سوڭعى كۇندەرى ءماجىلىس پەن ءماسليحاتتار سايلاۋلارىنا حالىقتىڭ نازارى كۇرت ارتتى. سەبەبى تۇسىنىكتى, داۋىس بەرۋگە ساناۋلى كۇندەر قالدى. شىعىسقازاقستاندىق تۇرعىندار ەلىمىزدەگى سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ قىزمەتىنە بەلسەندى تۇردە قىزىعۋشىلىق تانىتىپ, سايلاۋ ۇدەرىسىنىڭ اشىقتىعىن قامتاماسىز ەتۋ جانە سايلاۋ ناۋقانى بارىسىنداعى زاڭ بۇزۋشىلىقتاردى بولدىرماۋ ءۇشىن سايلاۋدا بايقاۋشى بولۋ مۇمكىندىگىنە ايرىقشا كوڭىل ءبولىپ وتىر.
وڭىردە تاۋەلسىز بايقاۋشىلارعا ارنالعان وقىتۋ سەمينارلارى جەدەل قارقىنمەن جۇرگىزىلدى. ماسەلەن, وسكەمەن قالاسىندا – 110, سەمەي قالاسىندا – 124, زىريان اۋدانىندا – 78, ءۇرجاردا 73 بايقاۋشى دايىندالسا, ريددەر, كۋرچاتوۆ قالالارى مەن اباي اۋدانىندا دا سايلاۋدى بايقاۋشىلاردى ازىرلەگەن سەمينارلار وتكىزىلدى. تۇتاستاي العاندا, وبلىس كولەمىندە 800-گە جۋىق تاۋەلسىز بايقاۋشى وقىتىلدى.
شىعىس قازاقستان وبلىسىنداعى سايلاۋدىڭ ءوتۋ كەزەڭدەرىن باقىلاۋ جونىندەگى وڭىرلىك ورتالىعىنىڭ جەتەكشىسى ليۋدميلا گەيتسماننىڭ ايتۋىنشا, بايقاۋشىلار ءىس-ارەكەتىنىڭ تابيعاتى كوپشىلىكتىڭ كوڭىلىنەن شىعا بەرمەيتىنىنە قاراماستان, وبلىس تۇرعىندارى پارلامەنت ءماجىلىسى مەن ءماسليحاتتار سايلاۋلارىنا باقىلاۋشى رەتىندە قاتىسۋعا جانە وڭىرلىك ورتالىقتىڭ قىزمەتىنە ۇلكەن قىزىعۋشىلىق تانىتتى.
– بايقاۋشى بولۋعا نەگىزىنەن دارىگەرلەر, مۇعالىمدەر مەن زەينەتكەرلەر مۇددەلى بولدى. ولار قاجەتتى قۇجاتتاردىڭ تولىمدىلىعى مەن ساپاسىن, سايلاۋشىلار ءتىزىمىن, ۋچاسكەلەر شەكاراسى, قاجەتتى الاڭدار مەن قىزمەتكەرلەردىڭ بولۋىن قاداعالايدى, – دەدى ل.گەيتسمان.
سونداي-اق, سايلاۋدىڭ ءوتۋ كەزەڭدەرىن باقىلاۋ بويىنشا وڭىرلىك ورتالىعىنىڭ قىزمەتكەرلەرى مەن وڭىرلىك شتاب مۇشەلەرىنىڭ كەزدەسۋى بارىسىندا سايلاۋ كۇنىندەگى پارتيا اتىنان قاتىساتىن بايقاۋشىلاردىڭ قۇقىعىنا, وڭىرلىك شتاب پەن بايقاۋشىلاردىڭ ءوزارا تەحنيكالىق قىرى, سەنىم بىلدىرىلگەن ادامدار مەن بايقاۋشىلار اراسىنداعى بايلانىسى تالقىلاندى.
– ءبىزدىڭ نەگىزگى مىندەتىمىز – سايلاۋشىلار مەن پارتيالار اراسىنداعى تەڭدىكتى جانە سايلاۋدىڭ ادىلدىگىن قامتاماسىز ەتۋ. بايقاۋشى سايلاۋ ۋچاسكەسىندەگى وقيعالاردى زاماناۋي قۇرالدارمەن تىركەۋدى پايدالانىپ, قاجەتتىلىك تۋعان جاعدايدا الەۋمەتتىك جەلىلەردى بەلسەندى تۇردە قولدانۋى مۇمكىن. ءبىزدىڭ بايقاۋشىلار ءوز تاراپتارىنان اسا ماڭىزدى جانە پايدالى ميسسيانى ساتىمەن اتقارادى دەپ ۇمىتتەنەمىز, – دەدى وڭىرلىك ورتالىق جەتەكشىسى.
دۋمان اناش,
«ەگەمەن قازاقستان».
وسكەمەن.