ەلىمىزدە وتاندىق ءونىمنىڭ ءورىسى كەڭەيىپ, جىل وتكەن سايىن تۇرلەنىپ كەلە جاتقانى راس. ازىق-ت ۇلىكتى بىلاي قويعاندا, كۇندەلىكتى تۇتىناتىن بۇيىمدار مەن تۇرمىستىق زاتتارىمىزدىڭ ءبىراز ءتۇرىن وزىمىزدەن شىعارا باستادىق. وعان مىسال جەتەرلىك. باستىسى, وتاندىق ونىمدەرىمىزدىڭ ساپاسى ەشكىمنەن كەم ءتۇسىپ جاتقان جوق. بىراق «يمپورتتىڭ» ءبارىن «برەند» دەپ باعالايتىن بۇرىنعى تاپتاۋرىن تالعام ءالى دە سانامىزدان سىتىلار ەمەس. قازاقستاندا جاسالعان دۇنيەنىڭ بارىنە سەنىمسىزدىكپەن قاراپ, تۇتىنىپ كورمەي جاتىپ, ساپاسىنا كۇدىك تاستايتىنداردىڭ تاڭداۋىن تالقانداۋ ءبىزدىڭ وتاندىق وندىرىسشىلەرگە دە وڭاي سوعىپ جاتقان جوق. ارينە, قازىرگىدەي اينالامىز اشىق, سىرتتان تاسىلاتىن تاۋارلارعا تىم قولجەتىمدى شاقتا ءوز ونىمدەرىمەن وزگەنىكىنىڭ باسەكەلەستىگىنەن ءوتىپ, تۇتىنۋشىنىڭ تالعامىنا ەنۋ ەكىنىڭ ءبىرىنىڭ قولىنان كەلە بەرمەسى دە انىق. الايدا, نارىق تالابى وتاندىق كاسىپكەرلەردەن وسىنى تالاپ ەتىپ وتىر.
«ادەلفيدىڭ» استاناداعى دۇكەنىنە باس سۇققانىمىزدا بىردەن وتاندىق ءوندىرىستىڭ شىنداپ وركەن جايعانىنا, زاماناۋي ۇدەرىسپەن ۇندەسىپ, قازاق ەليتالىق دەڭگەيدى دە ءالدەقاشان يگەرگەنىنە كوزىمىز جەتتى. «ادەلفي» – بۇل ەليتالىق جيھاز جاسايتىن قازاقستاندىق كومپانيا. ەليتالىق دەسە دەگەندەي, كوزدىڭ جاۋىن العان جيھازدار بۇل سالادا بايگە باسىن بەرمەي جۇرگەن يتاليالىقتاردى دا ارتتا تاستاعانداي. بىردەن «ويپىرم-اي, وسىنداي دۇنيە ءوز ەلىمىزدە-اق جاسالىپ جاتقاندا, سوناۋ الىس شەتەلدەردەن جيھاز تاسىپ جۇرگەندەرگە جول بولسىن», دەگەندەيسىڭ.
قازاقستاندىق كومپانيانىڭ قىر-سىرىن ءبىز ونىڭ استاناداعى فيليالىنىڭ اتقارۋشى ديرەكتورى تيمۋر يسمايلوۆتان بىلدىك. ەليتالىق جيھاز جاسايتىن «ادەلفي» كومپانياسىنىڭ قۇرىلعانىنا بيىل 16 جىل بولىپتى. وسى ۋاقىت ارالىعىندا تەك جوعارى ساپالى ونىمدەر, ەليتالىق جيھازداردىڭ بارلىق ءتۇرىن, ەسىكتەن باستاپ اس بولمەسىنە دەيىن ەكسليۋزيۆتى تۇردە جاساۋمەن اينالىسىپ كەلەدى. دۇكەندەرىنىڭ استانادا اشىلعانىنا بەس-التى ايدىڭ عانا ءجۇزى بولعان. ال العاش ورىن تەپكەن الماتىدا ەكى جەردە دۇكەنى بار. جۇزدەن استام ادامدى جۇمىسپەن قامتىپ وتىرعان فابريكالارى دا سول الماتىدا ورنالاسقان. «بۇل جيھازداردىڭ بارلىعى ءوز ەلىمىزدە جاسالعان, وتاندىق ءونىم. جيھاز جاساۋعا قاجەتتى شيكىزات, ماتەريالدى شەتەلدەن ونىڭ ىشىندە رەسەي, بەلارۋس سياقتى ەلدەردەن الدىرامىز. سەبەبى, وزدەرىڭىز بىلەتىندەي, ءبىزدىڭ ەلدە جيھاز جاسايتىن اعاش جوق. بوياۋلاردى تۇركيا مەن يتاليادان الدىرامىز. ءبىز تاپسىرىس بەرىلسە جيھازبەن قاتار ەسىك, ەدەنگە ەرنەۋلىك, جيەكتەمەلەرىنە دەيىن كەشەندى ۇيلەسىممەن جاسايمىز. تاپسىرىس بەرۋشىلەر ءبىزدى كوبىنە ينتەرنەت ارقىلى تابادى», دەيدى «ادەلفيدىڭ» استانالىق اتقارۋشى ديرەكتورى.
تيمۋر يسمايلوۆ قازاقستاندىق كاسىپكەرلەردىڭ يتاليالىق جيھازدارمەن بىردەي ساپادا, ءتىپتى, ودان دا جوعارى ءونىم شىعارۋ دەڭگەيىنە جەتكەنىن ماقتانىشپەن جەتكىزدى. «شىنىمدى ايتسام, مەن وسىنى بار قازاقستاندىق بىلسە ەكەن دەيمىن. قازىرگى كۇنى بىرەۋ قازاقستاندا جاسالعان جيھاز الايىن دەپ جاتىرمىن دەسە, كورمەي جاتىپ-اق, «ول ساپاسىز شىعار, نەگە شەتەلدەن المايسىڭ», دەپ شىعادى. «بىزدىكىلەر جاساي المايدى» دەگەن كەرتارتپا سانا ءالى دە جويىلماي ءجۇر. سول سەبەپتى الدىمەن وتاندىق ءونىمدى كورۋ كەرەك. ال ءبىز جوعارى ساپالى ونىمدەرىمىزبەن وسى تاپتاۋرىن تۇسىنىكتى وزگەرتكىمىز كەلەدى», دەيدى ول.
شەتەلدىكتەردەن ساپاسى جوعارى نەمەسە بىردەي بولا تۇرا ءبىزدىڭ ونىمدەردىڭ باعاسى ولاردان ءبىرشاما تومەن. الايدا, بۇل كومپانيانىڭ ونىمدەرى ەليتالىق بولعاندىقتان قاراپايىم ورتانىڭ قالتاسى كوتەرە بەرمەيتىن شامادا. بىراق سول بىزدەگى شەتەلدەن جيھاز الدىرىپ جۇرگەندەردىڭ كوبى وسى ەليتالىقتار ەكەنىن ەسكەرسەك, قازاقستاندىق ونىمگە سۇرانىستىڭ تومەندىگى ونىڭ باعاسىنا ەمەس, يمپورتتى بەدەل سانايتىن ساناعا دا بايلانىستى.
«ءبىر قىزىعى, ءبىزدىڭ ساپالى جيھازداردى ساتىپ الىپ ۇيلەرىنە قويعان سوڭ, ءشىمىرىكپەستەن, شەتەلدەن الدىردىق دەيتىندەر دە بار ەكەن. بۇل ءبىر جاعىنان ءبىزدىڭ ونىمگە دەگەن جوعارى باعا شىعار, ياعني شەتەلدىكتەردەن ەش كەمدىگىمىز جوقتىعىن بىلدىرەدى. الايدا, ءبىزدى قازاقستاندا ناعىز ەليتالى ساپالى ءونىمنىڭ جاسالاتىنىنا حالىقتىڭ ءالى دە سەنبەستىگى قىنجىلتادى», دەيدى تيمۋر يسمايلوۆ.
ايتقانىمىزداي, «ادەلفيدىڭ» فابريكاسى الماتىدا التى مىڭ شارشى مەتردى الىپ جاتقان 3 قاباتتى عيماراتتا ورنالاسقان. ال ونىڭ قوسىمشا ءتورتىنشى قاباتى سوندا جۇمىس ىستەيتىن ءجۇز ادامعا ارنالعان اسحانا. وندا جۇمىسكەرلەرگە بارلىق جاعداي جاسالعان. تاعى ءبىر ەرەكشەلىگى, بۇل كومپانيادا جۇمىسشىلاردىڭ باسىم كوپشىلىگى 10 جىلدان اسا جۇمىس ىستەپ ءجۇر, ءتىپتى, العاش اشىلعاننان بەرى كەلە جاتقاندار دا بار ەكەن. فابريكا جۇمىسشىلارىنا تەك جۇمىس بەرىپ قويماي, سونىمەن قاتار, ايلىق جالاقىسىنان بولەك, كۇنىنە ءۇش مەزگىل تاماق, كەيبىرەۋلەرىنە ءتىپتى, ءۇي ماسەلەسىنەن دە كومەك بەرەدى ەكەن. فابريكادا باسىم كوپشىلىگى قازاق جىگىتەرى بولعانىمەن, تۇرىك, وزبەك, قىرعىز, كورەي, ورىستار دا جۇمىس ىستەيدى. ءتىپتى, ءمۇمكىندىگى شەكتەۋلى ازاماتتار دا بار ەكەن. مۇنىڭ ءوزى ونداعى جۇمىسكەرلەرگە جاقسى جاعداي جاسالعانىن ءبىلدىرسە كەرەك. «جيھاز, اعاش بۇيىمدارىن جاساۋ – قولونەر, قارا جۇمىس بولعان سوڭ, ونداعى جۇمىسكەرلەرگە جاسالعان جاعداي ءونىمنىڭ ساپاسىنا دا اسەرىن تيگىزەدى. سوندىقتان باسشىلىق الدىمەن جۇمىسكەرلەردىڭ جاعدايىنا ايرىقشا نازار اۋدارادى. شۇكىر, قازاقتا اعاشتان ءتۇيىن تۇيەتىن حاس شەبەر كوپ. شەتەلدىك شەبەرلەردەن ەشبىر كەم تۇسپەيدى. فابريكامىزدىڭ ءوندىرىس قۋاتى دا وتە جوعارى, كەز كەلگەن تاپسىرىستى ورىندايدى. باستىسى, ەلىمىزدە كاسىبىن دوڭگەلەتكىسى كەلگەن ادامعا بارلىق مۇمكىندىك بار. سوعان ءشۇكىرلىك ەتەمىز. تەك ايانباي ەڭبەك ەتۋ كەرەك», دەيدى تيمۋر يسمايلوۆ.
قازىرگى كەزدە داعدارىس تالاپتارىنا بەيىمدەلە باستاعان فابريكا بولاشاقتا ەليتالىق قانا ەمەس, ەكونوم-كلاسس دەڭگەيىندەگى جيھازداردى دا جاساۋدى جانە جيھاز جاساۋدى ۇيرەتەتىن مەكتەپ اشۋدى جوسپارلاپ وتىرعاندىعىن جاسىرمادى. سونداي-اق, قازاقستاندىق ءونىمدى بارىنشا تانىتۋ ماقساتىندا استاناداعى «كورمە» زالىندا 13-15 ساۋىردە وتەتىن «ASTANA INTERIOR DESIGN-2016» حالىقارالىق كورمەسىنە دە قاتىسۋدى كوزدەپ وتىر.
دينارا بىتىكوۆا,
«ەگەمەن قازاقستان».