ءوزىنىڭ بارلىق جۇلدەلەرىن اۋكتسيونعا شىعارىپ ساتپاقشى
كوزى تىرىسىندە-اق اتى اڭىزعا اينالعان برازيليالىق «فۋتبول كورولى» پەلە ءوزىنىڭ جيعان-تەرگەن بارلىق التىن مەدالدارىن اۋكتسيونعا شىعارىپ ساتۋعا شەشىم قابىلدادى. جاسى 75-تەگى سپورت ارداگەرى سول ساۋدادان تۇسكەن اقشانى كۋريتيبا بالالار اۋرۋحاناسىنا اۋدارعىسى كەلەتىنىن دە مالىمدەپ وتىر.
پەلە اتالعان اۋكتسيونعا ءوزىنىڭ ەكى مىڭنان استام جەكە مۇكامالدارىن شىعارماقشى. ولاردىڭ اراسىندا برازيليا شتاتتارى چەمپيوناتتارىنان باستاپ, جاھاندىق جارىستارعا دەيىنگى باسەكەلەردە العان مەدالدارى مەن جۇلدەلەرى بار. بۇلاردىڭ ەڭ ءسۇبەلىلەرى قاتارىنا الەمنىڭ 1958, 1962 جانە 1970 جىلدارداعى چەمپيوناتتارىندا جەڭىپ العان التىن مەدالدارى مەن ەڭ سوڭعى جولعىسىندا بەرىلگەن جيۋل ريمە جۇلدەسىنىڭ كوشىرمەسى جاتادى. بۇدان 46 جىل بۇرىن برازيليا قۇراماسى مەكسيكادا وتكەن مۋنديالدا ءۇشىنشى مارتە چەمپيون اتانعاندا, سوم التىننان قۇيىلعان باس كۋبوك – جيۋل ريمە جۇلدەسى كومانداعا ماڭگىگە ساقتاۋعا تابىس ەتىلگەن ەدى. راس, ول 1983 جىلى ۇرلانىپ كەتىپ, سول بويى تابىلماعان. ونىڭ بالقىتىلىپ تاستالعانى دا كەيىن بەلگىلى بولدى.
بۇدان باسقا, لوتتا پەلەنىڭ ءجاسوسپىرىم شاعىندا ش ۇلىقتاردان قۇراستىرىلىپ جاساپ ويناعان دوبى دا تۇرادى.
– مەن جانكۇيەرلەر مەن كوللەكتسيونەرلەردى ءوز تاريحىمنىڭ ءبىر بولشەگى بولۋعا شاقىرىپ وتىرمىن, – دەپ ءتۇسىندىردى بۇل شەشىمىن الەمنىڭ ءۇش دۇركىن چەمپيونى. – مەن ولاردىڭ وسى ارتەفاكتاردى قاستەرلەپ, وتكەن ءومىر جولىم جايلى ويلارىن بالالارىنا ايتىپ بەرەدى دەگەن ۇمىتتەمىن.
قازىر «فۋتبول كورولى» ۇسىناتىن جيۋل ريمە جۇلدەسىنىڭ كوشىرمەسى 400 مىڭ دوللاردان 1 ميلليون دوللارعا دەيىن بارادى دەگەن بولجام ايتىلۋدا. سول سياقتى ءۇش الەم چەمپيوناتىنىڭ التىن مەدالدارى 200 مىڭعا دەيىنگى باعامەن ساتىلادى. ال فۋتبولشىلىق مانسابىنداعى 1000-شى گولى سوعىلعان دوپ 40-60 مىڭ دوللارعا ساتىلۋعا ءتيىس.
تىرشىلىكتە «ەدسون ارانتيس دۋ ناسيمەنتۋ» دەگەن اتى بار پەلەنىڭ بۇل اۋكتسيونى بيىلعى جىلعى 7-9 ماۋسىم كۇندەرى لوندوندا وتەدى.
رۋسلان يگىلىك.