داعدارىس جاعدايىندا دا دامۋدى قامتاماسىز ەتۋ ءۇشىن قارجى كوزدەرىن تابۋ, سىرتتان ينۆەستيتسيا تارتۋ قاجەتتىگى بەلگىلى. جەرگىلىكتى بيلىكتىڭ بۇل باعىتتاعى ىلكىمدى قيمىلى, ىرگەلى ىزدەنىسى ناتيجەلى بولا باستادى. سونىڭ ناقتى مىسالى رەتىندە تۇرىكتىڭ «Hemogens Health Care» كومپانياسى اقتوبەدە ورتالىق مەديتسينالىق جەدەل ءجاردەم ستانساسىن سالۋعا مۇددەلىلىك تانىتىپ وتىرعانىن ايتۋ ءلازىم.
بۇل تۋرالى وبلىس اكىمى بەردىبەك ساپارباەۆتىڭ كومپانيانىڭ باس ديرەكتورى نادجيە ارپادجىمەن كەزدەسۋى بارىسىندا بەلگىلى بولدى. كەزدەسۋدە ءوڭىر باسشىسى سوڭعى بەس جىل ىشىندە ايماقتا حالىقارالىق ستاندارتتارعا جاۋاپ بەرەتىن 52 دەنساۋلىق ساقتاۋ نىسانى سالىنعاندىعىن, 52 مەكەمە عيماراتىنا كۇردەلى جوندەۋ جۇرگىزىلگەندىگىن جەتكىزدى. مەديتسينالىق مەكەمەلەردىڭ ماتەريالدىق-تەحنيكالىق بازالارىن جاقسارتۋ جولىندا جۇمىستار جۇرگىزىلۋدە. سونىمەن بىرگە, دەنساۋلىق ساقتاۋ سالاسىندا شەشۋدى قاجەت ەتەتىن پروبلەمالار دا بار ەكەنىن جاسىرمادى. سونداي وزەكتى ماسەلەلەردىڭ ءبىرى – مەديتسينالىق جەدەل جاردەم قىزمەتىنىڭ تيپتىك عيماراتتىڭ بولماۋى, اۆتوكولىكتەر مەن جابدىقتاردىڭ شەگىنە جەتە توزۋى, ديسپەتچەرلىك قىزمەتتىڭ قازىرگى ستاندارتتارعا ساي كەلمەۋى ەكەنىن ءمالىم ەتتى. وسىعان بايلانىستى ءبىز وبلىستىق جەدەل جاردەم ستانساسىن اۋتسورسينگكە بەرۋ تۋرالى شەشىم قابىلدادىق. بۇل رەتتە بىزگە ءتۇرىك ارىپتەستەرىمىز كومەككە كەلمەك, دەدى بەردىبەك ماشبەك ۇلى ءسوز اراسىندا. قازىرگى ۋاقىتتا سانيتارلىق كولىك پاركىنىڭ توزۋى 55 پايىزدى قۇراسا, بۇل كورسەتكىش بويىنشا مەديتسينالىق جابدىقتاردىڭ دا جاعدايى ءماز ەمەس. جەدەل جاردەم بريگادالارىنا جۇكتەمە وتە جوعارى, وتكەن جىلى عانا ول 29 پايىزعا كوتەرىلدى. شاقىرۋلار سانى كوبەيە ءتۇستى, وسىعان بايلانىستى كەشىگىپ بارۋ جاعدايلارى ورىن الۋدا.
«Hemogens Health Care» كومپانياسىنىڭ باس ديرەكتورى نادجيە ارپادجى تۇركيا مەن بىرىككەن اراب امىرلىكتەرىندە وزدەرىنىڭ وسىنداي جوبالاردى جۇزەگە اسىرۋدا ءبىراز تاجىريبە جيناقتاعانىن ايتا كەلىپ, اقتوبە ءوڭىرىنىڭ دەنساۋلىق ساقتاۋ سالاسىنا 5,5 ميلليارد تەڭگە ينۆەستيتسيا جاسالاتىندىعىن جەتكىزدى. بيىلعى جىلى 3,5 ميلليارد تەڭگە ورتالىق مەديتسينالىق جەدەل جاردەم ستانساسىن سالۋعا جانە ونى جاراقتاندىرۋعا, سونداي-اق, 35 سانيتارلىق اۆتوكولىك ساتىپ الۋعا جۇمسالماقشى. سونىمەن بىرگە, جاڭا ە-فورماتىندا مەديتسينالىق جەدەل جاردەم كورسەتۋ بويىنشا بىرىڭعاي قالالىق اقپاراتتىق-تالدامالى ديسپەتچەرلىك ورتالىق قۇرىلادى. وسى ءبىر مەزگىلدە دارىگەر قىزمەتكەرلەرىن وقىتۋ, ءدارى-دارمەكتەر ءوندىرىسى بويىنشا دا جوبالار جۇزەگە اسىرىلاتىن بولادى. كومپانيا 2020 جىلى 2 ميلليارد تەڭگەنى رەانيموبيلدىك جانە مەديتسينالىق جابدىقتاردى جاڭارتۋعا ءبولۋدى كوزدەۋدە.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.