ايەل زاتى – تابيعاتىنان سۇلۋ جاراتىلىس. وعان داۋ جوق. اسىرەسە, اسپەتى بولەك اسكەري كيىم كيگەن ايەل بالاسى استە ادەمى كورىنبەي مە؟ باسقاعا قالاي ەكەنىن بىلمەدىم, ءوزىم ءۇشىن سولاي. اسكەري كيىمدەگى ايەلدىڭ بەينەسىنەن نازىكتىك پەن ورلىكتىڭ ءورىمىن كورەمىن. سىرىم اۋداندىق پروباتسيا قىزمەتىنىڭ ينسپەكتورى جانگۇل بيسەمبيەۆانى كورگەندە مەن وسىلاي ءسۇيسىنىپ ەدىم. اقپارات سالاسىنىڭ ادامى بولعانىمىز سەبەپتى, بۇل ازاماتشانىڭ قىزمەتىنە جۇگىنگەن كەزدەرىمىز دە بولدى.
جانگۇل بيسەمبيەۆا – تاسقۇدىق اۋىلىنىڭ تۋماسى. جانگۇلدىڭ اكەسى عاني بيسەمبيەۆ العاشقى اسكەري دايىندىق ءپانىنىڭ مۇعالىمى-تۇعىن. اكەنىڭ قىزمەتتىك كيىمى بالا جانگۇلدى قاتتى قىزىقتىردى. جالتىراعان ىلگەكتەر, جاعالى جەيدەلەر, دوڭگەلەنگەن توبەسى بار باسكيىم – وسىنىڭ ءبارى قارشاداي قىزدى ارماننىڭ ارناسىنا سالدى دا جىبەردى. جانگۇل اسكەري قىزمەتكەر بولامىن دەپ شەشتى. ءسويتتى دە, مەكتەپ بىتىرە سالىسىمەن وڭتۇستىك استاناداعى اسكەري اكادەميالاردىڭ بىرىنە تۇسۋگە تالپىندى. تالپىنىستىڭ ءبارى ءساتتى بولا بەرمەيدى. بايلانىسشى بولامىن دەگەن جانگۇل سىناقتان ءسۇرىندى. بىراق, ارمانىنان اينىعان جوق. ءتۇپ اتاسى اسكەري قىزمەت قوي دەدى دە, ءوزىمىزدىڭ ورالداعى ەكونوميكا جانە قارجى كوللەدجىنەن «كەدەن ءىسى» بويىنشا جارتىجىلدىق كۋرستى وقىپ, مەڭگەرىپ الدى. كەيىن جوعارى وقۋ ورنىن «قۇقىقتانۋ» ماماندىعى بويىنشا اياقتادى. اۋداندىق ىشكى ساياسات ءبولىمىنىڭ ءىس جۇرگىزۋشىسى بولىپ جۇمىسقا ورنالاسقان ول كوپ ۇزاماي اۋداندىق پروكۋراتۋرانىڭ كەڭسە مەڭگەرۋشىسى قىزمەتىنە اۋىستى. وسى قىزمەت ارقىلى جاس مامان زاڭگەرلىك ءبىلىمىن شىڭداپ, جاقسى تاجىريبە جيناقتادى. 2011 جىلى جانگۇل عانيقىزى اۋداندىق پروباتسيا قىزمەتىنىڭ ينسپەكتورى بولىپ, جاڭا جۇمىسقا كىرىستى. بۇگىندە وسى سالانىڭ بىلىكتى مامانى رەتىندە بەلگىلى. پروباتسيا قىزمەتىنىڭ قىلمىستىق جاۋاپكەرشىلىككە تارتىلعان ازاماتتاردىڭ ەسەبىن جۇرگىزىپ, ولاردىڭ قوعامعا قالىپتى ادام ەسەبىندە ءسىڭىسۋىن قامتاماسىز ەتىپ, ەڭبەككە ارالاسۋىن, پسيحولوگيالىق وڭالۋىن قاداعالايتىن جاۋاپتى جۇمىس ەكەندىگىن وسى جەردە ايتا كەتكەن دۇرىس بولار.
– قىزمەتتىڭ وزىنە ءتان اۋىرتپاشىلىعى بار. ماسەلەن, قىلمىستىق جاۋاپكەرشىلىكتىڭ جازاسىن تارتقان ادامداردىڭ جاعدايىنا كىرۋ ءۇشىن, ولاردىڭ تۇيسىگىن ءتۇسىنۋ ءۇشىن جاقسى پسيحولوگ بولۋعا تۋرا كەلەدى. ايەل زاتى عوي دەپ مەنەن جۇمساقتىق كۇتەتىندەر بولادى. اشىعىن ايتايىن, مەن قىزمەتتە قاتالمىن. قاتالدىق بولماسا, ءتارتىپ بولمايدى. جۇمىس بارىسىندا بەيمەزگىل شۇعىل شاقىرتۋلار بولادى, ونىڭ ۇستىنە تۇنگى كەزدەردە رەيدتەر جاسايمىز. بۇل جۇمىستار شىدامدىلىقتى تالاپ ەتەدى. قىزمەتىمىزدىڭ ءبىر قىرى ىشكى ىستەر سالاسىنا قاتىستى بولعاسىن, قارۋ اتۋ قابىلەتىن دە, فيزيكالىق باپتى دا ۇدايى نازاردا ۇستايمىن. جۇمىسىمدى جاقسى كورەمىن, – دەيدى ادىلەت اعا لەيتەنانتى جانگۇل بيسەمبيەۆا.
كەيىپكەرىمىز وسىدان ون جىل بۇرىن جىمپيتىلىق نۇربول دەگەن ازاماتپەن شاڭىراق كوتەرگەن ەدى. جانگۇل بۇگىندە ەكى بالانىڭ اناسى. ول انا بولۋدىڭ دا تەڭدەسسىز باقىت ەكەنىن تامسانا ايتتى ءبىزگە اڭگىمە بارىسىندا. «سول باقىتىڭىز ۇزاعىنان بولسىن!» دەدىك ءبىز سۇحبات سوڭىندا قاعاز-قالامىمىزدى جيناستىرىپ جاتىپ.
باۋىرجان شيرمەدين ۇلى,
جۋرناليست.
باتىس قازاقستان وبلىسى,
سىرىم اۋدانى.