كەشە ورتالىق كوممۋنيكاتسيالار قىزمەتىندە قارجى مينيسترلىگىنىڭ دامۋ جانە جاڭعىرتۋ دەپارتامەنتىنىڭ ديرەكتورى ەرجان ءبىرجانوۆ ءباسپاسوز ءماسليحاتىن وتكىزدى. ول «100 ناقتى قادام» ۇلت جوسپارى اياسىندا مەملەكەتتىك كىرىستەر كوميتەتىنىڭ حالىققا كورسەتىپ وتىرعان قىزمەتتەرى جونىندە اڭگىمەلەدى.
دەپارتامەنت ديرەكتورى مەملەكەتتىك كىرىستەر ورگاندارى مەملەكەتتىك قىزمەتتىڭ 53 ءتۇرىن كورسەتەتىنىن ايتتى. ونىڭ 32-ءسى سالىقتىق باعىت بويىنشا, ال 20 قىزمەت كەدەندىك جانە 1 ەكونوميكالىق قىزمەت كورسەتەتىنىن تاپتىشتەدى. سونداي-اق, سالىقتىق باعىتتاعى 24 قىزمەت بالامالى نەگىزدە حالىققا قىزمەت كورسەتۋ ورتالىقتارى ارقىلى اتقارىلادى ەكەن. نەگىزى بۇگىنگى تاڭدا 53 قىزمەتتىڭ 65 پايىزى ەلەكتروندى تۇردە جۇرگىزىلەتىن كورىنەدى. «وتكەن جىلدىڭ قورىتىندىلارى جونىندە ايتار بولسام, جىل بويى 16 ميلليوننان استام ادامعا مەملەكەتتىك قىزمەت كورسەتىلگەن. مەملەكەت باسشىسىنىڭ تاپسىرماسىنا وراي جانە «100 ناقتى قادامداعى» مىندەتتەردى جۇزگە اسىرۋ ماقساتىندا اۋقىمدى جۇمىستار اتقارىلىپ جاتىر. سالىق جانە كەدەندىك باعىتتا تولەنەتىن اقىلاردى الۋ جۇيەلەرى بارىنشا جەتىلدىرىلىپ, حالىققا قولايلى ءارى ءتيىمدى جولدارى جاسالۋدا. سەبەبى زاڭ دا, جۇيە دە تەك سالىق تولەۋشىلەردىڭ تالابىنا وراي جاسالعاندا عانا قارجىنىڭ كىرىس جاعى مولايا تۇسپەك», دەدى ە.ءبىرجانوۆ.
سپيكەردىڭ ايتقانىنا يلانساق, بىلتىر «ورتالىقتاندىرىلعان بىرىزدەندىرىلگەن جەكە شوتتار» اقپاراتتىق جۇيەسى ەنگىزىلگەن. «بۇل جۇيە جەكە شوتتاردىڭ جۇرگىزىلۋىن ەسەپكە الۋ بويىنشا بيزنەس-ۇدەرىستى وڭايلاتۋعا مۇمكىندىك بەردى. وبجش اج ەنگىزۋ شەڭبەرىندە 2015 جىلى شىلدەدە سالىقتىق جانە كەدەندىك تولەمدەر بويىنشا بيۋدجەتتىك سىنىپتاما كودتارىنا قىسقارتۋلار جۇرگىزىلدى. ناتيجەسىندە 57 پايىزعا قىسقاردى. ستاتيستيكالىق كورسەتكىشتەرگە سايكەس مۇنداي قىسقارتۋ حالىققا جانە بيزنەس ءۇشىن ءتيىمدى بولعان. سونىڭ ناتيجەسىندە تولەم قۇجاتتارىنىڭ سانى 2,8 ملن. تولەمگە نەمەسە 18,2 پايىزعا كەمىدى», دەدى ۆەدومستۆو باسشىسى.
شارا بارىسىندا مەملەكەت باسشىسىنىڭ تاپسىرماسىنا وراي كانادامەن اۆستراليانىڭ ۇلگىسىمەن «ازاماتتار ءۇشىن ۇكىمەت» مەملەكەتتىك كورپوراتسياسىن قۇرۋ جونىندە ايتقان دەپارتامەنت ديرەكتورى, بۇعان دەيىن ءتيىمدى جۇزەگە اسىرىلعان حالىققا قىزمەت كورسەتۋ ورتالىقتارى مەن «ءبىر تەرەزە» جۇيەسىنىڭ ناتيجەلى تۇستارىنا توقتالدى. ءسويتىپ, «ازاماتتار ءۇشىن ۇكىمەت» كورپوراتسياسى اتالعان قىزمەت تۇرلەرىنىڭ زاڭدى جالعاسى ەكەنىن جەتكىزدى. «بۇل جاڭا قۇرىلىمعا قازىر جۇمىس ىستەپ تۇرعان «حالىققا قىزمەت كورسەتۋ ورتالىعى», «جىلجىمايتىن م ۇلىك ورتالىعى», «جەر كاداسترى عىلىمي-وندىرىستىك ورتالىعى», «زەينەتاقىلار تولەۋ جونىندەگى مەملەكەتتىك ورتالىق» سىندى رەسپۋبليكالىق كاسىپورىندار بىرىكتىرىلىپ, بەيكوممەرتسيالىق اكتسيونەرلىك قوعام بولىپ قايتا قۇرىلادى. وسىلايشا جاڭا مەملەكەتتىك كورپوراتسيا اتالعان بارلىق حالىققا قىزمەت كورسەتۋ ورتالىقتارىن بىرىڭعاي جۇيەگە بىرىكتىرەدى. وسىنىڭ ارقاسىندا ازاماتتارعا بارلىق مەملەكەتتىك قىزمەتتەردى ءبىر جەردەن الۋعا مۇمكىندىك تۋادى», دەدى ە.ءبىرجانوۆ.
نۇرباي ەلمۇراتوۆ,
«ەگەمەن قازاقستان».