كەشە ورتالىق سايلاۋ كوميسسياسىنىڭ مۇشەسى مارات ءسارسەمباەۆ 2016 جىلعى 20 ناۋرىزعا تاعايىندالعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىنىڭ سايلاۋىنا حالىقارالىق ۇيىمدار مەن شەت مەملەكەتتەردىڭ بايقاۋشىلارىن اككرەديتتەۋدىڭ بارىسى تۋرالى بريفينگ وتكىزدى.
م.سارسەمباەۆ باق وكىلدەرىن وسى جىلعى 11 ناۋرىزداعى جاعداي بويىنشا ورتسايلاۋكوم سىرتقى ىستەر مينيسترلىگىنىڭ ۇسىنۋىمەن حالىقارالىق ۇيىمدار مەن شەت مەملەكەتتەردىڭ 454 بايقاۋشىسىن اككرەديتتەگەنى جونىندە حاباردار ەتتى. «ولاردىڭ ءىشىندە ەقىۇ/دياقب-نىڭ 44 بايقاۋشىسى, ەقىۇ پارلامەنتتىك اسسامبلەياسىنان 75 بايقاۋشى, تمد ميسسياسىنان 293 بايقاۋشى, شانحاي ىنتىماقتاستىعى ۇيىمىنان 9 بايقاۋشى, يسلام ىنتىماقتاستىعى ۇيىمىنان – 3, تۇركىتىلدەس ەلدەردىڭ پارلامەنتتىك اسسامبلەياسىنان – 7 جانە 10 شەت مەملەكەتتەن 23 بايقاۋشى بار», – دەدى ول وسى جونىندە.
وسك مۇشەسىنىڭ ايتۋىنشا, بۇدان باسقا قازاقستان رەسپۋبليكاسىنىڭ سىرتقى ىستەر مينيسترلىگى 28 مەملەكەتتەن شەتەلدىك باق-تاردىڭ 117 وكىلىن اككرەديتتەگەن. ولاردىڭ ىشىندە «Austrian Press Agency», «فرانس-پرەسس», «سينحۋا», «تاسس» «تومسون-رەيتەر», «European Pressphoto» اقپاراتتىق اگەنتتىكتەرىنىڭ, سونداي-اق, «The Financial Times», «The Guardian», «روسسيسكايا گازەتا» گازەتتەرىنىڭ جانە باسقا باق-تاردىڭ وكىلدەرى بار ەكەن. قازىرگى ۋاقىتتا الەمنىڭ 51 ەلىنەن 571 حالىقارالىق بايقاۋشى مەن شەتەلدىك بۇقارلىق اقپارات قۇرالدارىنىڭ وكىلى اككرەديتتەلىپتى.
ەلىمىزدىڭ سايلاۋ زاڭناماسىنىڭ 20-2-بابىنا سايكەس حالىقارالىق بايقاۋشىلار مەن سىرتقى ىستەر مينيسترلىگى اككرەديتتەگەن جۋرناليستەر سايلاۋ ۇدەرىسىنىڭ بارلىق كەزەڭدەرىنە قاتىسۋعا, سايلاۋ كوميسسيالارىندا سايلاۋ ناۋقانىنىڭ بارىسى تۋرالى اقپارات الۋعا, داۋىس بەرۋدى وتكىزۋ جانە داۋىستاردى ساناۋ كەزىندە سايلاۋ ۋچاسكەلەرىنە كىرۋگە, سايلاۋ ۇدەرىسىنە قاتىسۋشىلارمەن كەزدەسۋگە, وزدەرىنىڭ بايقاعاندارى, انىقتالعان زاڭ بۇزۋشىلىقتار جونىندە سايلاۋ كوميسسيالارىنىڭ مۇشەلەرىن حاباردار ەتۋگە, ۇسىنىمدار ەنگىزۋگە جانە جاريا مالىمدەمەلەر جاساۋعا قۇقىلى.
ءاليسۇلتان قۇلانباي,
«ەگەمەن قازاقستان».