شىعىس وڭىرىندە 59 مىڭعا جۋىق مۇمكىندىگى شەكتەۋلى جان بولسا, سونىڭ ىشىندە 9 مىڭنان استامى 18 جاسقا دەيىنگى بالالار ەكەن. وسىعان وراي, وسكەمەندە مۇمكىندىگى شەكتەۋلى بالالاردى تاربيەلەپ وتىرعان وتباسىلاردى الەۋمەتتىك تۇرعىدان قامتاماسىز ەتۋ ماسەلەلەرى قاراستىرىلعان جيىن ءوتتى. وبلىس ورتالىعىنداعى «ءۇلبى» قالالىق حالىققا الەۋمەتتىك قىزمەت كورسەتۋ ورتالىعىندا وتكەن دوڭگەلەك ۇستەلگە اتالعان ساناتتاعى بالالاردىڭ اتا-انالارى مەن الەۋمەتتىك قورعاۋ مەكەمەلەرى, قوعامدىق ۇيىمدار وكىلدەرى قاتىستى.
«قازاقستان مۇگەدەكتەر كونفەدەراتسياسى» رەسپۋبليكالىق قوعامدىق بىرلەستىگىنىڭ پرەزيدەنتى جاننات وماربەكوۆا ەلباسى نۇرسۇلتان نازارباەۆتىڭ تاپسىرماسى اياسىندا مۇمكىندىگى شەكتەۋلى جانداردى قوعامنىڭ تولىق مۇشەسىنە اينالدىرۋ باعىتىندا مەملەكەت تاراپىنان كورسەتىلىپ وتىرعان كەلەلى ءىس-شارالارعا توقتالدى. جاننات انۋاربەكقىزى پرەزيدەنت جولداۋىندا نازار اۋدارىلعان ماسەلەگە وراي, سوڭعى ەكى جىل كولەمىندە ەل اۋماعىندا ەلەۋلى جۇمىستار اتقارىلعانىن, مۇمكىندىگى شەكتەۋلى جانداردىڭ ماسەلەسىن ءتيىمدى شەشۋ ءۇشىن قوعامدىق ۇيىمدار قۇرىپ, بىرلەسە جۇمىس ىستەۋ قاجەتتىلىگىن جەتكىزدى. استانا قالاسى مەن وڭىرلەردە اشىلعان وڭالتۋ ورتالىقتارىنىڭ وڭ ناتيجە بەرىپ جاتقانىن, بىلىكتى ماماندار دايارلاۋ مەن ەمدەۋ كۋرستارىن جەتىلدىرۋ ماقساتىندا شەتەل تاجىريبەلەرى ەنگىزىلىپ, ارىپتەستىك بايلانىستار ورناتىلۋى قازاقستاننىڭ مۇمكىندىگى شەكتەۋلى ازاماتتاردى قوعامعا بەيىمدەۋ باعىتىندا اتقارعان ءىس-شارالارىنىڭ ناقتى ناتيجەسى ەكەندىگىن ايتتى. سونداي-اق, شىعىس ءوڭىرىنىڭ بەسقاراعاي اۋدانىندا اشىلعان شاعىن وڭالتۋ ورتالىعىنىڭ قىزمەتىن ۇلگى رەتىندە اتاعان قوعامدىق ۇيىم جەتەكشىسى, ورتالىقتا 15 بالا تاربيەلەنگەننىڭ وزىندە ۇنەمى ناۋقاس بالاعا باس-كوز بولۋعا ءماجبۇر بولىپ وتىراتىن اتا-انانىڭ جۇمىس ىستەۋىنە, بالانىڭ وڭالۋىنا, باسقا ادامداردىڭ جۇمىسپەن قامتىلۋىنا جاعداي جاسالاتىنىن جەتكىزدى.
– باستى بايلىق – دەنساۋلىق. الايدا, ەشكىم اۋرۋدى سۇراپ المايدى. بۇل – سىناق. تىرەك-قيمىل قوزعالىسى شەكتەلگەن جاندار دا قوعامعا ءوز پايداسىن تيگىزگىسى كەلەدى. جالپى, داۋنا سيندرومى قويىلعان بالالار ەشقاشان الدامايدى. سوندىقتان, ولاردى وزىق ەلدەردە جۇمىسقا قابىلداۋ ءۇردىسى بار. ءبىزدىڭ ەلدە دە وسى باعىتتا جۇمىستار جۇرگىزىلۋدە. مەملەكەت باسشىسىنىڭ بۇل ساناتتاعى جانداردى قوعامعا تارتۋ ءۇشىن بەرگەن ناقتى تاپسىرمالارى بار, – دەدى ج.وماربەكوۆا.
دوڭگەلەك ۇستەل بارىسىندا ءسوز العان اتا-انالار زاڭنامادا باسپانامەن قامتۋ ماسەلەسىندە جەتىم جانە اتا-انا قامقورلىعىنسىز قالعان بالالارعا بەرىلەتىن الەۋمەتتىك قورعاۋ ماسەلەسىنىڭ مۇمكىندىگى شەكتەۋلى جاندارعا قاراستىرىلماعانىن, تىرەك-قيمىل جۇيەسى شەكتەلگەن بالالارعا ارنالعان ارنايى مامانداندىرىلعان ويىن الاڭدارى مەن بالاباقشالار, مەكتەپتەردى پايدالانۋعا بەرۋ جانە جورگەك, ورتوپەديالىق اياق كيىم, ەستۋ قۇرىلعىلارى, مۇگەدەك اربالارى سىندى قاجەتتىلىكتەرمەن قامتۋ جونىندە وزەكتى ۇسىنىستارىن جەتكىزدى.
ءجاميلا امىرعاليەۆا بالاسىنىڭ كەنەتتەن دەرتكە دۋشار بولىپ, الماتىداعى نەيروحيرۋرگيالىق ورتالىقتا باسىنا وتا جاسالعانىن ايتتى. بالانى ەمدەۋگە بار كۇش-جىگەرىن ارناپ كەلە جاتقان انانىڭ ءوزى بۇگىندە «ءۇلبى» ورتالىعىندا ەڭبەك ەتەدى.
– كاميلا ەسىمدى قىزىم ءوسكەمەندەگى بالالاردى وڭالتۋ ورتالىعىندا ەمدەلدى. قازىرگى كەزدە دارىگەرلىك-مەديتسينالىق قورىتىندىنىڭ ۇيعارىمىمەن مەكتەپكە بارىپ ءجۇر. بۇل مەكتەپتە مۇگەدەك بالانى قابىلەتىنە بايلانىستى ەڭبەككە باۋليدى. «بالبۇلاق» شيپاجايىندا ءبىر اي تەگىن ەم قابىلدادىق. جاردەماقى الىپ تۇرامىز. بالام ءان ايتقاندى, بي بيلەگەندى جاقسى كورەدى. كاميلانىڭ كەلەشەگىنە ۇلكەن ۇمىتپەن قارايمىز, – دەدى ول.
سونداي-اق, جيىنعا قاتىسۋشىلار «ءۇلبى» ورتالىعىندا ەمدىك-ساۋىقتىرۋ شارالارىن قابىلدايتىن مۇمكىندىگى شەكتەۋلى بالالار قويعان «شالقان» ەرتەگىسىن تاماشالادى.
دۋمان اناش,
«ەگەمەن قازاقستان».
وسكەمەن.