سەمەيدە ءباتتاش سىدىق ۇلى اتىنداعى شەشەندىك ءسوز ورتالىعى اشىلدى. اتالمىش ورتالىق №37 قازاق مەكتەپ-گيمنازياسىندا ورنالاسقان. تاۋەلسىزدىككە قول جەتكىزگەن العاشقى جىلدارى №37 قازاق مەكتەپ-گيمنازياسى تىكەلەي ءباتتاش سىدىق ۇلىنىڭ باستاماسىمەن بوي تىكتەگەن ەدى. 1990 جىلى ءباتتاش اعانىڭ ۇسىنىسىمەن «قازاق ءتىلى» قوعامى قۇرىلدى. سەمەيدە بۇرىن ەكى قازاق ءتىلدى مەكتەپ بولسا, قازىر جەتەۋگە جەتتى. جالعىز بالاباقشا بار ەدى, 17-گە كوبەيدى. وسىعان ول ىقپال ەتتى. «ەندى وسىناۋ شەشەندىك ءسوز ورتالىعىندا قازاق بالالارى عانا ەمەس, وزگە ۇلت وكىلدەرى دە قازاقتىڭ ءسوز ونەرى مادەنيەتىمەن ەركىن تانىسا الاتىن بولادى», دەدى №37 مەكتەپ-گيمنازيا ديرەكتورى, «قۇرمەت» وردەنىنىڭ يەگەرى, ءباتتاش اقساقالدى كوزى كورگەن جۇماعازى ستامبەكوۆ. بۇگىنگى جاس ۇرپاق ءۇشىن اسا ماڭىزدى شەشەندىك ءسوز ورتالىعىنىڭ اشىلۋىنا مۇرىندىق بولعان – حالىقارالىق «قازاق ءتىلى» قوعامى مەن قازاق گۋمانيتارلىق يننوۆاتسيالىق زاڭ ۋنيۆەرسيتەتىنىڭ ۇجىمى. بۇل شارا ەل تاۋەلسىزدىگىنىڭ 25 جىلدىق مەرەيتويى قارساڭىندا «جيىرما بەس يگىلىكتى ءىس» اكتسياسى اياسىندا ۇيىمداستىرىلىپ وتىر. ورتالىقتا شەشەندىك ونەردىڭ قىر-سىرى, جىراۋلار مەن بيلەردىڭ دانا سوزدەرى, ءادىل شەشىمدەرى جان-جاقتى دارىپتەلەتىن بولادى. بۇل باعىتتا مەكتەپ ۇستازدارى مەن ۋنيۆەرسيتەت عالىمدارى بىرلەسىپ جۇمىس اتقارۋعا ۋاعدالاستى.
– «قازاق ءتىلى» قوعامىنىڭ قالىپتاسۋىنا ەڭبەگى ءسىڭدى, – دەيدى ءباتتاش اعانىڭ جارى ءۇمىت ومىربەكقىزى. – قانشاما مەكتەپ, بالاباقشا اشۋعا, سەپتىگىن تيگىزدى. جاستار وقىسىن, ءتىلىن ءبىلسىن, دەدى.
جينالعان قاۋىم الدىندا حاميت سىدىق ۇلى, حافيز ماتاەۆ سىندى اقساقالدارمەن قاتار, اكادەميك, ابايتانۋشى عاريفوللا ەسىم, پروفەسسور اراپ ەسپەنبەتوۆ, قالا اكىمىنىڭ ورىنباسارى نادەجدا شاروۆا ءسوز سويلەپ, شەشەندىك ءسوز ونەرى ورتالىعىنىڭ جۇمىسىنا تابىستار تىلەدى.
راۋشان نۇعمانبەكوۆا.