كەشە ورتالىق سايلاۋ كوميسسياسىنىڭ وتىرىسى ءوتتى. وندا «2016 جىلعى 20 ناۋرىزعا تاعايىندالعان قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىنا جانە ءماسليحاتتارى دەپۋتاتتارىنىڭ كەزەكتى سايلاۋىنا حالىقارالىق ۇيىمداردىڭ بايقاۋشىلارىن اككرەديتتەۋ تۋرالى» قاۋلى قابىلداندى.
وسك مۇشەسى تاتيانا وحلوپكوۆا وسى قۇجاتقا سايكەس ورتسايلاۋكوم قازاقستان رەسپۋبليكاسى سىرتقى ىستەر مينيسترلىگىنىڭ ۇسىنۋى بويىنشا سايلاۋدى بايقاۋ جونىندەگى ەكى ميسسيادان جانە ءبىر حالىقارالىق ۇيىمنان تاعى 110 بايقاۋشىنى اككرەديتتەگەنىن ءمالىم ەتتى. «ولاردىڭ ىشىندە 34 بايقاۋشى – تمد بايقاۋشىلار ميسسياسىنان, 1 بايقاۋشى – شىۇ ميسسياسىنان جانە 75 بايقاۋشى ەقىۇ-نىڭ پارلامەنتتىك اسسامبلەياسىنان, – دەدى ت.وحلوپكوۆا. – شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋدى ورتسايلاۋكوم 2016 جىلعى 14 ناۋرىزعا دەيىن جۇزەگە اسىرادى».
كوميسسيا وتىرىسىندا, سونداي-اق, قازاقستان رەسپۋبليكاسى سىرتقى ىستەر مينيسترلىگىنىڭ 2016 جىلعى 10 ناۋرىزداعى №11/755 ۇسىنىمىنىڭ نەگىزىندە قازاقستان رەسپۋبليكاسى ورتالىق سايلاۋ كوميسسياسى يگور نيكولاەۆيچ موروزوۆتى ءتاۋەلسىز مەملەكەتتەر دوستاستىعىنان بايقاۋشىلار ميسسياسىنىڭ بايقاۋشىسى رەتىندە اككرەديتتەۋدىڭ كۇشىن جويدى جانە ونى شانحاي ىنتىماقتاستىق ۇيىمىنان بايقاۋشىلار ميسسياسىنىڭ بايقاۋشىسى رەتىندە اككرەديتتەدى.
ءاليسۇلتان قۇلانباي,
«ەگەمەن قازاقستان».