كەشە مەملەكەتتىك قىزمەت ىستەرى مينيسترلىگى مەن پرەزيدەنت جانىنداعى مەملەكەتتىك باسقارۋ اكادەمياسى بىرلەسىپ «مەملەكەتتىك قىزمەتتەگى زاماناۋي ۇدەرىستەر مەن رەفورمالار» اتتى كونفەرەنتسيا وتكىزدى. شاراعا مەملەكەتتىك قىزمەت ىستەرى ءمينيسترىنىڭ ورىنباسارى مەن قازاقستانداعى ەۋرووداق وكىلىنىڭ باسشىسى, ەلشى ترايان حريستەا جانە وڭىرلىك حابتىڭ باسقارۋشى كوميتەت توراعاسى ءاليحان بايمەنوۆ, سونداي-اق پرەزيدەنت جانىنداعى باسقارۋ اكادەمياسىنىڭ وكىلدەرى قاتىستى.
جيىنعا قاتىسۋشىلار ەۋروپا وداعىنىڭ «قازاقستان ۇكىمەتى مەملەكەتتىك قىزمەتى رەفورماسى جانە مودەرنيزاتسياسى» جوباسى اياسىنداعى جان-جاقتى پىكىرلەرىن ايتىپ, مەملەكەتتىك باسقارۋ بويىنشا ەۋروپا تاجىريبەسىن ينتەگراتسيالاۋعا باعىتتالعان باستامانى قولدايتىندارىن ءبىلدىردى. ءوز كەزەگىندە ەلشى ترايان حريستەا: «ەۋرووداق قازاقستان ۇكىمەتىمەن ءتۇرلى سالالاردا, ونىڭ ىشىندە مەملەكەتتىك باسقارۋ باعىتىنداعى رەفورمالارعا قولداۋ كورسەتۋ بويىنشا ىنتىماقتاسىپ كەلەدى. اتالعان جوبا بارىسىندا ەلەۋلى جەتىستىككە قول جەتكىزىلدى جانە الەمدىك تالاپتارعا ساي كەلەتىن, حالىقارالىق وزىق تاجىريبەگە سايكەستەندىرىلگەن مەملەكەتتىك قىزمەت جۇيەسى قۇرىلدى», – دەدى. ول, سونداي-اق, وسى كونفەرەنتسيانىڭ وتۋىنە مۇرىندىق بولعان مەملەكەتتىك قىزمەت ىستەرى مينيسترلىگى مەن پرەزيدەنت جانىنداعى اكادەمياعا ءوز ريزاشىلىعىن جەتكىزدى.
جالپى, كونفەرەنتسيادا مەملەكەتتىك باسقارۋ سالاسىنداعى قىزمەتكەرلەردىڭ ءبىلىمى مەن بىلىكتىلىگى ايتىلىپ, ولاردىڭ تاجىريبەسىن ارتتىراتىن جوبالار پىسىقتالدى. وسى ورايدا مەملەكەتتىك قىزمەت ىستەرى ءمينيسترىنىڭ ورىنباسارى يننا احمەتوۆا «قازاقستان ۇكىمەتى مەملەكەتتىك قىزمەتىنىڭ رەفورماسى جانە جاڭعىرتىلۋى» اتتى جوبا اياسىندا 171 مەملەكەتتىك قىزمەتكەر ءۇشىن 25 ساپار ۇيىمداستىرىلعانىن العا تارتتى.
كونفەرەنتسيا سوڭىندا قاتىسۋشىلار ەۋرووداق پەن قازاقستاننىڭ بىرلەسكەن جوباسى نەگىزىندە تاجىريبەسىن شىڭداپ, بىلىكتىلىگىن ارتتىرىپ جۇرگەن مەملەكەتتىك قىزمەتشىلەردىڭ سانىن ەسەلەۋ قاجەتتىگىن مالىمدەدى. ولار سونىمەن قاتار, اتالعان قىزمەتكەرلەردىڭ مارتەبەسىن كوتەرۋ بويىنشا دا جۇمىس جاساۋ كەرەكتىگىن ۇسىندى.
تالعات رايىمبەك,
«ەگەمەن قازاقستان».