقتىڭ بۇتىندىگى جولىندا تابانىن توزدىرىپ جۇرگەن جاندار دا بار. ءبىلىم جانە عىلىم مينيسترلىگى جانە جاستار ساياساتى دەپارتامەنتىنىڭ وكىلدەرى №1 مەكتەپ-گيمنازيادا بولىپ, اۋدان جاستارىمەن كەزدەستى. قوناقتاردى 92 جىلدىق تاريحى بار قارا شاڭىراقتىڭ باسشىسى امانگەلدى قوناقباەۆ قارسى الىپ, مەكتەپتىڭ وتكەنى مەن بۇگىنى تۋرالى ايتىپ بەردى. اۋداندىق جاس­تار رەسۋرستىق ورتالىعىنىڭ اتسالىسۋىمەن مەكتەپتىڭ اكت زالىندا ەل تاۋەلسىزدىگىنىڭ 25 جىلدىعىن باستى ۇران ەتكەن «ايبىنى اسقاق ازات ەل» اتتى مەرەكەلىك شارا ءوتتى. «تاۋەلسىزدىككە – تاعزىم» اتتى اۋداندىق جاس اقىندار ايتىسىندا اقتوعاي اۋىلدىق وكرۋگىنەن كەلگەن قايرات قويشىباەۆ باس جۇلدەگە يە بولسا, ءى ورىنعا سارىساي اۋىلىنىڭ تۇرعىنى دانيار كەۋلىمجاي لايىقتى دەپ تانىلدى. «ماڭگىلىك ەل» الەۋمەتتىك پويىزىنىڭ شالقار اۋدانىنداعى سالتاناتتى قورىتىندىسى مادەنيەت ۇيىندە ۇلكەن مەرەكەگە ۇلاسىپ, مەيماندار مەن ەل ازاماتتارى ەستەلىك سۋرەتتەرگە ءتۇستى. وسى ءبىر شۋاقتى ساتتەر شالقارلىقتاردىڭ ەسىندە ادەمى اسەرمەن قالدى, ولار الداعى سايلاۋدا ەلدىكتىڭ بىرلىگىن, ىنتىماقتىڭ جاراستىعىن نىعايتاتىندىقتارىن ايقىن اڭعارتتى. ساتىبالدى ءساۋىرباي, «ەگەمەن قازاقستان», مۇحتار مىرزالين, جۋرناليست. اقتوبە وبلىسى.